ملاریا پر وړاندې د مبارزې نړیواله ورځ؛ افغانستان کې یې تېر کال له ۱۲۵ زرو ډېرې پېښې ثبت شوې
د عکس سرچینه، Getty Images
د روغتیا نړیوال سازمان او د افغانستان عامې روغتیا وزارت وايي چې تېر کال دغه هېواد کې د ملاریا ۱۲۵ زره ۷۸۸ مثبتې پېښې ثبت شوې دي.
دا مالومات د ملاریا پر وړاندې د مبارزې نړیوالې ورځ په مناسبت خپاره شوي.
د روغتیا نړیوال سازمان پر خپله ټویټر پاڼه لیکلي چې د ملاریا د دغو پېښو نږدې ۹۰ سلنه یوازې د دغه هېواد په څلورو ختیځو ولایتونو ننګرهاره، لغمان، کونړ او نورستان کې ثبت شوې.
دا شمېر اوړم (۲۰۲۱) کال افغانستان کې د ملاریا د ثبت شویو مثبتو پېښو پرتله ۴۵ سلنه زیاتوالی ښيي.
خو د افغانستان د عامې روغتیا وزارت ویاند شرافت زمان بي بي سي ته په استولي غږیز پیغام کې ویلي چې له ۲۰۱۶ تر ۲۰۲۲ کال پورې په افغانستان کې د ملاریا پېښې نږدې ۶۷ سلنه کمې شوې دي.
دی زیاتوي چې په ۲۰۲۲ کال کې د ملاریا د ډېرو پېښو د ثبتېدو لامل دا دی چې ګوندې اوس خلک ډېر روغتیایي خدماتو ته لاسرسى لري، نو ځکه یې پېښې ډېرې ثبتېږي.
نوموړی وايي تېر کال د ملاریا له کبله افغانستان کې د مړینې کومه واقعه هم نه ده ثبت شوې.
د ښاغلي زمان په وینا افغانستان کې د ملاریا د ثبت شویو پېښو نږدې ۹۶ سلنه د دې ناروغۍ د پلارسمودیم وای واکس بڼه ده.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
د طالبانو حکومت کې د عامې روغتیا وزارت یاند وايي، دوی له نړیوالې ټولنې غواړي چې په بشړ ډول د ملاریا پېښو لمنځه وړلو کې همکاري ورسره وکړي.
ملاریا ژوند ګواښونکې ناروغي ده چې د غوماشو په وسیله انسانانو ته خپریږي. خو د دې ناروغۍ مخنیوی ممکن دی او درملنه یې هم شته.
د روغتیا نړیوال سازمان د معلوماتو له مخې د نړۍ نږدې نیمایي وګړي د دې ناروغۍ له خطر سره مخ دی.
افغانستان د نړۍ له هغو هېوادونو دی، چې لاهم د ملاریا ناروغي پکې ډېره ده او زرګونه خلک په تېره بیا ګرمۍ موسم کې پرې اخته کېږي.
دغه سازمان او ملګرې ادارې یې سږکال د ملاریا ناروغۍ نړیواله ورځ د هغو هیوادونو په لاس ته راوړنو لمانځي چې ملاریا یې په بشپړه توګه محوه کړې.
