جو بایډن: اوس د پاڼې بدلولو وخت دی

وروسته له هغه چې د امریکا ټاکنیز کالج جو بایډن د تېر نومبر میاشتې د ولسمشرۍ ټاکنو ګټونکی اعلان کړ نوموړي ویل "اوس د پاڼې بدلولو وخت دی. "

د بري له اعلان وروسته ښاغلي بایډن په یوه وینا کې وویل د امریکا دیموکراسي "ټېل وهل شوه، وازمایل شوه او وګواښل شوه خو ولسواکي وښودله چې ریښتنې او پیاوړې ده. "

ښاغلي بایډن د ولسمشر ټرمپ هڅې چې د ټاکنو پایلو د بدلولو په خاطر یې وکړې وغندلې.

په همدې حال کې د روسیې ولسمشر ویلادیمیر پوتین ښاغلي بایډن ته د ولسمشرۍ په ټاکنو کې د بري مبارکي ویلې ده.

ډېرو نورو نړیوالو مشرانو د نومبر د دریمې له ټاکنو څو ورځې وروسته ښاغلي بایډن ته د بري مبارکي ویلې وه خو مسکو وايي دوی انتظار کاوه چې د ټاکنو رسمي پایلې اعلان شي.

د امریکا د ټاکنیز کالج د ۵۰ ایالتونو استازو په یوه غونډه کې د تېر نومبر د دریمې په ولسمشرۍ ټاکنو کې ډیموکراټ جو بایډن بریالی اعلان کړ.

د ټاکنیز کالج د پایلو له مخې، جو بایډن ۳۰۶ رایې ګټلې، خو د ولسمشر کېدو لپاره یې ۲۷۰ رایو ته اړتیا وه.

په مقابل کې ولسمشر ټرمپ ۲۳۲ رایې خپلې کړې دي.

که څه هم دا اعلان تشریفاتي بڼه لري، خو د امریکا د اساسي قانون له مخې د ټاکنیز کالج د ۵۳۸ استازو دا غونډه په ایالتونو کې اعلان شوې پایلې رسمي کوي.

د امریکا هرو ولسمشرۍ ټاکنو پسې د دسمبر له دویمې چارشنبې وروسته په لومړۍ دوشنبه د ټاکنیز کالج غونډه جوړېږي.

د دې پایلو له اعلان وروسته جو بایډن تلوېزوني وینا کې دا هم وویل، چې د خلکو غوښتنه برلاسې او ولسواکي جاري شوه:

"ما او کماله هرېس ۳۰۶ رایې وګتلې، دا هغه شمېر دی چې ډونلډ ټرمپ د ۲۰۱۶ کال ټاکنو کې ګټلې او پرېکند بری یې باله. زه هم د نوموړي د همغو خبرو له مخې سږنیو ټاکنو کې پرېکند بری ګټم."

د نوموړي په خبره، تر ۸۱ میلیون ډېرې رایې یې ګتلې چې دا د امریکا تاریخ کې خورا لوی شمېر دی:

"د رایو ګټلو کې له سیال سره تر ۷ میلیون رایو ډېر توپیر لرم. دا هرڅه د امریکا د ولسواک نظام کارندوالی ښيي."

نوموړي د خپلې ډلې او خلکو مننه وکړه او هم یې له امریکایانو وغوښتل چې د ټاکنیزو منډو ترړو حالت پرېږدي او د راتلونکي لپاره سره یو موټی شي.

اوس به څه کېږي؟

د ټاکنیز کالج پایلې واشنګټن ډي سي ته استول کېږي او مرستیال ولسمشر مایک پېنس په مشرۍ یې د جنورۍ پر شپږمه د کانګرس دواړه جرګې شمېري.

دې سره به جو بایډن ته لار جوړه شي چې د جنورۍ پر ۲۰ د ولسمشرۍ لوړه وکړي.

تېره میاشت ولسمشر ټرمپ وویل، که ټاکنیز کالج جو بایډن ګټونکی اعلان کړي، نو دی به د ولسمشرۍ دفتر پرېږدي.

که څه هم ټاکنو کې یې د درغلۍ بې سنده ادعاوې کړې، خو داسې نښې هم شته چې ترې تېر شي.

د ټاکنو سیستم

امریکایان په حقیقت کې په ټاکنیز کالج کې خپلو ایالتي استازو ته رایې ورکوي او وروسته دا کسان د پرونۍ غونډې په څېر د ولسمشرۍ د یوه نوماند صندوق ته رایه ورکوي.

دا مهال د امریکا ټاکنیز کالج ۵۳۸ استازي لري؛ ۴۳۵ د ولسي جرګې غړي، سل د مشرانو جرګې غړي او درې هم د واشنګټن ډي سي استازي.

د یوه ایالت د ټاکنیزو رایو شمېر هم د همغه ایالت د وګړو له مخې ټاکل کېږي.

کلیفورنیا چې ۴۰ میلیون وګړي لري، ۵۵ ټاکنیزې رایې لري او وایومینګ چې نږدې نیم میلیون وګړي لري، درې ټاکنیزې رایې لري.