Boko Haram 'ta kafa tuta' a wasu kauyuka uku a Borno

Wata majiyar soji da fararan hula na cewa mayakan Boko Haram sun kafa tutocinsu a wasu kauyuka uku a jihar Borno da ke Arewa maso Gabashin Nigeria.

Mazauna yankin sun shaida wa BBC cewa mayakan sun yanka mutane takwas, ciki har da wani dagaci, a lokacin da suka hare-haren a yammacin ranar Litinin.

Kauyukan na Kubirivour, Boftari and Kuburmbalah na kusa da garin Chibok ne, inda aka sace 'yan makaranta fiye da 200 a 2014.

Akalla mutane 17 ne aka jikkata a hare-haren.

Wata majiya ta ce har yanzu mayakan Boko Haram na rike da garin Malam Fatori, wanda ke kan iyakar Najeriya da Nijar.

A ranar Lahadi ne, sojojin Najeriya suka kwato garin daga hannun mayaka.

Sai dai rahotanni sun ce sun sake damara inda suka sake kwace iko da garin.

Wakilin BBC a Najeriya ya ce hare-haren na baya-bayan nan na nuna yadda har yanzu kungiyar ta Boko Haram ke ci gaba da zama barazana ga kasar.