پاکستان د ګوزڼ مخنیوي لپاره له افغانستان سره د 'جدي خبرو' وړاندیز کړی

پاکستان د پوليو يا ګوزڼ ناروغۍ له منځه وړلو لپاره افغانستان سره د جدي خبرو وړاندیز کړی او ويلي یې دي چې له دې ناورغۍ سره د مبارزې لپاره باید د دواړو هېوادونو چارواکي پایله لرونکې خبرې وکړي.

که څه هم په روان ۲۰۲۴ کال کې په افغانستان کې تر دې دمه د پولیو کومه مثبته پېښه نه ده رپوټ شوې، خو پاکستان کې څو پېښې ثبت شوې دي. پاکستاني چارواکي د ډېرو پېښو لامل د دواړو هېوادونو تر منځ د خلکو تګ راتګ بولي.

د پاکستان عامې روغتيا لپاره د لومړي وزير مرستيال ډاکټر مختيار احمد په نړۍ کې ګوزڼ ضد مبارزه کونکي بیل او ملنډا ګېټس بنسټ د غړو سره لېدنه کړې.

د روغتيا خدماتو اداري په بيان کې ویل شوي چې د ګوزن ضد هلو ځلو لپاره ي پاکستان سره په خپل شراکت ټینګار کوي او دې لړ کې يې د پاکستان هلې ځلې ستايلې دي.

ملک مختار احمد وويل چې تر ۲۰۲۶ پورې پاکستان د پوليو نه پاکولو په هلو، ځلو کې روان کال ډېر ارزښت لري. ښاغلي مختار احمد دې لړ کې افغانستان سره پر ډېورنډ کرښه د خلکو د زيات تګ راتګ له کبله پر رامنځته شویو ننګونو هم خبرې وکړې او ویې ويل چې وروستيو کې په ځينو سيمو کې د ګوزڼ د پېښو اصلي لامل همدا د خلکو ډېره ګڼه ګوڼه ده.

هغه د افغانستان او پاکستان تر منځ د جدي او پايلې لرونکو خبرو پر اړتیا ټینګار وکړ چې د پولیو ویروس سره په اغېزمنه توګه مبارزه وشي.

افغانستان او پاکستان اوسمهال په نړۍ کې یوازیني هېوادونه دي چې د پولیو ناروغي په کې لا هم شته.

پاکستان کې روان کال تر دې دمه د ګوزڼ دوې مثبت پېښې ثبت شوې دي، خو تېر کال دغه شمېر شپږ تنه و.

بلخوا افغانستان کې روان کال کې که څه هم د پولیو کومه مثبته پېښه نه ده ثبت شوې، خو تېر ۲۰۲۳ کال کې شپږ مثبتې پېښې ثبت شوې وي چې ټول یې په ختیځ ننګرهار ولایت کې وې.

تېره میاشت په افغانستان کې د پولیو یا ګوزڼ د تشخیص لابراتوار د بېل ګېټس بنسټ، روغتیا نړیوال سازمان او د پولیو د لابراتوارونو د نړيوالې شبکې په ملاتړ جوړ او پرانیستل شو.

په افغانستان کې د طالبانو حکومت عامې روغتیا وزارت دا په افغانستان کې د پولیو د تشخیص لومړنی لابراتوار بللی او ویلي يې دي چې له دې وړاندې د پولیو د وېروس تشخیص په پاکستان کې کېده.

افغان روغتیايي چارواکي وايي دا لابراتوار ورسره مرسته کوي چې د پولیو پروګرام يې بډایه کړي او غواړي په روان ۲۰۲۴ کال کې له افغانستانه پولیو له منځه یوسي، خو په دې برخه کې د خلکو همکاري اړینه بولي.

د یادونې ده چې د روغتیا د نړیوال سازمان ډبلیو اېچ او چارواکو په دې وروستیو کې له افغان چارواکو سره په خبرو کې ډاډ ورکړ چې د پولیو په له منځه وړولو کې به پوره همکاري ورسره کوي.