ترکیې ناټو کې د فنلنډ‌ او سویډن د غړیتوب ملاتړ اعلان کړ

انقرې ناټو کې د فنلنډ او سویډن د غړیتوب له مخالفته لاس اخیستی او هوکړه یې کړې چې د دغو هېوادونو د غړیتوب غوښتنې ملاتړ وکړي.

د فنلنډ ولسمشر ساول‍ي نینیستو ویل‍ي دغو هېوادونو ماډریډ کې د ناټو تر سرمشریزې وروسته په دې تړاو یو درې اړخیز هوکړه لیک لاسلیک کړی دی.

په دې هوکړه کې راغلي چې دغه هېوادونه به "له یو بل سره د دوی امنیت ته د پېښو ګواښونو پر وړاندې بشپړ ملاتړ کوي."

د ترکیې ولسمشر رجب طیب اروغان تېره مې میاشت د فنلنډ او سویډن لخوا د ناټو غړیتوب د غوښتنې مخالفت وکړ او دا هېوادونه یې ترهګرو سازمانونو ته په پناه ورکولو تورن کړل.

د هغه اشاره ظاهرآ‌ کرد وسله والو ته وه.

ښاغلي اردوغان هغه مهال ویلي وو "له دغو هېوادونو یو هم د ترهګرو سازمانو پر ضد واضیح دریځ نه لري. څنګه پرې باور کولی شو؟"

تازه د فنلنډ ولسمشر یوه اعلامیه کې ویلي "فنلنډ به د ناټو د یوه غړي په توګه، د دغه سازمان ترهګرۍ ضد هوکړو او پالیسیو ته بشپړ ژمن وي."

ترکیې سره پر څه هوکړه شوې؟

اې اېف پي خبري اژانس خپل رپوټ کې ویلي د ترکیې ولسمشر د ماډریډ له خبرو هغه څه ترلاسه کړل، چې غوښتل یې.

د ناټو سرمنشي ینس سټولتنبرګ ویلي:

•سویډن منلې چې د انقرې لخوا د غوښتل شویو مشکوکو وسله والو د ورسپارلو چاره به چټکوي

•سویډن او فنلنډ کې به قوانینو کې په تعدیلاتو سره د وسله والو خلاف ګامونه اخیستل کېږي

•او دغه دواړه هېوادونه به پر ترکیې د وسلو د پلور د مخنیوي لګولي بندیزونه هم لغوه کوي

د ناټو د سرمنشي او غړو هرکلی

لوېدیځو هېوادونو انقرې لخوا ناټو کې د فنلنډ او سویډن غړیتوب سره له مخالفته د لاس اخیستلو تود هرکلی کړی دی.

په دې لړ کې پخپله د ناټو سرمنشي ویلي له پلان سره سم د ناټو پراخېدل په دې معنا دي چې د روسیې ولسمشر ولادیمیر پوتین د هغه معکوس څه لاس ته راوړي‌ چې چنه یې پرې وهله.

نوموړي زیاته کړه "ولسمشر پوتین ناټو کوچنۍ غوښته - خو اوس یې پوله کې له سترې ناټو سره مخ دی. نو په دې توګه نوموړی د هغه خلاف څه لاسته راوړي چې غوښتل یې.‌"

د امریکا ولسمشر جو بایډن هم د ترکیې، سویډن او فنلنډ ترمنځ د هوکړې ملاتړ کړی.

د بریتانیا لومړي وزیر بورېس جانسن دا عالي خبر بللی او پر خپل تویټر یې لیکلي "د سویډن او فنلنډ غړیتوب به زموږ ځلانده اېتلاف لا پیاوړی او خوندي کړي."