کورونا وېروس: په امریکا کې د نویو ناروغانو شمېر په چټکۍ ډېر شوی

په امریکا متحدو ایالتونو کې د کورونا وېروس نویو ناروغانو شمېر خورا په چټکۍ ډېرېږي. د چهارشنبې پر ورځ ۵۲ زره نوي ناروغان ثبت شوي دي.

د هېواد په سویلي او لوېدیځو ایالتونو کې د نویو ناروغانو شمېر خورا په چټکۍ سره ډېر شوی دی او یو شمېر ایالتونو د قرنطین نرمښت ځنډولی دي.

په دغه هېواد کې د جان هاپکنزو پوهنتون مسوولین وايي ۲۷ لکه کورونا ناروغان ثبت شوي دي او نژدې ۱۲۵ زره کسان له همدې کبله مړه شوي دي.

د پاکستان په بلوچستان او خیبر پښتونخوا کې چارواکي وايي، د کورونا وېروس مخنیوي اقداماتو لړ کې په ښاري حدودو کې د اختر قرباني لپاره د څارویو منډيي یا بازار جوړولو اجازه نه ورکوي.

کورونا وېروس: په نړۍ کې د ناروغانو شمېر لس نیم میلیونو کسانو ته ورسېد

نړۍ کې د کورونا وېروس مثبتې پېښې تر لس میلیونو واوښتې

د بلوچستان حکومت ویاند لیاقت شاهواني وايي، د کوټې ښار په څنډو کې د څارویو د پلور یوه بازار اجازه ورکړل شي، چې کارکوونکي به ماسک کاروي او دغه بازار ته به د ماشومانو او سپین ږیرو پر ورتګ بندیز ولګول شي.

ځايي چارواکي وايي، په ټوله صوبه کې د مالونو پېر او پلور بازارونه څارل کېږي او د خوندیتوب له اقداماتو سر غړونکي به سملاسي مجازات شي.

په خیبر پښتونخوا کې د بلدیات مرستیال کامران بنګښ وايي، په ښاري سیمو کې به د څارویو پېر او پلور بازارونه ممنوع وي او د دغه ډول بازارونو لپاره به جواز او څارنه شرط وي.

د امریکا په کالفورنیا کې یو ځايي سړی چې د کورونا مخنیوي قرنطین پر مهال یې ټولنیز واټن نه و مراعت کړی، پر کورونا له اخته کېدو وروسته مړ شوی دی.

په یوه مېلمستیا کې له ګډون وروسته ۵۱ کلن تامس میکیس پر کوویډ - ۱۹ ناروغي اخته شو او له هغه وروسته یې پر فېسبوکپاڼه ولیکل:

'دا ټوکې نه دي. '

نوموړي دغه راز له خلکو غوښتي چې بې ماسکه بهر ته و نه وځي او په احتمالي ډول یې کورنۍ ته د ناروغي لېږدولو له کبله بښنه غوښتې:

''ما د خپل حماقت له کبله د مور، خوېندو او کورنۍ روغتیا له خطر سره مخامخ کړه، دا ډېره خواشینونکې تجربه ده. ''

د ټرمپ دریځ کې بدلون

بل لور ته د امریکا ولسمشر ډونلډ ټرمپ د ماسک کارولو په تړاو خبره بدله کړې او ویلي یې دي، د ماسک اغوستلو پوره ملاتړ کوي او که له نورو سره تړلي چاپېریال کې وي، نو پخپله به هم ماسک واچوي.

ولسمشر ټرمپ له فاکس نیوز تلوېزونه سره مرکه کې د پخوا اپوټه (برعکس) د کورونا مهارولو لپاره د ماسک کارولو په تړاو یو مخ متفاوت نظر درلود: "پوره ملاتړ یې کوم".

خو د ماسک اجباري کولو سره یې مخالفت وکړ.

امریکا کې ځینې ښۍ ډلې د کورونا د مخنیوي لپاره د ماسک اجباري کولو او نورو اړینو محدودیتونو سره مخالفې دي او د خپلې ازادۍ خلاف یې بولي.

ښاغلی ټرمپ پخپله کورونا وېروس ته په ځوابي چلن او ماسک کارولو ته د لږ اهمیت ور کولو له امله له ډېرو نیوکو سره مخ دی.

* 'نړۍ باید له کورونا وېروسه درس واخلي'

* ایا اسمان څکالي رښتیا هم کورونا وېروس لېږدوي؟

نوموړي مخکې ویلي و، د ولسمشر په توګه ځان له ماسک سره تصور کولی نه شي.

هغه څه مهال مخکې د یوې کارخونې په لیدلو کې خبریالانو ته وویل، د دوی په مخ کې ځکه ماسک نه کاروي، چې بیا یې له ماسک سره له انځور خوند اخلي.

ښاغلي ټرمپ د کورونا لومړیو کې دا وېروس کم اهمیت وباله او وروسته یې په تړاو داسې خبرې کولې چې له علمي موندنو سره په ټکر کې وي.

خو پر نوموړي سربېره د برازیل ولسمشر ژایر بولسونارو او د ایران مذهبي مشر ایت الله علي خامنه يي هم هغه مشران دي چې د کورونا لومړیو کې یې دا وبا کم اهمیته بلله.

د امریکا مختلفو ایالتونو د کورونا پېزوانولو یا مهارولو لپاره د محدودیتونو کمولو پروګرامونه ځنډولي دي.

ریکارډ پېښې

امریکا کې په تېرو ۲۴ ګړیو کې په کورونا ۵۲ زر ۹ سوه ۸۲ کسان اخته شوي چې په خپل ډول کې تر ټولو لوی شمېر او یو ریکارډ دی.

د جان هاپکنز پوهنتون د شمېرو له مخې، دې سره امریکا کې په کووېډ-۱۹ ناروغۍ د اخته کسانو شمېر تر دوه میلیونه او شپږ لکه کسانو واوښت.

په دغه هېواد کې له یو لک ۲۸ زرو ډېر کسان هم له دې ناروغۍ مړه شوي دي.

د امریکا د ویروسي ناروغیو د مرکز مشر ډاکټر انټوني فاوچي له دې مخکې خبرداری ور کړی و چې دغه هېواد کې د کورونا خپرېدلو چټکي کمه شوې نه ده او ښايي امریکا کې ورځانه له یو لک ډېر کسان په دې وېروس اخته شي.