Anambra Steeti bụ steeti kacha nwee udo na Naịjirịa, anyị ekpochapụla ogige ndị omekome ruru 60 – Gọvanọ Soludo

Nchịkọta akụkọ ndị mere n'izu a

Nchịkọta

Mkpuchi Na Eme Ozugbo

Chinonso Ugorji, Michael Ngene, Michael Ilediagu, Marvelous Obomanu, Ikechukwu Kalu, Uche Akolisa, Uzoamaka Ewuzie, Adline Okere

21 Maachị 2026A nwuchiela ụmụakwụkwọ Igbinedion maka ebubo nwata akwụkwọ ibe ha ihe
Ebe foto si, Igbinedion Education Centre
Ndị uweojii Edo Steeti anwuchiela ụmụakwụkwọ Igbinedion Education Centre maka maka iti nwata akwụkwụ ibe ha ihe n’ n'ụlọakwụkwọ ahụ.
N’ozi ọnụ na-ekwuru ndị uweojii na Steeti ahụ bụ Eno Ikoedem wepụtara n'ụbọchị Satọde, ọ sị na a ga-ekpe ụmụakwụkwọ ahu e boro ebubo jidela n'ụlọikpe ezinaụlọ dịka iwu na-achị amamikpe ụmụaka siri dị.
“Ụlọọru anyi emeela nnyocha zuru oke chọpụta na anyị ejidela mmadụ niile aka ha dị n’ihe merenụ, a ga-ekpe ha ikpe n'ụlọikpe ma-ahụ maka ezinaụlọ dịka iwu obodo siri dị maka amamikpe ụmụaka na nchekwa ụmụaka," ozi ahụ kwuru.
Ikoedem nyere mkpebi na ndị uweojii agaghị agbanwe n’idebe iwu nakwa ichekwa ndị bi na steeti ahụ niile, ọkachasị ụmụaka.
Cheta na ihe a mere n’izuụka gara, mgbe ihe onyonyo fesara na soshal midịa gosiri ebe ụmụakwụkwọ nwoke abụọ na-eti nwa akwụkwọ ibe ha ihe n'ụzọ dị egwu.
Ihe onyonyo ahụ na-akpasu iwe mere ka ndịisi ụlọakwụkwọ chụọ ụmụakwụkwọ ahụ tinyere aka n'ihe mmegide ahụ.
21 Maachị 2026Mmadụ abụọ anwuọla mgbe ụgbọala tanka gaasị gbawara na Lagos
Ebe foto si, Lagos State Fire Service
Nnukwu mgbawa egbuoala mmadụ abụọ ma mebie akụnaụba ruru puku kwuru puku naịra ka ụgbọala tanka bu mmanụ gaasị na ụgbọala tipa sọkọtara isi n’'okporoụzọ Lekki-Epe, n'ụbọchị Satọde.
Onyeisi ndị ọrụ mgbanyụọkụ na Lagos steeti bu Margaret Adeseye kwuru na ihe mberede ahụ mere n'elekere abụọ na nkeji iri atọ na isii nke ụtụtụ.
Ihe mberede ahụ mere mgbe ụgbọala tipa ruru tọn iri abụọ na-agba ọsọ si n'akụkụ Epe na-abịa ma kụọ n'azụ ụgbọala tanka gaasị ruru tọn iri atọ nke kwụụ n’ụzọ.
Ebe foto si, Lagos State Fire Service
Ụlọahịa kariri iri na ụlọ ndi ọzọ di n’akụkụ ụzọ gbara ọku tupu e menyụọ ya.
Ọkụ regburu onye na-anya tipa ahụ na onye na-enyere ya aka, mana a kọrọ na onye na-anya ụgbọala gaasị gbapụrụ na-enweghị mmerụ ahụ ọbụla.
Ọnọdụ adịla mma n'ebe ahụ ugbua ka na-agba mbọ ibupu irighiri ụgbọala abụọ ahụ n’ụzọ n’ebe ihe mberede ahụ mere.
21 Maachị 2026APGA agaghị eweputa onye ga-azọ ọkwa Onyeisiala n'afọ 2027 – Gọvanọ Soludo
Ebe foto si, ABS Awka
Gọvanọ Anambra steeti bu Charles Soludo, ekwuola na pati ya bụ All Progressives Grand Alliance (APGA) agaghị ewpụta onye ga-azọrọ ha ọkwa onyeisiala na ntuliaka afọ 2027.
Gọvanọ Soludo kwuru nke a n'ụbọchị Fraịde mgbe ya na ndi ntaakụkọ nwere mkparitauka ‘media chat’ n'Awka isiobodo steeti.
N’okwu Gọvanọ Soludo, "APGA ewepụtaghị onye zọọrọ ha ọkwa onyeisiala na’fọ 2011, nke a bụ maka na APGA kwadoro Onyeisiala Goodluck Jonathan bụ onyeisiala n'oge ahụ, dịka onye ga-azọrọ ha ọkwa onyeisiala.”
Ọ gara n’ihu kwuo na APGA ga-akwado pati All Progressives Congress (APC), maka na gọọmenti ya na gọọmentị etiti na-arụkọ ọrụ ọnụ nke ọma.
Gọvanọ Soludo, kọwara na Onyeisiala Bola Tinubu arụọla ọrụ nke ọma kemgbe ọ batara n'ọchịchị n'afọ 2023 ma kwuo na ọ bụ n’ihi ya ka o ji akwado ya na ntuliaka afọ 2027.
Akụkọ ndị ga-amasị gị:
Charles Soludo: Ka o si gaa dịka e duru Soludo iyi ọrụ agba nke abụọ
Onyeisiala Tinubu alaghachitela Naịjirịa dịka o mechara njem ọrụ na mba UK
Gịnị mere Soludo ji napụ Bianca Ojukwu echichi e chiri ya?
21 Maachị 2026Ịran atụọla ogbunigwe n’ogige ndịagha Amerịka na UK dị na Diego Garcia
Ebe foto si, Reuters
Mba Ịran atụọla ogbinigwe abụọ n’ogige ndịagha mba Amerịka na UK dị na Diesgo Garcia.
Akụkọ kwuru na mwakpo ahụ mere tupu Amerịka kwuo na ha ga-eji ogige ndịagha mba UK rụọ ọrụ, emebighị ihe ọbụla.
N’aka nke ọzọ mba Ịran kwuru na ogige ngwa nuklịa ha dị na Natanz bụ nke a na-achọ ịwakpo ma kwuo na enweghị nsogbu ọbụla ga-adakwasị ndị nọ ya nso.
Nke a na-abịa dịka mịnịsta na-ahụ maka mmekọ mba ofesi mba Ịran bụ Abbas Araghchi kwuru na enweghị ihe na-egosi na Amerịka chọrọ ịkwụsị mwakpo ha na-awakpo mba Ịran n’agbanyeghị na Onyeisiala Trump kwuru n amba Amerịka chọrọ ịkwụsị agha ahụ.
Onyeisiala Trump kwukwara na Amerịka ga-akwụsịtụ Mmachi ha machiri mmanụ agbidi mba Ịran tọrọ n’osimiri iji belata oke ọnụahịa mmanụ ụgbọala nke agha a butere n’ụwa niile.
Akụkọ ndị ọzọ ga-amasịkwa gị:
Ịran ọ ga-emerinwu mba Amerịka?
Ayatollah Khamenei: Ihe mere Afrịka ji akpachapụ anya n'ihe na-eme ugbua
Onye bụ Mojtaba Khamenei, onye ndu kachasị elu n'Iran a họpụtara ọhụrụ?
Ebe foto si, US National Archives
21 Maachị 2026Ogbunigwe ‘droonu’ mba Rọshia awakpola ma gbuo mmadụ abụọ na mba Yukren
Ebe foto si, Reuters
Mmadụ abụọ anwụọla na mwakpo ogbunigwe droonu mba Rọshịa tụrụ n’ụlọ obibi dị n’obodo Zaporizhzhia dị na mba Yukren.
Ụmụaka abụọ dị afọ iri na otu (11) na iri na ise (15) merụkwara ahụ na mwakpo mere dịka ndị nnọchiteanya mba Amerịka na mba Yukren na-akwado inwe mkparịtaụka ọhụrụ n’Amerịka banyere esemokwu dị n’etiti mba Yukren na Rọshịa.
A kwụsịtụrụ mkparịtaụka ịkwụsị agha ahụ kemgbe agha Amerịka na Izrel na-ebuso mba Ịran malitere n’ọnwa Febụwarị.
Onyeisiala Volodymyr Zelensky mba Yukren chọrọ ka ndị nnọchiteanya ya kpaa maka mkpebi Amerịka kpebiri ịkwụsị mmachi ha machiri mmanụ agbidi si mba Rọshịa nke Amerịka kwuru ha mere iji belata ọnụahịa mmanụ ụgbọala n’ụwa niile.
Mkparịtaụka udo Amerịka haziri enwebeghị ike ịkwụsị agha dị na Yukren maọbụ gbanwee ụfọdụ ihe mba Rọshịa chọrọ, n’agbanyeghị nke a, e nwere olileanya na mkparịtaụka a ga-amịta mkpụrụ.
Akụkọ ndị ọzọ i nwereike ịgụ:
ADC ajụla usoro ntuliaka ọhụrụ Inec hazigharịrị
A na-achọ nwafọ mba Rọshịa achọ n'ebubo ikesa onyonyo mmekọ ahụ ya na ụmụnwaanyị Gana n'ịntanetị
E gbuola minista na-ahụ maka nnyopụta nchekwa n'Ịran, Esmail Khatib
21 Maachị 2026Onyeisiala Ruto na Museveni amalitela ịrụ okporo ụgbọoloko ọhụrụ ga-ejikọ mba Kenya na Yuganda
Ebe foto si, State House Kenya
Onyeisiala Yoweri Museveni mba Yuganda na Onyeisiala William Ruto mba Kenya amalitela ịrụ okporo ụgbọoloko ‘Standard Gauge Railway (SGR)’ ọhụrụ ga-esi m[aghara Kisumu wee ruo okeala Kenya na Yuganda dị na Malaba.
Okporo ụgbọoloko ahụ ogologo ya dị 107km, ga-emezu okporo ụgbọoloko ogologo ya dị 1,000 jikọtara mpaghara Mombasa mba Kenya na Malaba.
Ọrụ ahụ nke a kwụsịrị kemgbe afọ 2019 dịka mba Chaịna kwụsịrị ibinye Kenya ego tinyere na ụfọdụ ndị mba Kenya kọwara ya dịka okporo oloko na-enweghị uru ọ bara oge o kwụsịrị na Suswa dị nso na Nairobi isiobodo mba Kenya.
Ebe foto si, State House Kenya
Na mmalite izuụka a, Kenya malitere ịrụ okporo si Suswa gawa Kisumu nke ogologo ya dị 264km nke nyere ohere ka mba abụọ ahụ malite ịrụ okporo ahụ n’ụbọchị Satọde 21 Maachị, 2026.
Onyeisiala Museveni kwuru na ọ chọrọ okporo ahụ bata n’ime Yuganda nke ọma ebe Onyeisiala Ruto nabatara atụmatụ ka okporo ahụ gafee karịa okeala iji hu na ọ baara mba Yuganda na Kenya ezi uru.
A na-ekwu na okporo ụgbọoloko ọhụrụ a ga-enyere kak na mbubata nakwa azụmahịa na mba Yuganda, Rụwanda, Burundi, Saụt Sudan, DR Kongo nakwa mba CAR.
Akụkọ ndị ọzọ ga-amasị gị:
Ihe ndị dị na nnyocha Amerịka mere banyere ogbugbu ndị ụka Kraịst na Naịjirịa
A na-akpagbu ndị ụka Kraịst na Naịjirịa dịka Trump siri kwuo?
Mwakpo ahụ e jiri gbuo ọtụtụ mmadụ na Borno Steeti dị ezi mwute – Gọvanọ Babagana Zulum
Ebe foto si, State House Kenya
21 Maachị 2026Amerịka chọrọ ịkwụsị agha Ịran mana mba ndị ọzọ ga-eso chekwaa awara mmiri Hormuz – Onyeisiala Trump
Ebe foto si, Getty Images
Onyeisiala mba Amerịka bụ Donald Trump ekwuola na mba Amerịka nwere echiche ịkwụsị agha Ịran ma kwuo na mba ndị ọzọ ga-enyere aka chekwa awara mmiri Hormuz bụ ebe e si ebuga mmanụ agbidi na mba dị iche iche.
Mana mịnịsta mba Ịran na-ahụ maka mmekọ mba ofesi bụ Abbas Araghchi kwuru na enweghị ihe ọbụla gosiri na Amerịka chọrọ ikwụsị agha ahụ.
Araghchi kọwara na ihe Ịran chọrọ abụghị ịkwụsịtụ agha ahụ kama na ọ bụ ịkwụsị ya kpam kpam.
Amerịka kwukwara na ha dị njikere ịkagbu mmachi ha machiri mmanụ agbidi mba Ịran tọrọ n’osimiri iji belata mmetụta agha a na-enwe n’ọnụahịa mmanụ ụgbọala n’ụwa niile.
Mana akụkọ ọzọ kwuru na Ịran tụrụ ogbunigwe abụọ na mpaghara Diego Barcia mana ogbunigwe ahụ emetụtaghị ogige ndịagha Amerịka na UK dị na Chagos Islands.
Akụkọ ndị ọzọ banyere gị:
Njem Onyeisiala Tinubu n'obi eze Windsor
City Boy Movement: Kedụ ndị a ma ama n'Ọwụwa Anyanwụ Naịjirịa so na ya?
Kedụ ihe ndị nwereike ime ka mmadụ daa ma nwụọ n'otu ntabi anya na mberede?
21 Maachị 2026Anambra Steeti bụ steeti kacha nwee udo na Naịjirịa, anyị ekpochapụla ogige ndị omekome ruru 60 – Gọvanọ Soludo
Ebe foto si, ABS Awka
Gọvanọ Charles Soludo na-achị Anambra steeti ekwuola na gọọmenti ya ekpochapụla ogige ndị omekome ruru 60 na steeti ahụ ma mee ka Anambra bụrụ steeti kachasị nwee udo na Naịjirịa taa.
Gọvanọ Soludo gbara nke a na-anwụ na mkparịtaụka ‘media chat’ o mere n’ụbọchị Fraịde 20 Maachị, 2026 ma kwuo na ọchịchị enwetela udo n’opkuruọchịchị asatọ ma mekwaa ka ọtụtụ mmadụ malite ịbata na steeti ahụ n’oge mmemme ekeresimesi nakwa mmemme ndị ọzọ.
N’okwu ya “Anyị enwebeghị akụkọ mwakpo maọbụ mkpamkpa ndị omekome ọbụla kemgbe ọnwa anọ n’Anambra steeti, nke bụ eziokwu bụ na Ekeresimesi a gara aga bụ nke kachasị tọọ ụtọ maka na ọtụtụ mmadụ ruru otu natị puku mere njem n’Anambra steeti”.
Ọ gara n’ihu kwuo na ọnọdụ onye apụtala ezi ndị otu Indegenous People of Biafra (Ipob) manyere n’Ọwụwa anyanwụ Naịjirịa kemgbe, abụrụla ihe a kwụsịrị na steeti ya.
O mere ka o doo anya na ụlọakwụkwọ, ụlọ azụmahịa, ụlọakụ nakwa ọtụtụ ụlọorụ ndị ọzọ dị iche iche amalitela ịrụ ọrụ etu ha si arụbu na mbụ.
Gọvanọ Soludo kọwakwara na gọmenti ya amapụtala iwu dị iche iche ma hiwe ndị ọrụ nchekwa Agunaechemba nakwa Udogachi iji hụ na e buru agha megide ndị omekome, ndị otu nzuzo nakwa ndị ọrụ agboro.
Akụkọ ndị ọzọ ga-amasị gị:
Chuck Norris na-eme ejije anwụọla ka ọ gbachara afọ 86
Mwakpo ahụ e jiri gbuo ọtụtụ mmadụ na Borno Steeti dị ezi mwute – Gọvanọ Babagana Zulum
Lee iwu mba Senịgal dara CAF jiri kpebie ịnapụ ha iko AFCON 2025
21 Maachị 2026Ụtụtụ ọma ndị be anyị
Anyị ji obi aṅụrị anabata gị n'ọgbakọ BBC News Igbo taa bụ Satọde 21 Maachị, 2026.
Gaa n'ihu sọnyere anyị maka akụkọ mere n'ala Igbo, na Naịjirịa, n'Afrịka nakwa n'ụwa dum gbaa gburugburu.
Sonyekwara anyị na Facebook, Instagram nakwa WhatsApp chanelụ maka akụkọ ndị ahụ na-amasị gị.
Ndewo!
20 Maachị 2026Anyị enyeghị Amerịka ogige ndịagha anyị iji lụsa Ịran ọgụ - Briten
Ebe foto si, Getty Images
Briten ekwenyela ka Amerịka jiri ụfọdụ ebe n'ime ogige ndịagha ha, mana ha kwuru na a ga-eji ya maka "nchekwa onwe" megide mwakpo a na-eme ngwaagha ndị Ịran.
Praịm Minista mba Briten bụ Keir Stermer kwuru na Briten mụtara ihe na "mmejọ ndị e mere n’agha Ịrak" nke mere na ha esonyeghị n’atụmatụ ịwakpo Ịran.
A mabeghị ihe Amerịka ga-eji RAF Fairford dị na UK mee, mana enweela mmụba n’ọrụ ndị Amerịka n’ọdọụgbọelu Gloucestershire, ebe a hụrụ na uụgbọelu ndị e ji atụ ogbunigwe na-afetu ma na-efeli.
Nke a na-abịa dịka Minista Ịran na-ahụ maka mba ofesi gwara Briten na ikwere ka Amerịka jiri ogige ndịagha ya mee ihe pụtara "ịbanye n'agha."
Abbas Araghchi kpọrọ onye ogbo ya bụ Yvette Cooper nke Briten, ma gwa ya na enyemaka ọbụla Briten nyeere Amerịka nwereike "ime ka ọnọdụ ahụ ka njọ.”
Akụkọ ndị ọzọ ga-amasị gị:
* Mwakpo ahụ e jiri gbuo ọtụtụ mmadụ na Borno Steeti dị ezi mwute – Gọvanọ Babagana Zulum
* Chuck Norris na-eme ejije anwụọla ka ọ gbachara afọ 86
20 Maachị 2026Ndị uweojii anwụchiela ndị na-ahazi emume Ekene maka imegbu ụmụnwaanyị na Delta Steeti
Ebe foto si, Edafe Bright/X
Ndi uweojii na Delta steeti ekwuola na ha anwụchiela mmadụ isii maka mmetọ ụmụnwaanyị na steeti ahụ.
Otu n’ime ndị ha nwuchiri bụ onye a kpọrọ Omorede Sunday, onye e boro ebubo na ọ bụ ya bụ onye nhazi emume Ekene.
Iwe ndi mmadu kpaliri ka a chọputara na mmemme ahu na-enye ụmụnwoke ohere imegbu ụmụnwaanyị na Delta steeti.
Ọtụtụ ihe onyonyoo e setere n'emume Ekene Festival ndị obodo Ozoro fesara na soshal midịa gosiri ebe a na-emegbu ụmụnwaanyị.
Ihe onyonyoo ndị ahụ na-egosi etu ụmụnwoke si na-adọka uwe ụmụnwaanyị. Ha na-adọpụtakwa ụfọdụ nọ n'ime keke na ndi nọ n'elu ọgbaatumtum.
Ihe onyonyoo ahụ na-akpasu iwe mere ka Kọmịshọna ndị uweojii na Delta Steeti nye iwu ka e nyochaa okwu gbasara idina ụmụnwaanyị n'ike nke a na-ekwu na ọ mere n'oge emume Ekene na steeti ahụ.
N’ozi ọnụ na-ekwuchitere ndị uweojii na Delta Steeti bụ Bright Edafe wepụtara, ọ rịọrọ ndị nwere ozi nwereike inyere ha aka na nnyocha ha ka ha nwete ya.
O kwukwara na e jidela onyeisi obodo na onye isi haziri emume ahụ, bụ Omorede Sunday, na mmadụ anọ ọzọ a na-enyo enyo si na mpaghara Oramudu.
Bright Efe sị na Kọmishọna ndị uweojii "enyeela iwu ka-emee ngwangwa nyefee okwu ahụ n'aka ngalaba ndị uweojii CID.
Kọmishọna ndị uweojii kwere nkwa na a ga-anwụchi onye ọbụla aka ya dị n'okwu a ma nye ha ahụhụ kwesịịrị ha.”
Akụkọ ndị ọzọ ga-amasị gị:
* Chuck Norris na-eme ejije anwụọla ka ọ gbachara afọ 86
* Mwakpo ahụ e jiri gbuo ọtụtụ mmadụ na Borno Steeti dị ezi mwute – Gọvanọ Babagana Zulum
20 Maachị 2026O nweghị ihe ọhụrụ Atiku, Obi na Amaechi ji na-abịa – Ali Ndume
Ebe foto si, Ali Ndume/Facebook
Onye omeiwu na-anọchite anya Borno South n’Ụlọomeiwu Etiti Naịjirịa bụ Ali Ndume egosila ntụkwasịobi na pati ya bụ All Progressives Congress (APC).
Ndume kwuru na obi siri ya ike na APC ga-enweta mmeri ma gaa n’ihu jide ọkwa onyeisiala ma ọ bụrụ na a hazichaa ntuliaka afọ 2027.
Dịka o siri kwuo, pati African Democratic Congress (ADC) na-agba gọọmenti ụkwụ, nke ndị nọ n’isi ya bụ Atiku Abubakar, Peter Obi na Rotimi Amaechi enweghị ihe ọhụrụ ọbụla ha ji na-abịa ịma Onyeisiala Bola Tinubu aka n’ihu.
Sịnetọ ahụ kwuru nke a n’ụbọchị Tọzde 19 Maachị 2026, oge ọ na-aza ajụjụ ndị ntaakụkọ n’otu ihe omume a haziri n’ụlọmgbasaozi Channels TV.
Ka o sina dị, o kwuru na a gaghị eleda ndị ADC anya.
Akụkọ ndị ọzọ ga-amasị gị:
* Ihe mwakpo mere Peter Obi na Edo steeti
* Ndị ọrụ DSS anwụchiela otu nwoke maka mwakpo a wakporo Peter Obi na ndị ọzọ n'Edo steeti
* ADC, NNPP na otu ndọrọndọrọ na-anọghị na gọọmenti ajụla iwu ntuliaka 2026
20 Maachị 2026Ogbunigwe Izrel egbuola opekatampe mmadụ 1,001 na Lebanọn
Ebe foto si, Ogbunigwe Izrel egbuola opekatampe mmadụ 1,001 na Lebanọn
Ndị mgbasaozi Lebanọn kọrọ na Izrel emerụọla ụfọdụ mmadụ ahụ ka ha wakporo obodo ndị nọ na ndịda n'ụtụtụ a.
Ozi ahu kọrọ na ụgbọelu agha Izrel wakporo obodo Bafliya na Hanin na mpaghara Tyre na Bint Jbeil n'isi ụtụtụ taa.
Ndị na-ahụ maka ahụike na Lebanon kwupụtara na mwakpo Izrel na-eme egbuola opekatampe mmadụ 1,001 kemgbe ụbọchị nke abụọ n'ọnwa Maachị.
Ozi ahụ gbakwunyere na n'ime ndị e gburu gụnyere ụmụnwanyị iri asaa na itoolu (79), ụmụaka otu narị na iri na asatọ (118), na ndị ọrụ ahụike iri anọ (40), ebe mmadụ puku abụọ, narị ise na iri asatọ na anọ (2,584) ọzọ merụrụ ahụ.
Akụkọ ndị ọzọ ga-amasị gị:
* Abụ m osiite na-eme ihe ọchị - Cruise With Joe
* Mwakpo ahụ e jiri gbuo ọtụtụ mmadụ na Borno Steeti dị ezi mwute – Gọvanọ Babagana Zulum
* Onyeisiala Tinubu alaghachitela Naịjirịa dịka o mechara njem ọrụ na mba UK
20 Maachị 2026DR Congo na Rụwanda ekwetela ịkwụsitu esemokwu, dịka ha na Amerịka nwechara mkparitaụka
Ebe foto si, AFP via Getty Images
Mba Democratic Republic of Congo na Rụwanda ekwetela na ha “ga-agba mbọ” iji mee ka esemokwu kwụsịtụ dịka Amerịka kpọkọtara ha ka e bido okwu udo na Washington.
Ọgbaaghara dị n’Ọwụwa Anyanwụ DR Congo agaala n’ihu n'agbanyeghị na mba abụọ a bịanyere aka n'akwụkwọ nkwekọrịta udo n'afọ gara aga, bụ nke onyeisiala Amerịka bụ Donald Trump hiwere.
Mkpebi iji belata esemokwu ahu bịara dịka mba Amerịka nọọrọ na mmalite ọnwa a nye ndịagha Rụwanda na ndị isi ọchịchị anọ ntaramahụhụ, n’ihi ebubo na obodo Rụwanda na-akwalite esemokwu ahụ site n’ịkwado ndịagha nnupụisi M23.
Ozi mba DR Congo, Rụwanda na Amerịka jikọrọ aka zipu kwuru na ha “ekwetela isoro ọtụtụ ụzọ iji belata esemokwu na ịkwado ọganihu”.
Ha kwere nkwa na ha ga-akwanyere ọchịchị na ókèala ibe ha ùgwù, ebe Rụwanda ga-ewepụ ndịagha ha “ma kwụsị ịhazi nchekwa... n'ebe ụfọdụ akọwapụtara n'ókèala DR Congo”, ka ozi ahụ kwuru.
Akụkọ ndị ọzọ ga-amasị gị:
* Mwakpo ahụ e jiri gbuo ọtụtụ mmadụ na Borno Steeti dị ezi mwute – Gọvanọ Babagana Zulum
* Iwu mba Senịgal dara CAF jiri kpebie ịnapụ ha iko AFCON 2025
* Abụ m osiite na-eme ihe ọchị - Cruise With Joe
20 Maachị 2026Ka anyị jiri emume Eid afọ a kpeere Naịjirịa ekpere - Tinubu
Ebe foto si, Bayo Onanuga
Onyeisiala Naịjirịa bụ Bola Tinubu akpọọla oku ka ndị ndu okpukperechi Alakuba were ụbọchị emume Sallah kpee ekpere maka udo na mmepe ga-adịgide adịgide na Naịjirịa.
Tinubu mere ka a mata nke a n’ozi ezumike Sallah, ọnụ na-ekwuchitere ya bụ Bayo Onanuga tinyere aka na ya, bụ nke o jiri kpọọ oku maka nnukwu ịhụnanya maka Naịjirịa nakwa onye niile.
Ọ gbara ndị Alakụba nọ na Naịjirịa ume ka ha gaa n’ihu na-amụta ihe site na nkụzi nke ọnwa nso, bụ nke kwalitere “okwukwe, ọmịiko na ịdịnotu n’etiti ndị okpukperechi ahụ.”
“O nwere ọtụtụ ihe mmụta dị n’ọnwa nke Ramadan, ọkachasị n’oge a. Anyị kwesịrị imejupụta ihe niile anyị mụtara gbasara nkwado, nnagide na ọmịiko, ọbụnadị ka e buchara ọnụ Ramadan,” ka Onyeisiala kwuru.
Tinubu kpọkwara oku ka ndị Alakụba niile nọ na Naịjirịa gosi ịhụnaanya na ọmịiko nye mmadụ niile, site n’inyere ndị ụwa na-atụ n’ọnụ aka n’agbanyeghị okpukperechi ha, n’ihi na dịka o siri kwuo, nke a ga-ewetakwu ịdịnotu n’etiti ụmụafọ.
Akụkọ ndị ọzọ ga-amasị gị:
* Onyeisiala Tinubu alaghachitela Naịjirịa dịka o mechara njem ọrụ na mba UK
* Mwakpo ahụ gburu ọtụtụ mmadụ na Borno Steeti dị ezi mwute – Gọvanọ Babagana Zulum
* E gbuola minista na-ahụ maka nnyopụta nchekwa n'Ịran, Esmail Khatib
20 Maachị 2026ADC akatọọla ndị wakporo ọgbakọ ha n’Alesa dị n’Eleme, Rịvas steeti
Ebe foto si, ADC/X
Otu ndọrọ ndọrọ ọchịchị All Democratic Party, ADC akatọọla ihe mere n’oge ha na-eme ọgbakọ n’Alesa dị n’Eleme Rịvas steeti.
Onyeisi oche ADC na steeti ahụ bụ Leader Sampson gwara BBC Igbo n’ekwenti na ọ bụ eziokwu na a wakporo ha ma kwuo na o mere n’ihe dịka elekere nke isii n’abalị garaaga.
Sampson sị na otu patị ha ka na-eme nnyocha banyere ihe mere, mana ha ga-agwa ohanaeze okwu.
N'aka nke ọzọ, ndị na-achọghị ka a kpọọ aha ha kwuru na ndị wakporo ọgbọka ndị ADC ahụ mebichara ọtụtụ ihe njirimara ADC ma chụsasịa ndị bịara ọgbakọ ha.
Ọ sị na ndị ahụ boro ndị ADC ebubo enweteghị ikike ịnọ n’ebe ha nọ na-eme ọgbakọ ahụ.
Cheta na udiri ihe a emeela n'oge garaaga n’obodo a na-akpọ Igwuruta n'otu Rịvas steeti ahụ na nsonso a.
Akụkọ ndị ọzọ ga-amasị gị:
* Mwakpo Maiduguri: Mmadụ 23 nwụrụ,103 merụọ ahụ- Ndị uweojii
* Charles Soludo: Ka o si gaa dịka e duru Soludo iyi ọrụ agba nke abụọ
* Naịjirịa, Briten yiri onwe ha n'ihe gbasara mmepe - Tinubu
20 Maachị 2026Gọvanọ Otti akwadola ahụike onye agha Naịjirịa so jide omekome “Osisikankwu”
Ebe foto si, Abia state govt
Gọvanọ Alex Otti nke Abia steeti enyela onye agha Naịjirịa so na ndị jidere omekome ‘Osisikankwu’ n’afọ 2010 nnukwu nkwado.
Osisikankwu bụ onye omokome mekpara Abia steeti ahụ, na-atọrọ ndị mmadụ maka oge na-emekwa ajọ ihe dị icheiche tupu ndịagha ejide ya.
Onye agha ahụ aha ya bụ Amoke Gunshot Simeon bụ onye Enugwu steeti mana ọ nọ n’ọrụ ndịagha Naịjirịa n’Aba n’ihe dịka afọ 2010 ruo 2014.
Ebe foto si, Abia state govt.
Nkọwa foto, Alex Otti na Amoke
Amoke mechere nwee ihe mberede okporoụzọ n’oge e zigara ya ọrụ na mpaghara ugwu Naịjirịa. Ihe mberede ahụ gbajiri ụkwụ akaekpe ya.
Gọvanọ Alex Otti bụ onye nabatara Amoke kwere ya nkwa iziga ya obodo onyibo bụ ebe ọ ga-anọ nweta ọgwụgwọ maka ahụ o meuru n’ụkwụ ya.
Otti kwuru na gọọmenti Abia steeti ga-akwụrụ ya ụgwọ niile banyere ọgwụgwọ ya, nyere ya aka nweta ezigbo ahụike.
Akụkọ ndị ọzọ ga-amasị gị:
* Mwakpo Maiduguri: Mmadụ 23 nwụrụ,103 merụọ ahụ- Ndị uweojii
* Charles Soludo: Ka o si gaa dịka e duru Soludo iyi ọrụ agba nke abụọ
* Naịjirịa, Briten yiri onwe ha n'ihe gbasara mmepe - Tinubu
20 Maachị 2026Naịjirịa iso n’ebe ndị na-eyi ọha egwu kacha akpa mkpamkpa dị njọ - Peter Obi
Ebe foto si, Peter Obi / X
Nkọwa foto, Peter Obi
Peter Obi bụ onye jibu otu ndọrọndọrọ ọchịchị Lebọ Patị zọọ ọkwa Onyeisiala Naịjirịa n’afọ 2023 akatọọla etu Naịjirịa sị soro na mba ebe ndị na-eyi ọha egwu kacha akpa mkpamkpa n’ụwa niile.
Obi mere ka a mata nke a n’ozi o kesara n’akara soshal mịdịa ya ma kọwaa ya dịka ị da mba ndị nọ n’ọchịchị.
N’okwu ya “ndekọ ndị Global Terrorism Index wepụtara nke gosiri na Naịjirịa so na mba ndị na-eyi ọha egwu kacha akpa mkpamkpa n’ụwa niile, dịka ebe igwe mmadụ nwụrụ maka mwakpo ndị ahụ bụ ihe nwute nakwa ị da mba ndị ndu”.
“Dịka mkpamkpa ndị na-eyi ọha egwu na-ebeleta n’ọtụtụ mba, mana nke Naịjirịa na-akanwanyenjọ”.
“Nke a na-egosi na ndị ndu hapụrụ ihe ha kwesiri ime na-eme ihe ọzọ, ọchịchị dara mba, mpụ na nrụrụaka, usoro iwu adịghị nakwa nlelianya n’ihe gbasara nchekwa”.
“Naịjirịa na-anwụ oge niile mana ndị nọ n’ọchịchị na-eme oriri na nkwari.”
Peter Obi gara n’ihu jụọ kedụ ihe bụ ọchịchị gọọmenti ma ọ bụrụ na e nwezuga ichekwa ndụ na akụnụba? Ọzọ bụ kedụzịa etu ajọ ihe si dị ka ọ bụ omenaala ugbua?.
“Nke a abụghị udiri Naịjirịa anyị niile ga-anabata".
Akụkọ ndị ọzọ ga-amasị gị:
* Mwakpo Maiduguri: Mmadụ 23 nwụrụ,103 merụọ ahụ- Ndị uweojii
* Charles Soludo: Ka o si gaa dịka e duru Soludo iyi ọrụ agba nke abụọ
* Naịjirịa, Briten yiri onwe ha n'ihe gbasara mmepe - Tinubu
20 Maachị 2026Ụmụ Igbo ekelee oooh!
Anyị ji obi aṅụrị anabata unu n'ọgbakọ BBC News Igbo taa.
Gaa n'ihu nọnyere anyị maka inweta akụkọ ndị mere n'ala Igbo, na Naịjirịa, n'Afrịka nakwa n'ụwa dum gbaa gburugburu.
E chefukwala isonyere anyị na Facebook, Instagram nakwa WhatsApp chanelụ maka akụkọ ndị ahụ na-amasị gị.
Nnọọ!
19 Maachị 2026Ndị ojiegbe agbagbuola ndị uweojii atọ, onye nche na Taraba Steeti
Ebe foto si, Getty Images
A gbagbuola opekatampe ndị uweoji atọ n'ime obodo Tordamisa nke dị n'okpuru ọchịchị ime obodo Donga na Taraba Steeti.
Ndị ojiegbe ahụ gbagbukwara onyeisi ndị nche n'obodo Tordamisa dị afọ iri isii.
E kwupụtara nke a n'akwụkwọ ozi onye na-arụgodu ọrụ ka ọnụ na-ekwuchitere ndị uweojii Taraba Steeti bụ Victor Mshelizah wepụtara.
Dịka ozi ahụ siri kwuo, ndị uweojii jiri ọsọ zọchie na mpaghara ahụ site n'oku gbatagbata Zaki Orbanga, onye bi na Tordamisa, n'ime Wọọdụ Akate kpọrọ na ndị a na-enyo na ha bụ ndị ojiegbe awakpoola obodo Tse Kwe.
Akụkọ ndị ọzọ ga-amasị gị:
* Mwakpo Maiduguri: Mmadụ 23 nwụrụ,103 merụọ ahụ- Ndị uweojii
* Charles Soludo: Ka o si gaa dịka e duru Soludo iyi ọrụ agba nke abụọ
* Naịjirịa, Briten yiri onwe ha n'ihe gbasara mmepe - Tinubu
Kọmịshọna ndị uweojii bụ Betty Enekpen, gosipụtara nnukwu mwute maka ọnwụ ndị uweojii na onye nche obodo ji ndụ ha chuọ àjà ka ha na-echebe steeti nakwa mba niile n'ozuzuoke.
Ụlọọrụ ndị uweojii ahụ zigaara ezinaụlọ ndị ahụ nwụrụ anwụ ozi nkasi obi, ma gwa ha na a gaghị echefu àjà ha chụrụ.
Ka ọ dị ugbua, e meela ka nchekwa sikwuo ike n'ebe ahụ, dịka a na-agba mbọ ịchọta ma nwuchie ndị mere mwakpo ahụ.
Ndị isi nchekwa na-arịọ ndị mmadụ ka ha nọrọ jụụ, nwee ndidi, ma nọgide na-akwado ndị uweojii na ndị nchekwa ọzọ site n'inye ozi ziri ezi na nke ga-enye aka inwuchi ndị mere mpụ ahụ.