ټرمپ د ولسي جرګې د استیضاح د څېړنې غونډه کې ګډون رد کړ

سپينې ماڼۍ ویلي د امریکا ولسمشر ډونلډ ټرمپ او د ده وکیلان به د چارشنبې په ورځ د ولسي جرګې د استیضاح استماعیه غونډه کې ګډون ونه کړي.

د سپینې ماڼۍ حقوقي سلاکار پټ سېپولون ولسي جرګې ته په یوله لیک کې ویلي، تمه نه لري چې ښاغلی ټرمپ به په دې غونډه کې ګډون وکړي ځکه د ده په وینا دا "منصفانه" نه ده.

شاوخوا یوه اونۍ وړاندې (لیندۍ ۶/نومبر ۲۷) د امریکا کانګرس د دې هېواد له ولسمشر ډونلډ ټرمپ وغوښتل، چې د ډېسمبر پر څلورمه د استیضاح اړوند استماعیه غونډو په یوه ناسته کې ګډون وکړي.

د امریکا د ولسي جرګې د قضایه کمېټې مشر جېروډ نډلر ویلي، ټرمپ په دې غونډه کې ګډون کولی او یا دې د ده په اړه د څېړنو پر بهیر نیوکې نه کوي.

ټاکل شوې په دغه غونډه کې به له ولسمشرۍ د ښاغلي ټرمپ د لیرې کولو لپاره پر قانوني دلايلو بحث وشي.

امریکایي کانګرس ولسمشر ټرمپ پوښتنو ته ور غوښتی

ټرمپ ته د طالبانو غبرګون؛ وروسته له هوکړې به اوربند سملاسي پلی شي

سپینې ماڼۍ دا جوته کړې نه ده چې ښاغلی ټرمپ به د استیضاح د استماعیه غونډو کومه بله جلسه کې ګډون وکړي او که نه، خو ویلي یې دي چې د استماعیه دویمې غونډې ته چې تر اوسه یې نیټه ټاکل شوې نه ده که وبلل شي ځواب به ورکړي.

ولسي جرګې ته د سپینې ماڼۍ لیک چې پولټیکو ورځپاڼې خپور کړی، پکې یې د ولسي جرګې استازي د " مناسب بهیر پرمخ نه بیولو او د بنسټیز انصاف پر نشتوالي" تورن کړي.

په دې لیک کې راغلي چې قضايه کمیټه د ډېسمبر د څلورمې نیټې په غونډه کې د سپینې ماڼۍ د ګډون لپاره حکومت ته د چمتوالي کافي وخت نه ورکوي او د شواهدو په اړه هم معلومات ورسره نه شریکیږي.

ښاغلي سېپولون ویلي، شاهدان ټول اکاډيمیک خلک دي او په دې کې به هېڅ حقیقي شاهد نه وي.

نوموړي زیاته کړې چې د پېښې شاهدان د پېښې په اړه د سترګو لیدلی حال ویلی شي، خو اکاډمیک شاهدان هغوی دي چې قاضي ته د نظر په ورکولو له هغه سره مرسته کوي.

د ولسمشر ټرمپ حقوقي سلاکار زیاته کړې، کمیټې درې شاهدان وربللي په داسې حال کې چې جمهوريپال توانیدلي چې یوازې یو کس ور وبلي.

ښاغلي سېپولون د ښاغلي جېروډ نډلر هغه ادعا رد کړه چې ویلي یې دي، د استیضاح دا بهیر له ټولو تاریخي استیضاح ګانو سره سمون لري او په دې استدلال کوي چې په ۱۹۹۸ کې د امریکا پخواني ولسمشر بېل کلېنټون تر ټولو مناسبه استماعیه غونډه درلوده.

نوموړي زیاته کړه، د دې لپاره چې په نورو استماعیه غونډو کې د ښاغلي ټرمپ سم استازیتوب وشي، ښاغلی نډلر باید ډاډ ورکړي چې په دغه بهیرونو کې د دوی حقونه خوندي دي او پروسه به عادلانه وي.

د چارشنبې د ورځې استماعیه غونډه د ټرمپ د استیضاح په اړه د څېړنو د دویم پړاو پیل دی چې وړاندې د امریکا په ولسي جرګه کې پیل شوې دي.

د څېړنو موضوع د امریکا د ولسمشر ډونلډ ټرمپ او د اوکراین د ولسمشر ویلادیمیر زلنېسکي ترمنځ ټلیفوني خبرې دي.

ښاغلي ټرمپ په دې ټلیفوني اړیکه کې د اوکراین له ولسمشر غوښتي و چې د امریکا د ولسمشرۍ نوماند جوبایډن او د هغه د زوی په اړه څېړنه وکړي.

ښاغلی بایډن اوسمهال د راتلونکو ولسمشریزو ټاکنو لپاره د ډیموکراټانو ترمنځ مخکښ سیال دی او زوی یې څو کاله وړاندې د اوکرایني انرژي شرکت بوریسما د مدیره پلاوي غړی و.

په څېړنو کې هڅه کیږي د دې سوال ځواب وموندل شي چې ایا ښاغلي ټرمپ اوکراین ته د نظامي مرستو په درولو هڅه کړې وه چې په دې کارسره پر اوکراین فشار واچوي او که نه.

خو ښاغلی ټرامپ له دې کارونو انکار کړی دی.