અમેરિકાના લૉસ એંજલસમાં ભીષણ દાવાનળ, એક લાખ લોકોને ઘર છોડવાની ફરજ પડી, 50 અબજ ડૉલરના નુકસાનનો અંદાજ

ઇમેજ સ્રોત, Getty Images

ઇમેજ કૅપ્શન, ઇટન ફાયરમાં સળગી રહેલાં ઘરોમાંથી તીવ્ર પવનને કારણે ચિનગારીઓ ઊડી રહી હતી
વાંચવાનો સમય: 3 મિનિટ

ગત મંગળવારથી અમેરિકાના લૉસ એંજલસમાં કેટલાક પરા વિસ્તારોમાં ફાટી નીકળેલ ભારે દાવાનળથી સ્થાનિકો અને સરકાર માટે મુશ્કેલ પરિસ્થિતિ સર્જાઈ છે.

દાવાનળને કારણે હજારો લોકોને પોતાનાં ઘરો છોડવાની ફરજ પડી છે.

અગ્નિશામકદળના કર્મચારીઓ આગ પર કાબૂ મેળવવાનો પ્રયાસ કરી રહ્યા છે. ખૂબ જ ઝડપથી બદલાતી જતી પરિસ્થિતિને સાન્ટા એના પવનો અને અત્યંત સૂકા હવામાનની સ્થિતિએ વધુ વિકટ બનાવી દીધી હતી. અધિકારીઓના જણાવ્યાનુસાર હાલ આગ પર કાબૂ મેળવવાની કોઈ શક્યતા દેખાઈ નથી રહી.

નોંધનીય છે કે લૉસ એંજલસમાં સૌથી પહેલા મંગળવારે સ્થાનિક સમયાનુસાર સવારના સાડા દસ વાગ્યાની આસપાસ દાવાનળ ફાટી નીકળ્યાના સમાચાર મળ્યા હતા. પેલિસેડ્સ આગમાં 16 હજાર હેક્ટર વિસ્તારમાં ફેલાઈ ગઈ હતી.

આ સિવાય અન્ય ત્રણ ક્લસ્ટરમાં ફાટી નીકળેલ આગને ઇટન, હર્સ્ટ અને વુડલી, ઓલિવાસ અને હોલીવૂડ હિલ્સ ફાયર નામ અપાયાં છે.

નોંધનીય છે કે પેલિસેડ્સ ફાયર જ્યાં ફાટી નીકળ્યો એ સ્થળોની આસપાસ હોલીવૂડની હસ્તીઓનાં ઘરો આવેલાં છે, જે આગમાં પ્રભાવિત થયાં હોવાનું કહેવામાં આવી રહ્યું છે.

આમ, કુલ ચાર સ્થળે ફાટી નીકળેલી આગમાં હજારો એકર વિસ્તારમાં રહેતા હજારો લોકો પ્રભાવિત થયા છે. આ દાવાનળમાં અત્યાર સુધી પાંચ લોકોનાં મૃત્યુ થયાંના તેમજ એક હજાર સ્ટ્રક્ચર બળીને ખાખ થઈ ગયાના સમાચાર મળી રહ્યા છે.

ચાર સ્થળે લાગેલી આગમાં પેલિસેડ્સ ખાતેની આગ અધિકારીઓના મત પ્રમાણે લૉસ એંજલસના ઇતિહાસમાં લાગેલી અત્યાર સુધી સૌથી ભયાનક અને નુકસાનકારક આગ સાબિત થઈ છે.

આ તમામ સ્થળોએ આગને કાબૂમાં લેવા માટે અગ્નિશામકદળના કર્મચારીઓ હાલ પાણીની તંગી પણ અનુભવી રહ્યા છે.

હવામાનની માહિતી આપતી એજન્સી ઍક્યૂવેધરે અંદાજો મૂક્યો છે કે આ દાવાનળને કારણે કૅલિફોર્નિયામાં 52 અબજ ડૉલરથી 57 અબજ ડૉલર સુધીનું નુકસાન થયું હોય શકે છે.

એક માહિતી પ્રમાણે અત્યારસુધીમાં એક લાખ 37 હજાર લોકોને સુરક્ષિત સ્થાને ખસેડવામાં આવ્યા છે.

ઇમેજ સ્રોત, Reuters

ઇમેજ કૅપ્શન, કૅલિફોર્નિયામાં પેસાડેના ખાતે એક ઇમારત ચારેતરફથી આગમાં લપેટાઈ ગઈ હોવાનું જોવા મળ્યું હતું

ઇમેજ સ્રોત, Getty Images

ઇમેજ કૅપ્શન, અત્યારથી લગભગ એક પહેલાં હોલીવૂડ હિલ્સમાં પણ આગ ફાટી નીકળી હતી, જેને લૉસ એંજલસના ફાયર ડિપાર્ટમેન્ટ દ્વારા આધિકારિકપણે 'સનસેટ ફાયર' નામ અપાયું છે. આ આગમાં હોલીવૂડ સ્ટાર પેરિસ હિલ્ટન અને બિલી ક્રિસ્ટલે તેમનાં ઘર ગુમાવ્યાંના અહેવાલ છે.

ઇમેજ સ્રોત, EPA

ઇમેજ કૅપ્શન, આગને કાબૂમાં લેવા માટે અગ્નિશામકદળના કર્મચારીઓએ હેલિકૉપ્ટર વડે કેમિકલ છાંટીને આગ ઓલવવાનો પ્રયાસ કરાયો હતો

ઇમેજ સ્રોત, Getty Images

ઇમેજ કૅપ્શન, લૉસ એંજલસના ખ્યાત વિસ્તારોમાં આવેલાં વૈભવી મકાનો આગમાં નામશેષ બની ગયાં

ઇમેજ સ્રોત, Reuters

ઇમેજ કૅપ્શન, લૉસ એંજલસના પશ્ચિમ વિસ્તારમાં પૅસિફિક પેલિસેડ્સ આસપાસનાં ઘરોમાં લાગેલી આગ બાદ વઘેલા કાટમાળમાં બળેલાં વૉશિંગ મશીન સામું તાકતાં પડ્યાં દેખાઈ રહ્યાં છે

ઇમેજ સ્રોત, Getty Images

ઇમેજ કૅપ્શન, ઇટન ફાયરમાં રાખ થયેલાં ઘરોની સામે બળેલી કારોનો ઢગલો જોઈ શકાય છે

ઇમેજ સ્રોત, Getty Images

ઇમેજ કૅપ્શન, પેસાડેનાની હેસ્ટિંગ્સ રૅન્ચ કૉમ્યુનિટીના વેલિલાઇટ્સ ડ્રાઇવ ખાતે ઘરોમાં લાગેલી આગ ઓલવવા મથી રહેલા ફાયરફાઇટર

ઇમેજ સ્રોત, Reuters

ઇમેજ કૅપ્શન, ઇટન ફાયરને કારણે અલ્ટાડેના વિસ્તાર ખાલી કરવો પડ્યો હતો, જ્યાં ફાટી નીકળેલા દાવાનળને જોઈ એક મહિલાએ આવી પ્રતિક્રિયા આપી હતી

ઇમેજ સ્રોત, Getty Images

ઇમેજ કૅપ્શન, દાવાનળની સ્થિતિને કારણે અસરગ્રસ્ત વિસ્તારોમાં 15 લાખ લોકો વીજળી સપ્લાય બંધ થયાની સ્થિતિનો ભોગ બન્યા હતા

ઇમેજ સ્રોત, Getty Images

ઇમેજ કૅપ્શન, મલિબુ દરિયાકાંઠે આવેલાં લક્ઝરી મકાનો આગમાં રાખ થઈ ગયાં હતાં

બીબીસી માટે કલેક્ટિવ ન્યૂઝરૂમનું પ્રકાશન

તમે બીબીસી ગુજરાતીને સોશિયલ મીડિયામાં Facebook પર , Instagram પર, YouTube પર, Twitter પર અને WhatsApp પર ફૉલો કરી શકો છો.