روغتیا نړیوال سازمان: له پاکستانه د افغان کډوالو ستنېدو سره افغانستان کې د ګوزڼ ناروغۍ خپرېدو ګواښ ډېر شوی

د روغتیا نړیوال سازمان ویلي، سره له دې چې په تېرو څلورو میاشتو کې په افغانستان کې د ماشومانو د ګوزڼ (پولیو) کومه مثبته پېښه نه ده ثبت شوې، خو له پاکستانه د افغان کډوالو له ستنېدو سره دغه هېواد کې د یادې ناروغۍ خپرېدو ګواښ ډېر شوی دی.

دغه سازمان داسې مهال اندېښنه څرګنده کړې چې، د افغانستان په شلو ولایتونو کې سبا دوشنبه د اګسټ پر ۲۵مه د ګورڼ ضد واکسین کولو کمپاین پیلېږي.

دا کمپاین لا دمخه پرون د ختیځ زون په ۴۲ ولسوالیو کې چې د دې ویروس ګواښ پکې ډېر دی پیل شوی دی.

د روغتیا نړیوال سازمان پر خلکو غږ کړی چې، خپل له پنځو کلونو کم عمره ماشومانو ته د ګوزڼ ضد واکسین وکړي او له عمري معلولیته یې وژغوري

افغانستان کې د طالبانو حکومت روغتیا وزارت هم د یوې خبرپاڼې په خپرولو سره ویلي، د نړیوالو بنسټونو په مرسته به د کمپاین د ډسمبر پر ۲۵مه پیل کړي او تر ۲۸تمې نېټې به دوام وکړي.

د یاد وزارت په وینا: "همدا کمپاین د ختیځ زون په ۴۲ ولسولیو کې چې د پولیو ویروس ګواښ پکې لوړ دی د ډسمبر پر ۲۳مه یل شوی او تر ۲۹مې نېټې به دوام وکړي. په دې کمپاین کې به له لس کلنۍ کم عمره ماشومانو ته د پولیو ضد واکسین وشي."

د طالبانو حکومت د عامې روغتیا وزارت وايي، پام کې ده چې د پولیو پر ضد اوسني کمپاین کې اته اعشاریه اته میلیونه ماشومانو ته د پولیو ضد واکسین ورکړل شي. د طالبانو عامې روغتیا وزیر ډاکټر قلندر عباد سږکال په افغانستان کې د پولیو مثبتې پېښې د اندېښنې وړ بللی او ویلې یې دي چې، د خپلو شریکانو په ملاتړ به تر هغه په افغانستان کې د پولیو پرضد کمپاینونه روان وي چې دا ناورغي ختمه شوې نه وي.

افغانستان او پاکستان اوس مهال په نړۍ کې یوازیني دوه هېوادونه دي، چې د پولیو یا ماشومانو د ګوزڼ مثبتې پېښې په کې شته.

په ۲۰۲۳ کال کې په افغانستان کې د پولیو شپږ مثبتې پېښې ثبت شوې چې ټول یې په ختیځ ننګرهار ولایت کې وې.

پوليو يوه ويروسي ناروغي ده، چې درملنه نه لري او يوازې د واکسين په مټ یې مخنیوي کېدای شي.

کوم ماشوم چې په دې ناروغۍ اخته شي د ټول عمر لپاره به معیوبه وي او ان د مرګ لامل یې هم کېدای شي.

کارپوهان پولیو سره په مبارزه کې د خلکو ونډه او همکاري اړینه بولي او وايي" که د پولیو پرضد د واکسین کولو کمپاینونو کې خلک خپل ماشومان واکسین کړي، لرې نه ده چې افغانستان هم له دې ناروغۍ نه پاک شي."