کولمبیا کې د پوځي الوتکې غورځېدو پېښه کې ۶۶ کسان وژل شوي

د کولمبیا د هوايي ځواک یو الوته د هېواد په جنوب کې له پرواز لږ وروسته ولېدلې چې له امله یې ۶۶ کسان وژل شوي او لسګونه نور ژوبل شوي دي.

د هوايي ځواک قوماندان، کارلوس فرنېندو سېلوا رویدا، ویلي الوتکې کې ۱۱۴ پوځیان او ۱۱ کسیزه عمله موجوده وه.

د امریکايي ساخت سي ۱۳۰ هرکولیس دا الوتکه د پوځیانو د لېږد لپاره کارول کېده چې د کولمبیا د پوټو مایو ایالت کې راوغورځېده.

سیمې ته ژغورونکي او پلټونکي استول شوي، خو تراوسه د الوتکې د سقوط علت معلوم نه دی. چارواکي وايي د دوی پلټنې روانې دي.

د کولمبیا د دفاع وزیر، پېډرو سانچېز وویل پېښې سره سم په الوتکه کې شته چاودېدونکو توکو هم اور واخیست.

دا د کولمبیا د هوايي ځواک په تاریخ کې یوه تر ټولو خونړۍ پېښه بلل شوې ده. په ټولنیزو شبکو خپرو شوو کې لیدل کېږي چې د پېښې له ځایه لوګی پورته کېږي.

دغه راز ځايي خبري رسنیو د خلکو انځورونه خپاره کړی چې ژوبل په موټرسایکلونو روغتون ته لېږدوي.

د کولمبیا ولسمشر ګوساتوو پېټرو د پېښې په اړه پر ایکس لیکلي "دا پېښه باید نه واي شوې، ددې علت هغه بیوروکراسي ده چې د وسله وال ځواک عصري کولو هڅو پرمخ کې خنډ کېږي". ده وړاندې لیکلي چې په دې برخه کې به نور ځند ته اجازه نه ورکوي.

تېره میاشت د بولوویا د هوايي ځواک یوه سي ۱۳۰ الوتکه هم لوېدلې وه چې له امله یې لږ تر لږه ۲۰ کسان وژل شوي وو.