چین او روسیه د سپوږمۍ پر سطحه فضايي اډه جوړوي

چین او روسیه د سپوږمۍ پر سطحه د فضايي تمځای جوړولو پلان لري. د روسیې فضايي ادارې روسکوزموس ویلي، د چین له ملي فضايي ادارې سره یې یوه هوکړه لاسلیک کړې چې له مخې به یې د سپوږمۍ پر سطحه د څېړنیزې اسانتیاوې ډېرې کړي.

په دواړو هېوادونو د فضايي ادارو له لوري په خپرو شویو ویناپاڼو کې ویل شوي، چې دا تمځای به د نورو هېوادونو د ګټې اخیستو لپاره هم وي.

دواړو هېوادونو دا هوډ داسې مهال کړی، چې روسیه فضا ته د لومړي ځل لپاره د انسان استولو ۶۰مې کلیزې لمانځلو ته چمتووالی نیسي.

د روسیې او چین د فضايي ادارو په خبره، پر سپوږمۍ د نړیوالو څېړنیو تمځای کې به په پراخه کچه ساینسي څېړنې کېږي چې د سپوږمۍ په اړه څېړنې به هم پکې وي.

چین او روسیه به فضا کې د ساینس په اړه خپلې تجربې له یو او بل سره شریکوي.

روسیه او چین دواړه به د څېړنیزې اډې د لا پراختیا لپاره له یو بل سره همکاري هم کوي.

د چین د فضايي پروګرام یو متخصص شنونکي چېن لان فرانس پرېس خبري اژانس ته ویلي، دا پروژه یوه "لویه معامله" ده.

دی وايي: "دا به د چین لپاره د نړیوالې فضايي همکارۍ یوه تر ټولو لویه پروژه وي، نو ځکه مهمه ده".

که خبره د فضايي څېړنو د نړۍ شي، چین تر نورو هېوادونو یوڅه وروسته دی، خو په تېره ډیسمبر میاشت کې یې د چین چېنج۵ فضايي بېړۍ په بریالیتوب له سپوږمۍ نه خاور راوړه.

په دې سره اوس شنونکي پر دې اند دي چې چین هم په فضا کې د خپلې وړتیا لړولو په تکل دی.

امریکا اعلان کړی چې تر ۲۰۲۴ کال پورې به سپوږمۍ ته بېرته خپلې فضايي بېړۍ واستوي.