سومالیا: درنې چاودنې پلازمېنه کې لږ تر لږه ۳۰ کسان وژلي

د صومالیا پلازمېنې موګادېشو کې یوې زورورې چاودنې لږ تر لږه ۳۰ کسان وژلي دي. ځايي پولیسو ویلي، لسګونه نور کسان پېښه کې ټپیان شوي دي. پېښه د یوه هوټل درشل کې هغه مهال وشوه، چې له باروتو ډکه لارۍ وچاودېده.

پولیس وايي د ښار مدینه نومې سیمه کې د یوې بلې بمي چاودنې له کبله دوه کسان وژل شوي دي. تر اوسه معلومه نه ده، چې برید چا کړی دی، خو له دې مخکې موګادېشو کې د القاعده اړوند الشباب ډلې خونړي بریدونه کړي دي. دغه ډله له حکومت سره جګړه کوي.

له لومړۍ چاودنې وروسته یوه پولیس افسر محمد حسین رویټرز خبري اژانس ته ویلي:

''دا لارۍ چاودنه وه، تلفات شته، خو موږ ته یې کره شمېره لا هم ځکه نه ده معلومه، چې د پېښې ځای کې اور بلیږي. ''

د پېښې عیني شاهدانو بي بي سي ته ویلي پېښه کې لسګونه کسان وژل شوي دي.

صومالیا کې د بي بي سي خبریال وايي، سفاري نومي هوټل له یوه سره نړېدلی دی او داسې وېره شته چې ښايي تر خاورو خځلو لاندې یې خلک هم شته. د موګادېشو یوه اوسېدونکي محی الدین اي ایف پي خبري اژانس ته ویلي:

تر اوسه مې دومره لویه چاودنه نه وه لیدلي، ټوله سیمه یې له خاورو سره خاورې کړې ده.