د سعودي ولیعهد هرکلي ته پاکستان کې ۳۵۰۰ کوترې

پاکستان کې چارواکو د سعودي ولیعهد محمد بن سلمان د هرکلي په پار الوتنې لا منظمې کړې، لوکس هوټلونه یې ریزرف کړل، ۳۵۰۰ کوترې او رنګارنګ بالونونه یې راغونډ کړي چې د هغه په راتلو سره یې هوا ته پورته کړي.

په پام کې ده چې محمد بن سلمان د شنبې په ورځ اسلام اباد ته ولاړ شي.

پاکستان له سعودي تمه لري چې ولیعهد محمد بن سلمان اسلام اباد ته په خپل دوه ورځني سفر کې د پانګونې ځینې هوکړې لاسلیک کړي، چې ارزښت یې تر ۲۰ میلیاردو ډالرو رسېږي.

د فرانسې د خبري اژانس له مخې، د ولیعهد هرکلي ته د اسلام اباد پر سړکونو رنګارنګ د هرکلي پیغامونه ټومبل شوي.

یوه جګپوړي امنیتي چارواکي ویلي، پولیس، پوځ او د سعودي د شاهۍ کورنۍ ځانګړي ځواکونه هم د شهزاده د مېلمستیا ځای ته د امنیت نیولو لپاره رسېدلي.

د پلازمېنې اسلام اباد هغه سیمه بنده شوې ده، چې د پارلمانۍ ودانۍ او د ولسمشر دفتر پکې دي. ولیعهد محمد بن سلمان به د پاکستان له لومړي وزیر او د پوځ له مشر سره هم وګوري.

اسلام اباد کې چارواکو ویلي، دوو پنځه ستوریزو هوټلونو ته ویل شوي چې له وړاندې د هوټل نیولو لړۍ بنده کړي او ټولې خونې د شهزاده ډلې ته ځانګړې کړي.

شهزاده دا سفر داسې مهال کوي چې د اسلام اباد او هند ترمنځ اړیکي یو ځل د هند تر ولکې لاندې کشمیر کې د هغه ځانمرګي برید له کبله بیا ترینګلي شوي، چې لږ تر لږه ۴۱ کسان پکې ووژل شول.

شهزاده محمد به له پاکستان وروسته هند، چین، مالیزیا او اندونیزیا ته هم سفرونه وکړي.

پاکستان تمه لري چې سعودي به د عرب سمندر ته څېرمه ګوادر کې د تېلو د یوه چاڼځي قرارداد هم لاسلیک کړي چې د چین - پاکستان ترمنځ تر ټولو لوی اقتصادي مرکز ګڼل کېږي.

له څو میاشتو راهیسې عمران خان هڅه کوي چې په منځني ختیځ کې د پاکستان د بودیجې لپاره یوڅه ومومي.‌

د "وال سټریټ جورنال" یوه رپوټ کې راغلي، سعودي او اماراتو اسلام اباد ته شاوخوا ۳۰ میلیارد ډالر د پور او پانګونې لپاره ورکړي.

پاکستان او سعودي له افغان طالبانو سره هم د جوړجاړي په هڅو کې د خبرو مېز ته د هغوی د راکشولو هڅه کوي.

د پاکستان پخواني لومړي وزیر نواز شریف ویلي، له سعودي سره د پاکستان د دغو قرارادادونو خبره د ده د واکمنۍ پرمهال شوې وه.

سعودي عربستان پاکستان ته د تېلو لوی صادروونکی هېواد دی او سعودي کې شاوخوا ۱٫۹ میلیون پاکستانیان کار کوي.

سعودي عربستان په ۲۰۱۴ کال هم پاکستان ته ۱٫۵ میلیارد ډالر پور ورکړی و.