Okwu atọ Buhari ji 'wụọ Naịjirịa n'ala' na mba ofesi

Kwa mgbe kwa mgbe, onyeisiala Naịjirịa bụ Muhammadu Buhari na-eme ihe ndị Naịjirịa na-eji akpụ ya n'ọnụ.

Ụfọdụ oge, a na-akpụ ya n'ọnụ maka ihe dị mma, ebe ụfọdụ oge ọ bụ maka okwu na-edoghị ndị mmadụ anya ka eji akọ maka ya.

Ndị mmadụ kwuru na ọ na-ebutere ndị Naịjirịa mkparị ụfọdụ oge site n'ụfọdụ ihe ndị a ọ na-ekwu ma agbaa ya ajụjụ ọnụ maọbụ o kwuo okwu na nzukọ ndị mba ofesi.

BBC Igbo na-ewetara gị ugboro atọ Buhari kwuru ụdịrị okwu a.

Ndị ntorobịa Naijirịa gosiri iwe ha n'ihe onyeisiala bụ Muhammadu Buhari kwuru n'ọgbakọ Commonwealth e nwere na Westminister, Lọndọn, ụbọchị Wenesde ebe o kwuru na ndị ntorobịa Naijiria adịghị ike ọrụ.

Ihe ndị Buhari kwuru

Ka Buhari gara London maka nzukọ ndị ọchịchị mba ndị nọ n'okpuru Commonwealth, O kwuru na ndị ntorobịa Naịjirịa dị umengwụ.

O kwuru na "Pasentị iri isii n'ime mmadụ dị nde 180 n'ọnụọgụgụ, erubeghị afọ iri atọ ọtụtụ n'ime ha agabeghị akwụkwọ, mana ha na-ekwu na Naịjirịa bụ mba na-emeputa mmanụ, n'ihi ya, ha achọghị ime ihe ọbụla, mana ha chọrọ ịnweta ụlọ, nletaahụike na agụmakwụkwọ na-etufughi ego ọbụla."

2. Ọnọdụ nwunye m bụ n'usekwu

Ọtụtụ ndị mmadụ agaghị echefu oge Buhari kwuru na nwunye ya bụ Aisha enweghị ọnụ n'ime ihe na-eme n'otu pati APC.

O kwuru nke a oge ọ gara njem nleta na Germany n'afọ 2016.

O kwuru na "o nwere ọnụ naanị n'usekwu m, n'obi m na ọnụụlọ nke ọzọ"

3. Mpụ juru na Naịjirịa

Oge David Cameron bụ praịm minista ndị Britain n'afọ 2016, o kwuru na "mpụ na nrụrụaka juru na Naịjirịa nke ukwuu".

Ihe a kpasuru ndị Naịjirịa iwe, mana nke kacha wee ndị mmadụ iwe bụ na Buhari gwara ndị ntaakụkọ na o kwenyere n'ihe Cameron kwuru.

Akụkọ ndị ga-amasị gị: