දීපවාලි ආලෝකය අඳුරු කළ ගිනිකෙළි දුමාරය

ඉන්දියාවේ දිල්ලි අගනුවර දීපවාලි සැමරුම් වෙනුවෙන් දැල්වුණු විශාල ප්‍රමාණයේ ගිනිකෙළිවලින් නැගුණු දුමාරය නගරයේ වායු දූෂණය ඉතා අනතරුදායක මට්ටමකින් ඉහළ නැංවීමට හේතුවී තිබේ.

ඡායාරූප මූලාශ්‍රය, AP

ඡායාරූප ශීර්ෂ වැකිය, ගිනිකෙළි සංදර්ශනවලින් වර්ණවත් වූ උත්සව රාත්‍රිය ගෙවූ දිල්ලි නගර වැසියෝ පසුදා තද දුමාරයකින් වැසී අඳුරු වූ උදෑසනක අවදි වූහ.

ඡායාරූප මූලාශ්‍රය, Reuters

ඡායාරූප ශීර්ෂ වැකිය, උතුරු ඉන්දියාවේ ඉතාමත් වැදගත් හින්දු ආගමික උත්සවයක් වන දීපවාලි සුර අසුර යුද ජයග්‍රහණය සමරයි.

ඡායාරූප මූලාශ්‍රය, AFP

ඡායාරූප ශීර්ෂ වැකිය, ලෝක සෞඛ්‍ය සංවිධානය විසින් සෞඛ්‍යයට බරපතළ හානි නොකරන බවට නිර්දේශ කරනු ලැබ ඇති මට්ටමට වඩා තිස් ගුණයක් වැඩි අගයක වායු දූෂණයක් දිල්ලි නුවරින් අද දිනයේ වාර්තා වී ඇත.

ඡායාරූප මූලාශ්‍රය, EPA

ඡායාරූප ශීර්ෂ වැකිය, ඝන මීටරයකට මයික්‍රෝ ග්‍රෑම් හත්සිය පනහක් (750 micrograms per cubic metre) තරම් වූ සෞඛ්‍යයට අහිතකර ඉහළ අගයක වායු දූෂණයක් අද දිනයේ දිල්ලි අගනුවරින් වාර්තා වූ බව ඉන්දියාවේ පරිසර දූෂණ පාලන ආයතනය ප්‍රකාශ කොට තිබේ.

ඡායාරූප මූලාශ්‍රය, AP

ඡායාරූප ශීර්ෂ වැකිය, දිල්ලි නුවර ඇමරිකානු තානාපති කාර්යාලය ප්‍රකාශයක් කරමින් කියා සිටියේ අද දිනයේ සෞඛ්‍යයට ඉතා අහිතකර අයුරින් ඉහළ නැගුණු වායු දූෂණ මට්ටම 500 සීමාව ඉක්මවූ පසු සිය නිලධාරීන් වායු ගෝලයේ ගුණාත්මක මට්ටම මැනීම නතර කර දැමූ බවය.
ඡායාරූප ශීර්ෂ වැකිය, දිල්ලි නුවර පරිසරය සම්පූර්ණයෙන්ම වසාගෙන පැතිර ගොස් ඇති ඝන දුමාරයෙන් 60%- 70% අතර ප්‍රමාණයක් රතිඤ්ඤා දැල්වීමෙන් හැට ගැනුණු බව ඉන්දියාවේ වායු ගෝලයේ ගුණාත්මකභාවය මැනීම සහ පර්යේෂණ ආයතනයේ ප්‍රධාන විද්‍යාඥ ගුෆ්රාන් බීග් ප්‍රකාශ කළේය.

ඡායාරූප මූලාශ්‍රය, Getty Images

ඡායාරූප ශීර්ෂ වැකිය, පසුගිය මැයි මාසයේ ලෝක සෞඛ්‍ය සංවිධානය විසින් නිකුත් කරනු ලැබූ වාර්තාවකට අනුව ලොව පරිසර දූෂණය ඉහළම මට්ටමක පවතින නගර ලැයිස්තුවේ එකොළොස් වෙනි ස්ථානයට දිල්ලි අගනුවර නම්කොට තිබිණ.

ඡායාරූප මූලාශ්‍රය, AP

ඡායාරූප ශීර්ෂ වැකිය, එක්සත් ජාතීන්ගේ ළමා අරමුදල විසින් මෙහෙයවනු ලැබූ නව අධ්‍යයනයකට අනුව ලෝකයේ බිලියන දෙකකට අධික දරුවන් ජාත්‍යන්තර නිර්දේශිත මට්ටම්වලට වඩා හය ගුණයකින් දූෂිත වායුව ආශ්වාස ප්‍රශ්වාස කරන අතර ඉන් බොහොමයක් ජීවත් වන්නේ දකුණු ආසියානු නගරවල ය.

ඡායාරූප මූලාශ්‍රය, Reuters

ඡායාරූප ශීර්ෂ වැකිය, ලෝක සෞඛ්‍ය සංවිධානය විසින් ඉදිරිපත් කරනු ලැබ ඇති දත්තවලට අනුව ඉන්දියාවේ වසරකට හය ලක්ෂ විසි දහසක පිරිසක් පරිසර දූෂණය හේතුවෙන් හට ගන්නා රෝග වලින් මිය යති.

ඡායාරූප මූලාශ්‍රය, AP

ඡායාරූප ශීර්ෂ වැකිය, මේ වසරේ ඉන්දියාවේ දීපවාලි උත්සව සමයේ වැසියන් ගිනිකෙළි වෙනුවෙන් ඇමරිකානු ඩොලර් කෝටි හතර හමාරකට අධික මුදලක් වියදම් කරනු ඇති බවට ඇස්තමේන්තු කොට තිබුණු අතර මෙවර දීපවාලි උත්සව වෙනුවෙන් වෛවර්ණ ගිනිකෙළි නිෂ්පාදන දොළහක් ඇතුළත් පෙට්ටියක් අලෙවි වූයේ ඇමරිකානු ඩොලර් හතරකට ආසන්න මිලකට ය.