ایرانی لوبغاړی چې ټرمپ یې د نه اعدامېدو غوښتنه کړې

په ایران کې دولتي تلوېزیون د شنبې په ورځ یو وېديويي کلیپ خپور کړی، چې په اعدام د محکوم شوي غېږنیونې اتل نوید افکاري خبرې پکې راخیستل شوې او دی مني چې د ۲۰۱۸ کال حکومت ضد مظاهرو پرمهال یې یو ساتونکی وژلی دی.

د افکاري وروستۍ وېډیو په ایران کې د بندیانو د اعتراف وروستۍ هغه ده چې د حقوقي ډلو له خوا د حکومت دا کړنه غندل شوې ده.

افکاري په دې وېډیو کې د اوبو د شرکت یوه امنیتي کارمن په اړه وايي: "دوه ګوزاره مې پرې وکړل".

خو په یوه بله وېدیو کې چې پر خواله رسنیو خپره شوې ده، وايي په زور اعتراف ترې اخیستل شوی دی.

د افکاري د اعدام په اړه نړیوالو نیوکې کړې دي. د امریکا ولسمشر ډونلډ ټرمپ له ایراني چارواکو غوښتي چې دغه ۲۷ کلن لوبغاړی اعدام نه کړي.

ټرمپ د پنجشنبې په ورځ په یوه ټوېټ کې لیکلي وو: "د ایران مشرانو ته، ډېر به مو منندوی یم که د دغه ځوان ژوند وژغورئ او اعدام یې نه کړئ".

تر لسو زرو ډېرو کسانو د افکاري د ژغورل کېدو غوښتنلیک لاسلیک کړی دی.

فعالان وايي، افکاري اوس د عنبر په نامه زندان ته لېږدول شوی دی.

په ایران کې یوې عالي محکمې دوه ځله د افکاري د اعدام حکم تایید کړ.

پر نوموړي تور دی چې یو ساتونکی یې تر مرګه وهلی دی.

په ایران کې د بشري حقونو د فعالانو د څرګندونو له مخې، د افکاري پر دوو وروڼو (وحید او حبیب) هم په ورته قضیه کې د ۵۴ او ۲۷ کلونو بند سزا ختلې ده.

د افکاري د کورنۍ وکیل حسن یونسي ویلي، ددې کورنۍ درې بچیان هم‌مهاله نیول شوي چې درې سره وروڼه اوس یوه نامالوم ځای ته لېږدول شوي او هېڅ لاسرسی ورته نه کېږي.