هندي محصلینو له محکمې غوښتي له حجاب سره ټولګي کې د کېناستو اجازه ورکړي

د هند په جنوبي ايالت کرناټک کې يوه عالي محکمه د هغو مسلمانو زده کوونکو په اړه چې غواړي په ټولګيو کې د حجاب په سرولو اجازه ولري پرېکړه کوي.

دا پرمختګ د شپږو ښځينه زدکوونکو له خوا د څو اوونيو لاريون وروسته رامنځ ته شوی دی.

لاريون کوونکې وايي چې ټولګيو ته ننوتلو اجازه نه ورکول کېږي، ځکه د کالج د مسوولينو ورته ويلي چې په ټولګيو کې دننه بايد حجاب لېرې کړي.

اوس دلته مسلمانو نجونو غوښتي چې له حجاب سره دې په ټولګيو کې دننه د کېناستو اجازه ورکړل شي. دوی وايي د هند اساسي قانون اجازه ورکوي هر څه چې وغواړئ اغوستلی شئ.

د کرناټک د پوهنې وزير ناګيش بي بي سي سره په خبرو کې وويل چې حکومت به ډېر ژر په دې اړه خپله قضيه د کرناټکا عالي محکمې ته وړاندې کړي چې راتلونکې اوونۍ به پرېکړه وشي.

د يوې زدکوونکې له خوا شوې عريضه کې راغلي چې د هند د اساسي قانون له مخې دوی د دې اجازه او حق لري هر څه يې چې زړه وي واغوندي.

په بله عريضه کې چې د پنځو لاريون کوونکو له خوا ويل شوي چې د حکومت له خوا خپرو شويو لارښونو کې د کالج لپاره د يونيفورم په اړه يادونه نه ده شوې.

دواړو غوښتنلیکونو د کېرالا ایالت د محکمې هغې پرېکړې ته هم اشاره شوې چې مسلمانو زدکوونکو ته یې د حجاب اغوستلو اجازه ورکړې ده.

د یوه ځايي کالج شپږ پېغلې زدکوونکې نجونې وايي، دوی ته له څو اونیو راهیسې ځکه په ټولګي کې د کېناستو اجازه نه ورکول کېږي، چې د ټیکري پرسرولو ټینګار کوي.

د کالج منتظمین بیا وايي، له نجونو یې غوښتي چې په ټولګي کې دې ټیکري نه پرسروي، خو د لیسې په ودانۍ کې دننه یې پرسرولای شي.

د کالج دا نجونې د نورو په څېر د کمیس، پرتوګ یونیفورم او یو کوچنی ټیکری چې 'دوپټه ' بلل کېږي، اغوندي، خو غواړي د سر ویښته هم پټ کړي.

د دې نجونو له ډلې یوه الماس اې ایچ نومېږي چې د بي بي سي هندي څانګې ته یې وویل: ''موږ یو شمېر نارینه ښوونکي لرو او د هغو پر وړاندې باید زموږ د سر ویښته هم پټ وي، له همدې کبله د حجاب اجازې غوښتنه کوو. ''

په هند کې د حجاب یا بورکې کاروول معمول دی، خو په دا وروستیو کلونو کې د دې هېواد یو شمېر مسلمانې او مسیحي ښځې شکایت کوي، چې له همدې کبله ګواښل کېږي.

دلته زدکوونکې وايي له دې امله يې زدکړې اغېزمنې شوې دي.