د سوېلي افریقا پخواني ولسمشر ځان پولیسو ته وسپاره او زندان ته لاړ

د سوېلي افریقا پخواني ولسمشر جیکوب زوما چې د محکمې له حکم د سرغړونې له امله پر ۱۵ میاشتې بند محکوم شوی بېګا شپه یې ځان پولیسو ته تسلیم کړ او زندان ته لاړ.

ټاکلې وه د یکشنبې په ورځ بند ته لاړ شي، خو ملاتړو یې له کور انساني دېوال جوړ کړ، ځکه پولیسو د چارشنبې تر نیمې شپې وخت ور کړی او ګواښلی یې و، که زندان ته لاړ نه شي، په زور به ونیول شي.

۷۹ کلن زوما د سوېلي افریقا لومړنی ولسمشر دی چې په بند محکومېږي او زندان ته ځي.

نوموړی خپل ټاټوبي زولو ناتال ولایت کې محبوبیت لري او سوېلی افریقا کې د تبعیض پرضد پاڅون کې د نېلسن منډېلا ملګری و.

خو اوس محبس ته تګ او د مالی فساد تور- چې له امله یې له واک لرې شو- ښايي په واکمن ګوند اې اېن سي کې د شرم سبب شي.

سوېلي افریقا کې د بي بي سي خبریال نومسا ماسکو- چې د زوما لوکس کور ته نږدې تللی- وایي، د یکشنبې په څېر د چارشنبې په ورځ هم د نوموړی د کور شاوخوا ډېر پلویان ټول شوي وو او زندان ته یې د نوموړي د تګ مخنیوی غوښت، خو پولیس هم ډېر وو.

هغه زیاتوي د چارشنبې ورځې له ماښام څو ګړۍ وروسته د ګاډو کاروان چې ښاغلی زوما به هم یوه کې و، د نوموړي له کور روان او د پولیسو له خوا ټاکلې نېټې له پای ته رسېدو څو دقیقې مخکې د خپل کور سره نږدې زندان ته یووړل شو.

د نوموړي بنسټ هم لنډ بیان کې لیکي: "ولسمشر زوما پرېکړه کړې چې د بند تېرولو حکم په ځان ومني."

ښاغلی زوما له هغه وروسته پر ۱۵ میاشتې بند محکوم شو چې د خپلې نهه کلنې واکمنۍ په موده کې د فساد پلټنو په هکله یې د شاهدي ورکولو لپاره د محکمې له حکم سرغړونه وکړه.

ځینې سوداګر له سیاستوالو سره په ګډو دسیسو تورن دي چې د نوموړي د واکمنۍ پر مهال په پرېکړو کې لاسوهنه کړې ده.

ښاغلی زوما بیا بیا ځان د سیاسي دسیسې قرباني بولي او وايي، عمر او دغه هېواد کې د کورونا خپرېدو حالت ته په پام یې زنداني کول د اعدامولو په مانا دي.

که څه هم نوموړی پر ۲۰۱۸ کال د خپل ګوند افریقا ملي کانګرس له خوا له واک لرې کړل شو، خو بیا هم ګڼ شمېر پلویان لري په تېره خپل ټاټوبي کوازولو ناتال کې