منځني ختیځ کې ډېرېدونکی کړکېچ؛ دمشق کې د سپاه پاسداران پر اهدافو هوايي ګوزارونو مرګژوبله اړولې

د ایران دولتي رسنیو د سوریې پلازمېنه دمشق کې په هوايي بریدونو کې د مرګژوبلې اوښتلو خبر ورکړی دی.

د دغو رسنیو رپوټونو کې راغلي، چې په دغو بریدونو کې د ایران د سپاه پاسداران ځواکونو یو اړوند ځای په نښه شوی دی.

تر اوسه دا نه دي ویل شوي، چې دغه بریدونه چا کړي خو مخکې د ورته ډېرو نورو بریدونو پړه پر اسرائیل اچول شوې ده.

د سوریې رسنیو هم ویلي چې دمشق کې دا تازه برید "اسرائیل" کړی دی.

سوریه کې پر سپاه پاسداران دا بریدونه داسې مهال شوي، چې د امریکا متحدو ایالتونو تېره ورځ په ګاونډي اردن کې د دوی پر یوه پوځي اډه د چاودېدونکي ډرون د یوه برید خبر ورکړ او ویې ویل چې درې سرتېري یې وژل شوي او ۳۰ نور ټپيان دي.

د امریکا ولسمشر جو بایډن ویلي وو چې دا برید په عراق او سوریه کې هغو فعالو سختدریځه وسله والو کړی، چې د ایران له ملاتړه برخمن دي.

خو ایران له دې پېښه سره خپل هر ډول تړاو رد کړی دی.

رویټرز خبري اژانس د "شام اېف اېم" او یوه عیني شاهد په ګډون د یو شمېر ځايي رسنیو په حواله لیکلي چې د دوشنبې ورځې برید د دمشق څنډه کې د بي بي زینب د زیارت مجتمع ته نږدې شوی دی.

هممهاله د ایران ځايي متحدانو ته یوې نږدې سرچینې هم رویټرز ته تایید کړې، چې په برید کې د سپاه پاسداران ځواکونو یوه اړونده ودانۍ په نښه شوې.

المیادین هم لیکلي چې د چاودنې غږونه د دمشق سویل کې له 'سیده زینب' سیمې اورېدل شوي.

د سوریې دولتي چارواکو او رسنیو تر اوسه پر دغو بریدونو تبصره نه ده کړې.

د سوریې د بشري حقونو سازمان مشر رامي عبدالرحمن چې په لندن کې مېشت دی، وايي: "د اسرائیل بریدونوک ې د سپاه پاسداران او حزب الله اړوند یوه مرکز په نښه شوی، چې د ایران پلوه ځواکونو شپږ کسان پکې وژل شوي، او څرګنده نه ده چې ایا غیرنظاامیانو ته هم مرګژوبله اوښتې که نه."