'Munyenyezi Béatrice ntiyize muri CEFOTEC' – Umushinjacyaha

Mu rubanza rw'ubujurire rwa Béatrice Munyenyezi mu rugereko rw'urukiko rukuru rukorera i Nyanza mu majyepfo y'u Rwanda, ubushinjacyaha buvuga ko iperereza bwakoze ryagaragaje ko Béatrice Munyenyezi atize mu ishuri ryisumbuye rya CEFOTEC mu mwaka w'amashuri 1992-1993 nk'uko we yabibwiye urukiko.

Umushinjacyaha avuga ko mu bimenyetso bishya yashyize muri dosiye y'urubanza rwa Munyenyezi ari iperereza ryakozwe ku mashuri yisumbuye Munyenyezi avuga ko yizemo.

Yifashishije umwe mu banyeshuri bize ku kigo cya CEFOTEC wize mu ishuri Munyenyezi avuga ko yigagamo, umushinjacyaha avuga ko ibyo Munyenyezi yashyikirije urukiko atari ukuri.

We avuga uwo munyeshuri afite indangamanota igaragaza ko yagize umwaka wa 4 mu ishuri kandi na Munyenyezi akagaragaza ko ari wo mwanya yagize ku ndangamanota (bulletin) na we yahaye urukiko.

Munyenyezi agaragaza ko mu mwaka w'amashuri 1992-1993 yigaga muri CEFOTEC i Butare ariko umushinjacyaha akavuga ko atari byo, ko atigeze yiga muri icyo kigo muri uwo mwaka.

Umushinjacyaha asobanura ko umugabo wa Munyenyezi, Arsène Shalom Ntahobali (ubu ufungiye muri Sénégal ku byaha bya jenoside), ari we wigaga muri Kaminuza y'u Rwanda kandi ko nta gitangaza kuba Munyenyezi yarabonekaga kenshi i Butare kuko yabaga aje kumusura nk'umukunzi we biteguraga kubana.

Umushinjacyaha kandi agaragaza ko Munyenyezi yirukanywe mu rwunge rw'amashuri rwa Gitwe ku mpamvu zikomeye z'imyitwarire mibi atagaragaje mu rukiko. Uruhande rumuburanira rwo rukavuga ko yahavuye kuko yari atwite agomba kujya kwiga hafi y'umugabo we Arsène Shalom Ntahobali, ari na yo mpamvu yagiye kwiga muri CEFOTEC.

Muri iryo perereza ku mashuri ya Munyenyezi, umushinjacyaha avuga ko uregwa atagaragara ku rutonde rw'abigaga mu mwaka wa gatandatu muri CEFOTEC nk'uko we abivuga.

Gusa abunganira Munyenyezi, Me Bikotwa Bruce na Gashema Félicien, banenga cyane "umwimerere" w'urutonde rwatanzwe n'uyobora icyo kigo ndetse n'indangamanota y'umunyeshuri wifashishijwe n'umushinjacyaha.

Bavuga ko ubuhamya bafite ari ubw'umwarimu wigishije Munyenyezi mu mwaka wa gatandatu isomo ryo gushushanya, mu gihe umushinjacyaha we avuga ko iryo somo ritigishwaga mu masomo y'inderabarezi rusange Munyenyezi avuga ko yize.

Mu kwezi kwa kane umwaka ushize, Munyenyezi yakatiwe igifungo cya burundu ahamijwe ibyaha bya jenoside no gusambanya abagore n'abakobwa, ibyaha we ahakana.

Urubanza ruracyakomeje.