हिंगणघाट जळीतकांड : भरचौकात तरुणीला पेट्रोल टाकून पेटवलं होतं, आरोपीला जन्मठेप

तरुणीला जिवंत जाळण्याचा प्रकार 3 फेब्रुवारी 2020 रोजी घडला होता. त्यानंतर तिच्यावर उपचार सुरू होतो. उपचारादरम्यान तिचा मृत्यू झाला होता.

या तरुणीला जाळून मारणाऱ्या विकेश नगराळेला वर्ध्याच्या कोर्टानं मरेपर्यंत जन्मठेप सुनावली आहे, असं विशेष सरकारी वकील उज्ज्वल निकम यांनी प्रसिद्धी माध्यमांशी बोलताना सांगितले.

या आरोपीला 3 फ्रेबुवारी 2020 ला अटक करण्यात आली होती. पण गेल्या 2 वर्षांचा कालावधी त्याच्या शिक्षेत ग्राह्य धरला जाणार नाही, असंसुद्धा कोर्टानं स्पष्ट केलं आहे.

माझ्या मुलीची हत्या करणाऱ्याला फाशीची शिक्षा व्हावी अशी आमची मागणी होती, अशी प्रतिक्रिया पीडित मुलीच्या आईने दिली आहे.

तर आम्ही कोर्टच्या निर्णयाचा आदर करतो, पण या निर्णयामुळे आम्ही समाधानी नाही, आरोपीला फाशीच व्हायला पाहिजे होती, असं पीडितेच्या नातेवाईकांनी म्हटलंय.

"माझ्या मुलीला ज्या वेदना झाल्या, त्या वेदना आरोपीला जनतेसमोर झाल्या पाहिजेत, गेल्या 7 दिवसांत तिला खूप त्रास झाला. जसा माझ्या मुलीला त्रास झाला, तसा त्या आरोपीला झाला पाहिजे. निर्भयासारखं प्रकरण लांबायला नको, लवकर या प्रकरणाचा निकाल लागावा," असं मत पीडितेच्या वडिलांनी बुधवारी प्रसारमाध्यमांशी बोलताना व्यक्त केलं होतं.

'पुनर्विचार याचिकेसाठी सरकारकडे शिफारस करणार'

राज्य महिला आयोग या प्रकरणात आरोपीला मरेपर्यंत फाशीची शिक्षा व्हावी यासाठी पुनर्विचार याचिका दाखल करावी अशी शिफारस राज्य सरकारकडे करणार आहे.

महिला आयोगाच्या अध्यक्षा रुपाली चाकणकर म्हणाल्या, "मरेपर्यंत जन्मठेप अशी शिक्षा आरोपीला सुनावण्यात आली आहे. मी शेवटपर्यंत पीडितेसोबत होते. तिच्या मरण यातना मी स्वत: पाहिल्या आहेत. आरोपीला फाशीची शिक्षा होणं गरजेचं होतं असं आम्हाला वाटतं. न्यायालयाच्या निकालाची प्रत हाती आल्यानंतर त्याचा अभ्यास केला जाईल आणि सरकारकडे पुनर्विचार याचिकेसाठी शिफारस करू."

दोन वर्षांनी न्यायालयाचा निकाल आला असला तरी राज्य सरकारने पीडित कुटुंबाला दिलेली आश्वासनं पूर्ण केलेली नाहीत अशी टीका भाजपच्या उपाध्यक्ष चित्रा वाघ यांनी केली आहे.

त्या म्हणाल्या,"आरोपीला फाशीची शिक्षा व्हावी अशी मागणी होती. दोन वर्षांनी निकाल जाहीर झाला. न्यायालयाच्या निकालाचा आम्ही आदर करतो. परंतु अजूनही शासनाने जी आश्वासनं दिली होती ती पूर्ण करण्यात आलेली नाही. आम्ही वेळोवेळी याचा पाठपुरावा केला आहे."

सरकार थोडं जरी संवेदनशील असेल तर त्यांनी तात्काळ आश्वासनांची पूर्तता करावी ही आमची मागणी आहे असंही त्या म्हणाल्या.

हिंगणघाट जळीतकांडाचा खटला कसा चालला?

पीडितेच्या डेथ सर्टिफिकेटमध्ये काय लिहिलं होतं?

सकाळी साडे सहाच्या सुमारास पीडितेच्या हृदयाचे ठोके वेगाने कमी होऊ लागले. तिला वाचवण्याचे शक्य तितके सर्व प्रयत्न करण्यात आले.

10 फेब्रुवारी 2020 रोजी सकाळी 6 वाजून 55 मिनिटांनी तिने अखेरचा श्वास घेतला. पीडिता 35 टक्के भाजली होती. सेप्टिक शॉक हेही मृत्यूचं कारण आहे. (ज्या रुग्णांना अशा प्रकारचा संसर्ग झालेला असतो तेव्हा त्या संसर्गाशी लढताना रक्तदाब झपाट्याने कमी होतो आणि गुंतागुंत निर्माण होते.)

पीडितेचा मृतदेह पोलिसांकडे शवविच्छेदनासाठी सोपवण्यात आला आहे. असं ऑरेंज सिटी रुग्णालयाचे संचालक डॉ. अनुप मरार यांनी जारी केलेल्या मेडिकल बुलेटिनमध्ये सांगितलं होतं.

हिंगणघाट येथे नेमकं काय घडलं?

वर्धा जिल्ह्यातील हिंगणघाट येथील नंदोरी चौकात पेट्रोल टाकून तरुणीला जाळल्याची घटना 3 फेब्रुवारीला घडली. या घटनेतील पीडिता 40 टक्के भाजली होती, त्यानंतर तिच्यावर नागपूर येथील ऑरेंज सिटी रुग्णालयात उपचार सुरू होते.

या घटनेने संपूर्ण महाराष्ट्रात संतापाची लाट उसळली होती. या घटनेविरोधात अनेक मोर्चे निघाले. राजकीय नेत्यांनीही या प्रकरणाची गंभीर दखल घेतली. हिंगणघाट तसेच वर्धा जिल्ह्यातील समुद्रपूरमध्येही नागरिकांनी बंद पुकारत या घटनेचा निषेध करण्यात आला होता.

प्रकरण काय?

3 फेब्रुवारीला सकाळी 7 वाजून 15 मिनिटांनी एका महिलेचा 'वाचवा… वाचवा' असा आवाज आल्याने कुणाचा तरी वाहनाने अपघात झाला असावा याचा अंदाज घेत परिसरातून जाणारे विजय कुकडे यांनी आपली दुचाकी थांबवली.

"ती वेदनेनं विव्हळत होती. तिचा श्वासोच्छवास संथ झाला होता आणि श्वास घेतानाही तिला त्रास होत होता. आगीच्या ज्वाळांमुळे तिचे डोकं, मान आणि चेहरा जळून गेला होता. अशाच अवस्थेत एका लहान शाळकरी मुलीच्या स्वेटरच्या मदतीनं तिच्या शरीरावरील आग विझवून तिला हॉस्पिटलला नेण्यात आले. ही घटना आयुष्यात कधीही विसरता येणार नाही," विजय कुकडे सांगत होते.

दुचाकी वळवून मागे गेल्यावर कुकडे यांना एक महिला भर रस्त्यात जळतांना दिसली. क्षणाचाही विलंब न लावता कुकडे यांनी पिडितेच्या अंगावर पाणी टाकून आग विझविण्याचा प्रयत्न केला.

पण ज्वाळा कमी होत नसल्याने एका शाळकरी मुलीने आपले स्वेटर काढून पिडितेला वाचविण्याचा प्रयत्न केला.

पीडितेच्या शरीरावरील ज्वाळा पूर्णपणे विझल्यावर तिला कारमधून हिंगणघाटच्या सरकारी हॉस्पिटलला नेण्यात आले आणि उपचार सुरू झाले.

"मी माझ्या मुलाला शाळेत सोडण्यासाठी गेलो होतो. परत येत असताना नंदोरी चौकात एक मुलगा उभा होता, त्याच्या हाती पेटता टेंभा होता. हिवाळा असल्यामुळे शेकोटी पेटविण्यासाठी कचरा पेटवण्यासाठी ह्या व्यक्तीने टेंभा हातात घेतला असावा असा अंदाज मी व्यक्त केला. पण मागे गेल्यावर याच टेंभ्याने एका महिलेला पेटविण्यात आल्याच कळले," कुकडे त्या दिवसाबद्दल सांगतात.

प्रवाशांची तत्परता

आरोपीने पेट्रोल टाकून पेटवून दिल्यानं अचानक घडलेल्या या घटनेनं पीडिता प्राध्यापिका किंचाळली, ती पेटत्या कपड्यांसह खाली बसली. तिचा किंचाळण्याचा आवाज ऐकून एक दहावी अकरावीत जाणारा मुलगी धावत तिथे आली.

काही लोक पाणी टाकून पीडितेला वाचविण्याचा प्रयत्न करत असतांना या मुलीने आपले स्वेटर काढून पिडितेच्या अंगावर टाकले आणि आग विझली.

परिसरातील युवक सुशील घोडे यानेही धावून मदत केली. विजय कुकडे यांनी पीडितेला एका कारने हॉस्पिटल मध्ये दाखल केले.

घटनाक्रम

गृहमंत्र्यांनी घेतली होती पीडितेची भेट

राज्याचे तत्कालीन गृहमंत्री अनिल देशमुख यांनी मागच्या मंगळवारी रात्री रुग्णालयात जाऊन पीडितेची भेट घेतली होती. त्यांनी डॉक्टरांशी चर्चा करून पीडितेच्या तब्येतीची विचारपूस केली होती.

"महिलांविरोधात हिंसक कृत्य करणा-या गुन्हेगारांना आम्ही सोडणार नाही. आंध्र प्रदेशच्या धर्तीवर लवकरात लवकर कायदा करणार आहोत," असं आश्वासन अनिल देशमुख यांनी दिलं होतं.

सैतानालाही लाजवेल असा हल्ला - डॉक्टर

"गेली 35 वर्षं मी आकस्मिक अपघात विभागात डॉक्टर म्हणून काम करतोय. पण हैवानालाही लाजवेल अशा पद्धतीनं एका प्राध्यापक महिलेला जिवंत जाळण्याचा प्रयत्न करण्याच्या घटनेमुळे मी व्यथित झालोय. पीडितेच्या शरीरावर थेट पेट्रोल टाकून जाळल्यामुळे तिचा चेहरा, गळा, घसा, कानं, केस तसेच दातही जळून गेलेत. पीडितेची दृष्टी वाचली की नाही हे शु्द्धीवर आल्यावरच कळू शकेल. 35 वर्षांच्या मेडिकल करिअरमध्ये, एक डॉक्टर म्हणूनच नाही तर एक माणूस म्हणूनही माझ्या उभ्या आयुष्यात असा हल्ला मी पाहिला नव्हता. हा हल्ला सैतानालाही लाजवणारा होता," अशी प्रतिक्रिया हिंगणघाट मधील पीडितेवर उपचार करणाऱ्या नागपूरच्या ऑरेंज सिटी हॉस्पिटलचे डॉक्टर अनुप मरार यांनी दिली होती.

ते पुढे म्हणाले, "पीडितेला वेळीच आमच्या हॉस्पिटलमध्ये आणलं गेलं, तेव्हा आम्ही तिला कृत्रिम श्वासोच्छवासावर ठेवलं, उपचार सुरू केले."

10 फेब्रुवारी 2020 रोजी या पीडितेने शेवटचा श्वास घेतला.

हे वाचलंत का?

(बीबीसी मराठीचे सर्व अपडेट्स मिळवण्यासाठी तुम्ही आम्हाला फेसबुक, इन्स्टाग्राम, यूट्यूब, ट्विटर वर फॉलो करू शकता.'बीबीसी विश्व' रोज संध्याकाळी 7 वाजता JioTV अॅप आणि यूट्यूबवर नक्की पाहा.)