امریکا وینزویلا ته "د ایران صادراتي تېل وګرځول"

امریکا وايي،د هغو څلورو بېړیو بار یې ګرځولی چې له ایران یې وینزویلا ته تېل وړل.

والسټریټ جورنال چې اول دا خبر خپور کړ وايي، دا بېړۍ د امریکا په تګزاس ایالت کې هوسټن بندر ته تاو شوې دي او ژر به هلته ورسېږي.

امریکا د ایران د تېلو پر پلور بندیز لګولی دی.

د امریکا څارنوالۍ دې بندیزونو ته په پام له یوې محکمې د دې بېړیو د درولو اجازه اخیستې وه.

د امریکا د عدلیې وزارت ویاند دې خبر ته کوم غبرګون نه دی ښودلی.

رپوټ کې دا هم راغلي چې کله بندر کې بېړۍ ودرېږي، نو څو لوړپوړي چارواکي به یې وویني.

د ایران غبرګون

وینزویلا کې د ایران سفیر حجت سلطاني دا خبر د امریکا رواني جګړه او د دې بېړیو ایرانیتوب یې درواغ بللی دی:

"نه د ایران بېړۍ دي او نه هم مالک یا یې بیرغ په ایران پورې تړلی دی."

د والسټریټ جورنال رپوټ کې اشاره شوې چې د جورج جیالوزګول او د هغه زوی ماریوس د دې بېړیو د ملکیت یا ګټې اخیستلو حق لري.

ویل کېږي بېړۍ له نښتې پرته د امریکایانو لاس ته ورغلې دي.

اسوشېټېډ پرېس هم رپوټوي چې امریکايي چارواکو د بیمې شرکتونو، د بېړیو څېښتنانو او ماڼوګانو ته د بندیزونو په ګواښ سره دوی مجبور کړل چې بېړۍ ور وسپاري.

دا خبري اژانس وايي، له مودې راهیسې د دې بېړیو درک الې غلې وې.

لونا او پنډي بېړۍ د جولای پر لسمه خپل درک خاموش کړ او دا هغه وخت و چې د دوی د نیولو فرمان صادر شو.

د امریکا څارنوالۍ د دوو نورو بېړیو برینګ او بلا د نیولو غوښتنه هغه مهال هم وکړه، چې دوی د افریقا لوېدیځ کې وې.

د امریکا حکومت خپله غوښتنه کې دعوه کړې چې د ایران د سپاه پاسدران سره تړلی یو ایرانی سوداګر دې معامله کې ښکېل دی.

دوی وايي، دغه کس د قراردادي شرکتونو جوړولو سره چې د ځینو مالکان هم نور کسان دي هڅه کوله د بېړیو درک ورک کړي.

امریکا سپاه د ترهګرو ډلو نوملړ ته ور زیاته کړې ده او پر ایران او وینزویلا یې هم سخت اقتصادي بندیزونه لګولي دي.

امریکا د ډېر فشار سیاست سره غواړي ایران د اټومي او توغندیز پروګرام او سیمه ییزو هڅو پر سر خبرو ته تیار کړي.

ایران چې د امریکا له پخواني حکومت او پنځو نړیوالو قدرتونو سره اټومي تړون کړی و، وايي، د بیا خبرو لپاره کوم دلیل نشته.

ایراني چارواکي د خبرو لپاره د بندیزونو لرې کول مخ شرط اېښی دی.