ورځپاڼې: امیتاب بچن په فلم کې د پاکستاني رول رد کړ

د ایکسپریس ټربیون ورځپاڼې په یوه مطلب کې ویل شوي چې د هند او پاکستان په اړیکو کې ستونزو اوس پر بالیووډ هم اغیز کړی، ځکه مشهور سینمایي ستوري امیتاب بچن په یوه فلم کې د یوه پاکستاني د رول له ادا کولو انکار کړی.

ورځپاڼه لیکي له دوو کلونو راهیسې د دې فلم د جوړوونکي او امیتاب تر منځ خبرې روانې وې:

"امیتاب هم دې رول ته خوشاله و ځکه د فلم اصلي لوبغاړي د سولې پيغام استاوه، خو کله چې په دې وروستیو کې د دواړو هېوادونو ترمنځ اړیکي له کړکیچ سره مخامخ شول نو هغه اوس د دې رول له ادا کولو ډډه کړې ده".

ډان ورځپاڼې په خپله سرمقاله د لومړي وزیر عمران خان د وروستیو څرګندنو ته کتنه کړې چې په افغانستان کې یې د منځ مهالې ادارې او په هند کې یې د واکمن ګوند په اړه کړې دي.

ورځپاڼه لیکي ښه دا ده چې عمران خان داسې څرګندونې ونه کړي چې تعبیر یې منفي کیدی شي او د نورو هیوادونو په کورنیو چارو کې لاسوهنه بلل کیږي.

ورځپاڼه لیکي وخت ډیر حساس دی او پاکستان له افغانستان او هند سره ښه اړیکي نه لري ، نو د ډان په وینا پکار ده چې واکداران پخه لاره خپله کړي.

ټایم مجلې د امریکایۍ ممثلې انجلینا جولي- چې د بشري حقونو په برخه کې هم فعاله ده- یوه لیکنه خپره کړې چې د افغان سولې لپاره په روانو هڅو کې د ښځو ونډې او اندیښنو ته پکې کتنه شوې ده.

دا وايي له روغې جوړې وړاندې څو مهمې مسلې دي چې باید په پام کې ونیول شي:

"لومړی دا چې د حکومت په مرکچې پلاوي کې باید د ښځو ونډه د پام وړ وي چې دوی خپله خبره وکړي. بله دا چې د ښځو اندېښنې او د دوی اړوند مسلې باید د سولې خبرو د ایجنډا مهمه برخه وي نه دا چې د حاشیوي مسلې په توګه ورته وکتل شي. دریم دا چې امریکا باید د افغان میرمنو د حقونو لپاره د سولې په خبرو کې ډیپلوماټیکې هڅې وکړي".

د دې په وینا امریکا او د افغان دولت نور ملاتړي هیوادونه باید په ډاګه کړي چې د داسې سولې ملاتړ نه کوي چې د ښځو حقونه پکې په پام کې نه وي نیول شوي.

انجلینا جولي په دې لیکنه کې دغه راز ټینګار کوي چې افغان میرمنې غواړي چې پوه شي د سولې په تړون کې د دوی پرحقونو سترګې نه پټیږي.

دا وايي که د ښځو حقونو ته پام ونه شي ټیکاو هم نه شي راتللای.

نوموړې په خپله لیکنه کې زیاتوي د دې لپاره چې احتمالي روغه جوړه وپايي پکار ده چې بشري حقونو ته پکې درناوی وشي.

نیویارک ټایمز ورځپاڼې لیکلي عربۍ نړۍ کې د اسراییلو د لومړي وزیر په توګه د بنیامین نتنیاهو بریا ته د خپلواک فلسطیني دولت پر تابوت د وروستي میخ په سترګه کتل کیږي.

په دې مطلب کې د یوه کارپوه له قوله ویل شوي چې د بنیامین نتنیاهو په بریا سره د فلسطیني خپلواک دولت او سولې لپاره د خبرو پرمخ دروازې تړل شوې.

د دې چارې بل لامل د د دې کارپوه په وینا فلسطینیان سره ویشلي دي او عربي نړۍ تر پخوا ډیره په کمزوري حالت کې ده.

د مطلب لیکوال وايي په تېر کې لیدل شوي چې پخوا داسې ډیر کم لیدل کیدل چې اسرائیلو دې له خپلې خوا یو اړخیز ګامونه پورته کړي وي.