Diyaarad Pakistan leedahay oo dhacday

Xigashada Sawirka, AFP

Qoraalka sawirka, Diyaaradda dhacday ayaa ahayd noocan oo kale

Diyaarad ay leedahay Pakistan International Airlines oo ay saaran yihiin in ka badan afartan qof ayaa ku dhacday waqooyiga waddanka sida ay sheegeen warfaafinta gudaha.

Ciidamada ayaa ka helay 21 mayd meeshii ay diyaaradda ku dhacday, sida ay sheegtay war ka soo baxay milatariga.

Diyaaradda oo ay leedahay shirkadda diyaaradaha ee dalka, waxaa laga waayey raadeerka wax yar kadib markii ay ka duushay degmada Chitral ee buuraha ah, waxayna u socotay magaalada Islamabad.