ਈਰਾਨ 'ਚ ਲੜਾਕੂ ਜਹਾਜ਼ ਡਿੱਗਣ ਤੋਂ ਬਾਅਦ ਪਹਾੜ ਦੀ ਦਰਾਰ ਵਿੱਚ ਲੁਕੇ ਪਾਇਲਟ ਨੂੰ ਅਮਰੀਕਾ ਨੇ ਕਿਵੇਂ ਬਚਾਇਆ, ਇੰਝ ਚਲਾਇਆ ਗਿਆ ਆਪ੍ਰੇਸ਼ਨ
ਤਸਵੀਰ ਸਰੋਤ, Reuters
- ਲੇਖਕ, ਗੈਬਰੀਏਲਾ ਪੋਮੇਰਾਇ
- ਪੜ੍ਹਨ ਦਾ ਸਮਾਂ: 7 ਮਿੰਟ
ਅਮਰੀਕੀ ਫੌਜ ਨੇ ਈਰਾਨ ਵਿੱਚ ਆਪਣੇ ਇੱਕ ਲੜਾਕੂ ਜਹਾਜ਼ ਦੇ ਲਾਪਤਾ ਕਰੂ ਮੈਂਬਰ ਨੂੰ ਇੱਕ ਨਾਟਕੀ ਮਿਸ਼ਨ ਵਿੱਚ ਬਚਾ ਲਿਆ ਹੈ। ਇਸ ਲੜਾਕੂ ਜਹਾਜ਼ ਨੂੰ ਉੱਥੇ ਦੇ ਇੱਕ ਦੂਰ-ਦੁਰਾਡੇ ਇਲਾਕੇ ਵਿੱਚ ਈਰਾਨ ਵੱਲੋਂ ਮਾਰ ਡਿਗਾਇਆ ਗਿਆ ਸੀ।
ਇਹ ਸਭ ਕਿਵੇਂ ਹੋਇਆ, ਇਹ ਗੱਲ ਅਜੇ ਵੀ ਪੂਰੀ ਤਰ੍ਹਾਂ ਸਪਸ਼ਟ ਨਹੀਂ ਹੈ, ਪਰ ਦੁਸ਼ਮਣ ਦੇ ਇਲਾਕੇ ਵਿੱਚ ਫਸੇ ਏਅਰਮੈਨ ਨੂੰ ਬਾਹਰ ਕੱਢਣ ਦਾ ਆਪ੍ਰੇਸ਼ਨ ਬਹੁਤ ਹੀ ਜਟਿਲ ਸੀ।
ਅਮਰੀਕੀ ਮੀਡੀਆ ਦੇ ਮੁਤਾਬਕ, ਇਸ ਮਿਸ਼ਨ ਵਿੱਚ ਸਪੈਸ਼ਲ ਫੋਰਸਿਜ਼ ਦੇ ਦਰਜਨਾਂ ਜਵਾਨਾਂ ਦੇ ਨਾਲ ਅਮਰੀਕੀ ਲੜਾਕੂ ਜਹਾਜ਼ ਅਤੇ ਹੈਲੀਕਾਪਟਰ ਵੀ ਸ਼ਾਮਲ ਸਨ। ਅਮਰੀਕੀ ਖੁਫੀਆ ਏਜੰਸੀ ਸੀਆਈਏ ਨੇ ਵੀ ਇਸ ਵਿੱਚ ਅਹਿਮ ਭੂਮਿਕਾ ਨਿਭਾਈ।
ਐਤਵਾਰ ਨੂੰ ਅਮਰੀਕੀ ਰਾਸ਼ਟਰਪਤੀ ਡੌਨਲਡ ਟਰੰਪ ਨੇ ਸੋਸ਼ਲ ਮੀਡੀਆ 'ਤੇ ਕਿਹਾ, "ਅਸੀਂ ਈਰਾਨ ਦੇ ਪਹਾੜਾਂ ਵਿੱਚੋਂ ਗੰਭੀਰ ਰੂਪ ਨਾਲ ਜ਼ਖਮੀ ਅਤੇ ਬਹੁਤ ਹੀ ਬਹਾਦਰ ਐਫ-15 ਕਰੂ ਮੈਂਬਰ/ਅਧਿਕਾਰੀ ਨੂੰ ਬਚਾ ਲਿਆ ਹੈ।"
ਇਸ ਕਰੂ ਮੈਂਬਰ ਦੀਆਂ ਮੁਸ਼ਕਲਾਂ ਸ਼ੁੱਕਰਵਾਰ ਤੋਂ ਉਸ ਵੇਲੇ ਸ਼ੁਰੂ ਹੋਈਆਂ, ਜਦੋਂ ਖ਼ਬਰ ਆਈ ਕਿ ਦੱਖਣੀ ਈਰਾਨ ਦੇ ਉੱਪਰ ਉੱਡ ਰਹੇ ਅਮਰੀਕਾ ਦੇ ਇੱਕ ਐਫ-15 ਲੜਾਕੂ ਜਹਾਜ਼ ਨੂੰ ਮਾਰ ਸੁੱਟਿਆ ਗਿਆ ਹੈ। ਇਸ ਜਹਾਜ਼ ਵਿੱਚ ਇੱਕ ਵੇਪਨ ਸਿਸਟਮਜ਼ ਆਫ਼ਿਸਰ ਅਤੇ ਇੱਕ ਪਾਇਲਟ ਸਵਾਰ ਸਨ।
ਇਹ ਅਜਿਹੀ ਘਟਨਾ ਸੀ ਜੋ 20 ਸਾਲ ਤੋਂ ਵੱਧ ਸਮੇਂ ਵਿੱਚ ਪਹਿਲੀ ਵਾਰ ਹੋਈ ਸੀ, ਜਦੋਂ ਦੁਸ਼ਮਣ ਦੀ ਗੋਲੀਬਾਰੀ ਵਿੱਚ ਕਿਸੇ ਅਮਰੀਕੀ ਲੜਾਕੂ ਜਹਾਜ਼ ਨੂੰ ਮਾਰ ਡਿਗਾਇਆ ਗਿਆ।
ਇਸ ਐਫ-15ਈ ਸਟ੍ਰਾਈਕ ਈਗਲ ਵਿੱਚ ਸਵਾਰ ਅਮਰੀਕੀ ਫੌਜ ਦੇ ਇਹ ਦੋਵੇਂ ਅਧਿਕਾਰੀ ਜਹਾਜ਼ ਤੋਂ ਸੁਰੱਖਿਅਤ ਬਾਹਰ ਨਿਕਲਣ ਵਿੱਚ ਕਾਮਯਾਬ ਰਹੇ। ਪਾਇਲਟ ਨੂੰ ਤਾਂ ਉਸੇ ਦਿਨ ਬਚਾ ਲਿਆ ਗਿਆ ਸੀ, ਪਰ ਦੂਜਾ ਕਰੂ ਮੈਂਬਰ ਲਾਪਤਾ ਸੀ।
ਈਰਾਨ ਨੇ ਜ਼ਿੰਦਾ ਫੜ੍ਹਨ 'ਤੇ ਰੱਖੀ ਸੀ ਇਨਾਮ ਦੀ ਪੇਸ਼ਕਸ਼
ਤਸਵੀਰ ਸਰੋਤ, Islamic Revolutionary Guard Corps/Anadolu via Getty Images
ਇਸ ਤੋਂ ਬਾਅਦ ਅਮਰੀਕਾ ਨੇ ਉਸ ਨੂੰ ਲੱਭਣ ਦਾ ਅਭਿਆਨ ਸ਼ੁਰੂ ਕਰ ਦਿੱਤਾ।
ਦੂਜੇ ਪਾਸੇ, ਈਰਾਨ ਨੇ ਵੀ ਇਸ ਅਮਰੀਕੀ ਕਰੂ ਮੈਂਬਰ ਨੂੰ ਜ਼ਿੰਦਾ ਫੜ੍ਹਨ ਲਈ 66 ਹਜ਼ਾਰ ਡਾਲਰ (ਲਗਭਗ 62 ਲੱਖ ਰੁਪਏ) ਦਾ ਇਨਾਮ ਐਲਾਨ ਕਰ ਦਿੱਤਾ।
ਸੋਸ਼ਲ ਮੀਡੀਆ 'ਤੇ ਸਾਂਝੇ ਕੀਤੇ ਕੁਝ ਵੀਡੀਓਜ਼ ਵਿੱਚ ਕਈ ਹਥਿਆਰਬੰਦ ਨਾਗਰਿਕ ਉਸ ਨੂੰ ਲੱਭਦੇ ਹੋਏ ਨਜ਼ਰ ਆ ਰਹੇ ਸਨ। ਹਾਲਾਂਕਿ ਬੀਬੀਸੀ ਇਨ੍ਹਾਂ ਵੀਡੀਓਜ਼ ਦੀ ਸੁਤੰਤਰ ਤੌਰ 'ਤੇ ਪੁਸ਼ਟੀ ਨਹੀਂ ਕਰ ਸਕਿਆ ਹੈ।
ਅਮਰੀਕੀ ਅਧਿਕਾਰੀਆਂ ਮੁਤਾਬਕ, ਜ਼ਮੀਨ 'ਤੇ ਉਤਰਨ ਤੋਂ ਬਾਅਦ ਉਸ ਅਧਿਕਾਰੀ ਕੋਲ ਆਪਣੀ ਸੁਰੱਖਿਆ ਲਈ ਸਿਰਫ਼ ਇੱਕ ਹੈਂਡਗਨ ਸੀ।
ਇਸ ਤਰ੍ਹਾਂ ਦੀ ਸਥਿਤੀ ਲਈ ਏਅਰਮੈਨ ਨੂੰ ਪਹਿਲਾਂ ਤੋਂ ਟ੍ਰੇਨਿੰਗ ਦਿੱਤੀ ਜਾਂਦੀ ਹੈ। ਇਸ ਵਿੱਚ ਆਪਣਾ ਬੀਕਨ ਸਿਗਨਲ ਆਨ ਕਰਨਾ, ਕਿਸੇ ਉੱਚੀ ਜਗ੍ਹਾ ਤੱਕ ਪਹੁੰਚਣਾ, ਆਪਣੇ ਆਪ ਨੂੰ ਲੁਕਾਉਣਾ ਅਤੇ ਸੰਚਾਰ ਸਥਾਪਿਤ ਕਰਨਾ ਸ਼ਾਮਲ ਹੁੰਦਾ ਹੈ।
ਅਮਰੀਕੀ ਮੀਡੀਆ ਦੀਆਂ ਰਿਪੋਰਟਾਂ ਮੁਤਾਬਕ, ਏਅਰਮੈਨ ਪਹਾੜ ਦੀ ਇੱਕ ਦਰਾਰ ਵਿੱਚ ਲੁਕ ਗਿਆ ਸੀ ਅਤੇ ਉਸਨੇ ਬੀਕਨ ਦਾ ਇਸਤੇਮਾਲ ਬਹੁਤ ਸੀਮਿਤ ਰੱਖਿਆ, ਕਿਉਂਕਿ ਉਸ ਨੂੰ ਡਰ ਸੀ ਕਿ ਇਸਦਾ ਸਿਗਨਲ ਈਰਾਨ ਦੇ ਹੱਥ ਲੱਗ ਸਕਦਾ ਹੈ।
ਦੱਸਿਆ ਜਾ ਰਿਹਾ ਹੈ ਕਿ ਇਸ ਤੋਂ ਬਾਅਦ ਉਹ ਆਪਣੇ ਬਚਾਅ ਦਲ ਦੇ ਪਹੁੰਚਣ ਦੀ ਉਡੀਕ ਕਰਦਾ ਰਿਹਾ।
ਸੀਆਈਏ ਦਾ ਰੋਲ
ਤਸਵੀਰ ਸਰੋਤ, Getty Images
ਅਮਰੀਕੀ ਮੀਡੀਆ ਨਾਲ ਗੱਲ ਕਰਨ ਵਾਲੇ ਟਰੰਪ ਪ੍ਰਸ਼ਾਸਨ ਦੇ ਇੱਕ ਸੀਨੀਅਰ ਅਧਿਕਾਰੀ ਦੇ ਮੁਤਾਬਕ, ਰੈਸਕਿਊ ਆਪ੍ਰੇਸ਼ਨ ਵਿੱਚ ਸੀਆਈਏ ਨੇ ਬਹੁਤ ਅਹਿਮ ਭੂਮਿਕਾ ਨਿਭਾਈ।
ਅਮਰੀਕੀ ਖੁਫੀਆ ਏਜੰਸੀ ਨੇ ਹੀ ਪਹਾੜ ਦੀ ਇੱਕ ਦਰਾਰ ਤੱਕ ਏਅਰਮੈਨ ਦੀ ਸਹੀ ਲੋਕੇਸ਼ਨ ਟ੍ਰੈਕ ਕੀਤੀ ਅਤੇ ਇਹ ਜਾਣਕਾਰੀ ਪੈਂਟਾਗਨ ਨੂੰ ਦਿੱਤੀ।
ਟਰੰਪ ਨੇ ਕਿਹਾ ਕਿ ਰੈਸਕਿਊ ਆਪ੍ਰੇਸ਼ਨ ਦੀ ਯੋਜਨਾ ਬਣਾ ਰਹੇ ਅਮਰੀਕੀ ਅਧਿਕਾਰੀ ਉਸਦੀ ਲੋਕੇਸ਼ਨ 'ਤੇ "24 ਘੰਟੇ ਨਜ਼ਰ" ਰੱਖ ਰਹੇ ਸਨ।
ਰਾਸ਼ਟਰਪਤੀ ਟਰੰਪ ਨੇ ਕਿਹਾ, "ਸਾਡੇ ਦੁਸ਼ਮਣ ਵੀ ਸਾਡੇ ਅਧਿਕਾਰੀ ਦੀ ਤਲਾਸ਼ ਵਿੱਚ ਜੁਟੇ ਹੋਏ ਸਨ ਅਤੇ ਹਰ ਘੰਟੇ ਉਸਦੇ ਹੋਰ ਨੇੜੇ ਪਹੁੰਚ ਰਹੇ ਸਨ।"
ਰਿਪੋਰਟਾਂ ਮੁਤਾਬਕ, ਸੀਆਈਏ ਨੇ ਇੱਕ ਭਰਮ ਪੈਦਾ ਕਰਨ ਵਾਲਾ ਅਭਿਆਨ ਵੀ ਚਲਾਇਆ ਅਤੇ ਈਰਾਨ ਦੇ ਅੰਦਰ ਇਹ ਖ਼ਬਰ ਫੈਲਾਈ ਕਿ ਅਮਰੀਕੀ ਬਲ ਦੂਜੇ ਏਅਰਮੈਨ ਨੂੰ ਵੀ ਪਹਿਲਾਂ ਹੀ ਲੱਭ ਚੁੱਕੇ ਹਨ।
'ਅਮਰੀਕਾ ਨੇ ਭੇਜੇ ਦਰਜਨਾਂ ਜਹਾਜ਼'
ਟਰੰਪ ਨੇ ਟਰੁੱਥ ਸੋਸ਼ਲ 'ਤੇ ਜਾਰੀ ਆਪਣੀ ਪੋਸਟ ਵਿੱਚ ਕਿਹਾ ਕਿ ਅਮਰੀਕੀ ਫੌਜ ਨੇ "ਉਸ ਨੂੰ ਵਾਪਸ ਲਿਆਉਣ ਲਈ ਦੁਨੀਆ ਦੇ ਸਭ ਤੋਂ ਘਾਤਕ ਹਥਿਆਰਾਂ ਨਾਲ ਲੈਸ ਦਰਜਨਾਂ ਜਹਾਜ਼ ਭੇਜੇ।"
ਰਿਪੋਰਟਾਂ ਦੇ ਮੁਤਾਬਕ, ਜਿਵੇਂ ਹੀ ਅਮਰੀਕੀ ਸਪੈਸ਼ਲ ਫੋਰਸਿਜ਼ ਫਸੇ ਹੋਏ ਅਮਰੀਕੀ ਅਧਿਕਾਰੀ ਵੱਲ ਵਧੀਆਂ, ਈਰਾਨੀ ਫੌਜੀਆਂ ਨੂੰ ਉਸਦੀ ਲੋਕੇਸ਼ਨ ਤੋਂ ਦੂਰ ਰੱਖਣ ਲਈ ਬੰਬਬਾਰੀ ਅਤੇ ਹਥਿਆਰਾਂ ਨਾਲ ਫਾਇਰਿੰਗ ਕੀਤੀ ਗਈ।
ਅਮਰੀਕੀ ਮੀਡੀਆ ਨੇ ਇਹ ਵੀ ਦੱਸਿਆ ਕਿ ਬਚਾਅ ਦਲ ਨੂੰ ਕੱਢਣ ਲਈ ਭੇਜੇ ਗਏ ਦੋ ਟ੍ਰਾਂਸਪੋਰਟ ਜਹਾਜ਼ ਈਰਾਨ ਦੇ ਅੰਦਰ ਇੱਕ ਦੂਰ-ਦੁਰਾਡੇ ਬੇਸ ਤੋਂ ਉਡਾਨ ਨਹੀਂ ਭਰ ਸਕੇ। ਬਾਅਦ ਵਿੱਚ ਉਨ੍ਹਾਂ ਨੂੰ ਦੁਸ਼ਮਣ ਦੇ ਹੱਥ ਲੱਗਣ ਤੋਂ ਰੋਕਣ ਲਈ ਨਸ਼ਟ ਕਰ ਦਿੱਤਾ ਗਿਆ। ਇਸ ਤੋਂ ਬਾਅਦ ਸਪੈਸ਼ਲ ਫੋਰਸਿਜ਼ ਤਿੰਨ ਵਾਧੂ ਜਹਾਜ਼ਾਂ ਨਾਲ ਉੱਥੇ ਪਹੁੰਚੀਆਂ ਅਤੇ ਕਰੂ ਨੂੰ ਬਾਹਰ ਕੱਢ ਲਿਆ।
ਬੀਬੀਸੀ ਵੈਰੀਫਾਈ ਵੱਲੋਂ ਪੁਸ਼ਟੀ ਕੀਤੇ ਗਏ ਵੀਡੀਓ ਅਤੇ ਤਸਵੀਰਾਂ ਵਿੱਚ ਮੱਧ ਈਰਾਨ ਦੇ ਪਹਾੜੀ ਇਲਾਕੇ ਵਿੱਚ ਧੂੰਆਂ ਛੱਡਦਾ ਜਹਾਜ਼ ਦਾ ਮਲਬਾ ਨਜ਼ਰ ਆਇਆ। ਇਹ ਜਗ੍ਹਾ ਇਸਫਹਾਨ ਸ਼ਹਿਰ ਤੋਂ ਲਗਭਗ 50 ਕਿਲੋਮੀਟਰ ਦੱਖਣ-ਪੂਰਬ ਵਿੱਚ ਦੱਸੀ ਗਈ ਹੈ।
ਈਰਾਨ ਦੀ ਫੌਜ ਦਾ ਕਹਿਣਾ ਹੈ ਕਿ ਇਸ ਆਪ੍ਰੇਸ਼ਨ ਦੌਰਾਨ ਅਮਰੀਕਾ ਦੇ ਦੋ ਸੀ-130 ਫੌਜੀ ਟ੍ਰਾਂਸਪੋਰਟ ਜਹਾਜ਼ ਅਤੇ ਦੋ ਬਲੈਕ ਹਾਕ ਹੈਲੀਕਾਪਟਰ ਤਬਾਹ ਕਰ ਦਿੱਤੇ ਗਏ। ਫੌਜ ਨੇ ਦਾਅਵਾ ਕੀਤਾ ਕਿ "ਦੱਖਣੀ ਇਸਫਹਾਨ ਦੇ ਇੱਕ ਏਅਰਪੋਰਟ 'ਤੇ ਚਲਾਇਆ ਗਿਆ ਅਮਰੀਕਾ ਦਾ ਭਰਮ ਵਾਲਾ ਅਤੇ ਫਰਾਰ ਹੋਣ ਦਾ ਮਿਸ਼ਨ ਪੂਰੀ ਤਰ੍ਹਾਂ ਨਾਕਾਮ ਕਰ ਦਿੱਤਾ ਗਿਆ।"
ਈਰਾਨੀ ਸਰਕਾਰੀ ਮੀਡੀਆ ਨੇ ਐਤਵਾਰ ਨੂੰ ਕਿਹਾ ਕਿ ਇਸਲਾਮਿਕ ਰਿਵੋਲਿਊਸ਼ਨਰੀ ਗਾਰਡ ਕੋਰਪਸ (ਆਈਆਰਜੀਸੀ) ਦੇ ਜਵਾਨਾਂ ਨੇ ਇਸਫਹਾਨ ਦੇ ਉੱਪਰ ਇੱਕ ਅਮਰੀਕੀ ਡਰੋਨ ਨੂੰ ਮਾਰ ਗਿਰਾਇਆ, ਜੋ ਲਾਪਤਾ ਏਅਰਮੈਨ ਦੀ ਤਲਾਸ਼ ਕਰ ਰਿਹਾ ਸੀ।
ਹਾਲਾਂਕਿ, ਇਸਫਹਾਨ ਦੇ ਨੇੜੇ ਹੋਈਆਂ ਇਨ੍ਹਾਂ ਦੋਵਾਂ ਘਟਨਾਵਾਂ ਦੇ ਦਾਵਿਆਂ ਦੀ ਬੀਬੀਸੀ ਸੁਤੰਤਰ ਤੌਰ 'ਤੇ ਪੁਸ਼ਟੀ ਨਹੀਂ ਕਰ ਸਕਿਆ ਹੈ।
ਰਾਤ ਵਿੱਚ ਪੂਰਾ ਕੀਤਾ ਗਿਆ ਰੈਸਕਿਊ ਮਿਸ਼ਨ
ਤਸਵੀਰ ਸਰੋਤ, Chip Somodevilla/Getty Images
ਅਧਿਕਾਰੀਆਂ ਮੁਤਾਬਕ, ਅਮਰੀਕੀ ਸਮੇਂ ਅਨੁਸਾਰ ਅੱਧੀ ਰਾਤ ਤੋਂ ਪਹਿਲਾਂ ਰੈਸਕਿਊ ਆਪ੍ਰੇਸ਼ਨ ਪੂਰਾ ਕਰ ਲਿਆ ਗਿਆ ਸੀ ਅਤੇ ਏਅਰਮੈਨ ਨੂੰ ਇਲਾਜ ਲਈ ਕੁਵੈਤ ਲਿਜਾਇਆ ਗਿਆ।
ਟਰੰਪ ਨੇ ਕਿਹਾ, "ਅਧਿਕਾਰੀ ਗੰਭੀਰ ਤੌਰ 'ਤੇ ਜ਼ਖਮੀ ਹਨ, ਪਰ ਉਹ ਪੂਰੀ ਤਰ੍ਹਾਂ ਠੀਕ ਹੋ ਜਾਣਗੇ।"
ਅਮਰੀਕੀ ਅਧਿਕਾਰੀਆਂ ਨੇ ਇਹ ਨਹੀਂ ਦੱਸਿਆ ਹੈ ਕਿ ਬਚਾਏ ਜਾਣ ਦੇ ਸਮੇਂ ਏਅਰਮੈਨ ਦੀ ਸਹੀ ਲੋਕੇਸ਼ਨ ਕੀ ਸੀ ਜਾਂ ਉਸਦੀ ਪਛਾਣ ਕੀ ਹੈ।
ਅਮਰੀਕੀ ਫੌਜ ਦੇ ਸਾਬਕਾ ਅਧਿਕਾਰੀ ਅਤੇ ਸੇਵਾਮੁਕਤ ਨੇਵੀ ਐਡਮਿਰਲ ਵਿਲੀਅਮ ਫੈਲਨ ਨੇ ਬੀਬੀਸੀ ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ ਰੈਸਕਿਊ ਮਿਸ਼ਨ ਦਾ ਸਮਾਂ ਸ਼ਾਇਦ ਅਮਰੀਕਾ ਦੇ ਹੱਕ ਵਿੱਚ ਗਿਆ।
ਉਨ੍ਹਾਂ ਕਿਹਾ, "ਹਨੇਰਾ ਸਾਡੇ ਲੋਕਾਂ ਲਈ ਵਧੀਆ ਹੁੰਦਾ ਹੈ, ਕਿਉਂਕਿ ਉਹ ਰਾਤ ਵਿੱਚ ਆਪ੍ਰੇਸ਼ਨ ਕਰਨ ਦੇ ਆਦੀ ਹੁੰਦੇ ਹਨ।"
ਫੈਲਨ ਨੇ ਕਿਹਾ ਕਿ ਦੁਸ਼ਮਣ ਦੇ ਇਲਾਕੇ ਦੇ ਉੱਪਰ ਉੱਡਦਿਆਂ "ਤੁਹਾਨੂੰ ਹਮੇਸ਼ਾਂ ਇਸ ਗੱਲ ਲਈ ਤਿਆਰ ਰਹਿਣਾ ਪੈਂਦਾ ਹੈ ਕਿ ਅਗਲਾ ਨਿਸ਼ਾਨਾ ਤੁਸੀਂ ਵੀ ਹੋ ਸਕਦੇ ਹੋ।"
ਐਤਵਾਰ ਨੂੰ ਈਸਟਰਨ ਡੇਅਲਾਈਟ ਟਾਈਮ (ਈਡੀਟੀ) ਅਨੁਸਾਰ, ਰਾਤ 12 ਵਜੇ ਤੋਂ ਠੀਕ ਪਹਿਲਾਂ ਅਮਰੀਕੀ ਮੀਡੀਆ ਨੇ ਖ਼ਬਰ ਦਿੱਤੀ ਕਿ ਦੂਜਾ ਕਰੂ ਮੈਂਬਰ ਮਿਲ ਗਿਆ ਹੈ।
ਟਰੰਪ ਨੇ ਸੋਸ਼ਲ ਮੀਡੀਆ 'ਤੇ ਲਿਖਿਆ ਕਿ ਅਮਰੀਕਾ "ਕਦੇ ਵੀ ਕਿਸੇ ਅਮਰੀਕੀ ਯੋਧੇ ਨੂੰ ਪਿੱਛੇ ਨਹੀਂ ਛੱਡੇਗਾ।"
'ਮਿਸ਼ਨ ਫੇਲ ਹੋ ਗਿਆ': ਈਰਾਨ
ਤਸਵੀਰ ਸਰੋਤ, Morteza Nikoubazl/NurPhoto via Getty Images
ਦੂਜੇ ਪਾਸੇ, ਈਰਾਨ ਨੇ ਜ਼ੋਰ ਦੇ ਕੇ ਕਿਹਾ ਕਿ ਇਹ ਆਪ੍ਰੇਸ਼ਨ ਨਾਕਾਮ ਰਿਹਾ ਹੈ। ਈਰਾਨ ਦੀ ਮੁੱਖ ਫੌਜੀ ਕਮਾਂਡ ਦੇ ਬੁਲਾਰੇ ਇਬਰਾਹੀਮ ਜ਼ੋਲਫਾਗਰੀ ਨੇ ਵੀਡੀਓ ਸੰਦੇਸ਼ ਵਿੱਚ ਕਿਹਾ ਕਿ ਅਮਰੀਕਾ ਦੇ ਕਈ ਫੌਜੀ ਜਹਾਜ਼ਾਂ ਨੂੰ ਐਮਰਜੈਂਸੀ ਲੈਂਡਿੰਗ ਕਰਨੀ ਪਈ।
ਉਨ੍ਹਾਂ ਕਿਹਾ, "ਜੰਗ ਅਤੇ ਹਮਲਿਆਂ ਦੀ ਦਲਦਲ ਵਿੱਚ ਫਸੇ ਅਗਿਆਨੀ ਅਮਰੀਕੀ ਰਾਸ਼ਟਰਪਤੀ ਨੂੰ ਆਖਿਰਕਾਰ ਸਮਝ ਆ ਗਿਆ ਕਿ ਕਿਸੇ ਵੀ ਜ਼ਮੀਨੀ ਕਾਰਵਾਈ, ਘੁਸਪੈਠ ਜਾਂ ਆਪ੍ਰੇਸ਼ਨ ਨੂੰ ਨਿਰਣਾਇਕ ਅਤੇ ਅਪਮਾਨਜਨਕ ਹਾਰ ਦਾ ਸਾਹਮਣਾ ਕਰਨਾ ਪਵੇਗਾ।"
ਡੌਨਲਡ ਟਰੰਪ ਵੱਲੋਂ ਪਾਇਲਟ ਨੂੰ ਬਚਾਏ ਜਾਣ ਦੇ ਐਲਾਨ ਤੋਂ ਬਾਅਦ ਤੋਂ ਈਰਾਨੀ ਅਧਿਕਾਰੀਆਂ ਅਤੇ ਸਰਕਾਰੀ ਟੀਵੀ ਨੇ "ਮਿਸ਼ਨ ਫੇਲ" ਵਾਲੀ ਇਹੀ ਗੱਲ ਵਾਰ-ਵਾਰ ਦੋਹਰਾਈ ਹੈ।
ਕੁਝ ਅਮਰੀਕੀ ਵਿਸ਼ਲੇਸ਼ਕਾਂ ਦਾ ਕਹਿਣਾ ਹੈ ਕਿ ਈਰਾਨ ਦੇ ਅੰਦਰ ਗਹਿਰਾਈ ਤੱਕ ਇੱਕ ਐਫ-15ਈ ਦਾ ਡਿੱਗਣਾ ਅਤੇ ਉਸ ਤੋਂ ਬਾਅਦ ਕਈ ਰੈਸਕਿਊ ਜਹਾਜ਼ਾਂ ਦਾ ਨਸ਼ਟ ਹੋਣਾ ਅਮਰੀਕੀ ਏਅਰ ਪਾਵਰ ਦੀਆਂ ਸੀਮਾਵਾਂ ਨੂੰ ਦਰਸਾਉਂਦਾ ਹੈ।
ਅਮਰੀਕੀ ਸੈਂਟਰਲ ਕਮਾਂਡ ਦੇ ਸਾਬਕਾ ਕਮਾਂਡਰ ਜਨਰਲ ਫ੍ਰੈਂਕ ਮੈਕੈਂਜ਼ੀ ਨੇ ਬੀਬੀਸੀ ਦੇ ਅਮਰੀਕੀ ਸਹਿਯੋਗੀ ਸੀਬੀਐਸ ਨਾਲ ਗੱਲ ਕਰਦਿਆਂ ਕਿਹਾ, "ਇਸ ਮਿਸ਼ਨ ਵਿੱਚ ਅਸੀਂ ਵਾਕਈ ਕੁਝ ਜਹਾਜ਼ ਗੁਆਏ, ਪਰ ਇਸ ਤਰ੍ਹਾਂ ਦੀ ਸਥਿਤੀ ਵਿੱਚ ਤੁਹਾਨੂੰ ਇਹ ਨੁਕਸਾਨ ਹਰ ਰੋਜ਼ ਝੱਲਣ ਲਈ ਤਿਆਰ ਰਹਿਣਾ ਪੈਂਦਾ ਹੈ।"
ਉਨ੍ਹਾਂ ਨੇ ਸੀਬੀਐਸ ਦੇ 'ਫੇਸ ਦਿ ਨੇਸ਼ਨ' ਪ੍ਰੋਗਰਾਮ ਵਿੱਚ ਕਿਹਾ, "ਇੱਕ ਜਹਾਜ਼ ਬਣਾਉਣ ਵਿੱਚ ਇੱਕ ਸਾਲ ਲੱਗਦਾ ਹੈ, ਪਰ ਇੱਕ ਅਜਿਹੀ ਫੌਜੀ ਪਰੰਪਰਾ ਬਣਾਉਣ ਵਿੱਚ 200 ਸਾਲ ਲੱਗਦੇ ਹਨ, ਜਿਸ ਵਿੱਚ ਤੁਸੀਂ ਆਪਣੇ ਕਿਸੇ ਵੀ ਯੋਧੇ ਨੂੰ ਪਿੱਛੇ ਨਹੀਂ ਛੱਡਦੇ।"
ਬੀਬੀਸੀ ਲਈ ਕਲੈਕਟਿਵ ਨਿਊਜ਼ਰੂਮ ਵੱਲੋਂ ਪ੍ਰਕਾਸ਼ਿਤ
ਤਾਜ਼ਾ ਘਟਨਾਕ੍ਰਮ
ਦ੍ਰਿਸ਼ਟੀਕੋਣ
ਪਾਠਕਾਂ ਦੀ ਪਸੰਦ
ਸਮੱਗਰੀ ਉਪਲਬਧ ਨਹੀਂ ਹੈ