م. م: غزه تراډه د اوسنیو ۲ ميليون اوسېدونکو لپاره د ژوندانه وړ نه ده

غزه تراړه د خپلو دوو ميليونو اوسېدونکو لپاره نور د ژوندانه وړ نه ده. دا د ملگرو ملتونو د وروستيو پلټنو موندنې دي.

د بشري وضعې په تړاو د دغې ادارې په تازه خپاره شوي رپوټ کې راغلي، په غزه کې عوايد، روغتيايي خدمتونه، زده کړې، برېښنا او د څښاک تازه اوبه ټول مخ په کمېدو دي.

د ملگرو ملتونو وياند "روبرت پايپر" وايي په دغه سيمه کې بشري حالت مخ په خرابېدو دى او په وينا يې د لا ناوړه بشري حالاتو په لور د غزې د خوځېدو بهير د پخوانيو وړاندوينو پرتله چټک او لمنه يې ډېره پراخه ده.

نوموړي په غزه تراډه کې روان حالت سوکه منفي وده وبلله او زیاته یې کړه: "زه په غزه کې د دوه ميليون وگړو د زندۍ کولو يو فوق العاده بشري ضد او ناعادلانه بهير گورم. دا خلک هېچا لپاره گواښ نه دي."

ښاغلی پایپر غزه نور د ژوندانه وړ نه بولي او وايي:" کله چې تاسو په ورځ کې دوه ساعته برېښنا لرئ، ٦٠ سلنه ځوانان بې روزگاره دي، زمينې او شونتياوې ډېرې کمې دي نو زما لپاره دا د نه ژوندانه وړ له حد او بريده اوښتل دي، او دا ډېر وړاندې شوي."

حماس په ٢٠٠٧ م کال کې د فلسطين خپلواکې ادارې ته وفادار ځواکونه له غزې وشړل او اسراييلو چې حماس ترهگره ډله بولي، سيمه کلابنده کړه.

اسراييلي حکومت او مصر غزې تراډې ته د توکو د لېږد را لېږد او د خلکو د تگ راتگ بهير محدود کړ.

سمندر ته د غزوالو لاس رسى هم کم شو. د حماس او په لوېديځه غاړه کې د مېشتې فلسطيني کورواکې ادارې ترمنځ وېش او توپيرونه لا ژور شوي.

مخالفتونه د دې لامل شول چې فلسطيني اداره غزې ته مالي مرستې ودروي او له اسراييلو هم وغواړي چې پر سيمې برېښنا کمه کړي.