ඔබ මේ දකින්නේ අවම ඩේටා ප්රමාණයක් භාවිත කරන මෙම වෙබ් අඩවියේ පෙළ පමණක් කියවිය හැකි අනුවාදයකි. රූප සහ වීඩියෝ අන්තර්ගත අපගේ මුලික වෙබ් අඩවිය මෙතැනින් නරඹන්න.
අවම ඩේටා ප්රමාණයක් භාවිතා කරන මෙම වෙබ් පිටු පිළිබඳ වැඩිදුර කියවන්න
ජ්යෙෂ්ඨ හමාස් නිලධාරියෙකු ඊශ්රායල ගුවන් ප්රහාරයකින් ජීවිතක්ෂයට
ගාසාහි දකුණු දිග ඛාන් යුනිස් නගරයට ඊශ්රායලය එල්ල කළ ගුවන් ප්රහාරයකින් හමාස් සංවිධානයේ දේශපාලන නායක සලාහ් අල්-බර්දාවීල් මිය ගිය බව හමාස් නිලධාරියෙක් ඉරිදා අලුයම බීබීසීය වෙත පැවසීය.
හමාස් සංවිධානයේ දේශපාලන අංශයේ සාමාජිකයෙකු වූ බර්දාවීල් සහ ඔහුගේ බිරිඳ යන දෙදෙනා ම එම ගුවන් ප්රහාරයෙන් මිය ගිය බව ප්රදේශවාසීහු පවසති.
මේ සම්බන්ධයෙන් ඊශ්රායල බලධාරීන් ප්රතිචාර දක්වා නැත.
මෙම සතිය මුලදී ඊශ්රායලය ගාසා වෙත දැඩි ප්රහාර එල්ල කිරීම නැවත ආරම්භ කළේ ය. ඒ, මාස දෙකකට ආසන්න කාලයක් පැවති සටන් විරාමයේ පළමු අදියර අවසන් කරමිනි. ඔවුහු සටන් විරාමය දීර්ඝ කිරීම සඳහා එක්සත් ජනපදය ඉදිරිපත් කළ නව යෝජනාව ප්රතික්ෂේප කිරීම සම්බන්ධයෙන් හමාස් සංවිධානයට දොස් පැවරූහ.
ඊශ්රායලය එල්ල කළ චෝදනා හමාස් සංවිධානය විසින් ප්රතික්ෂේප කරන ලද අතර, කටාර්, ඊජිප්තුව සහ ඇමෙරිකා එක්සත් ජනපදය මැදිහත් වී ක්රියාවට නැංවූ ගිවිසුම ඊශ්රායලය උල්ලංඝණය කළ බවට ද ඔවුන් චෝදනා කර ඇත.
හමාස් පාලනය කරන පලස්තීන බල ප්රදේශයේ සෞඛ්ය බලධාරීන් පැවසුවේ, ඉරිදා මේ දක්වා ඛාන් යුනිස් සහ දකුණු දිග රෆාහි අවම වශයෙන් පුද්ගලයින් 18 දෙනෙකු මිය ගොස් ඇති බව ය.
නිවේදනයක් නිකුත් කරමින් හමාස් සංවිධානය පැවසුවේ, ඊශ්රායල මිසයිල ප්රහාරය එල්ල වන විට බර්දාවීල් තම බිරිඳ සමග ඔවුන්ගේ කූඩාරමේ යාච්ඥා කරමින් සිටි ඇති බව ය.
මීට පෙර හමාස් සංවිධානයේ ප්රකාශකයෙකු ලෙස කටයුතු කළ බර්දාවීල් බොහෝ අවස්ථාවලදී දේශීය මාධ්ය හමුවේ පෙනී සිට තිබුණු අයෙකි.
පසුගිය අඟහරුවාදා සිට ඊශ්රායලය ගාසාහි සිය හමුදා මෙහෙයුම් නැවත ආරම්භ කිරීමෙන් පසු මිය ගිය බවට වාර්තා වන හමාස් නිලධාරීන් 10 දෙනා අතරට ඔහු ද එක් වේ.
පුද්ගලයින් 1,200 දෙනෙකු ජීවිතක්ෂයට පත් කරමින් සහ තවත් පුද්ගලයින් 251දෙනෙකු ප්රාණ ඇපයට ගනිමින් ඊශ්රායල් දේශසීමාවට එල්ල කෙරුණු හමාස් ප්රහාරයට ප්රතිචාර වශයෙන් ඊශ්රායල හමුදාව විසින් එම සංවිධානය විනාශ කිරීම සඳහා මෙහෙයුමක් දියත් කරන ලදී.
හමාස් සංවිධානය මෙහෙයවන සෞඛ්ය අමාත්යංශය පවසන පරිදි, එතැන් සිට පලස්තීනුවන් 49,500කට වැඩි පිරිසක් ඝාතනය වී ඇති අතර ගාසාහි නිවාස සහ යටිතල පහසුකම් මහා පරිමාණයෙන් විනාශ වී තිබේ.