د طالبانو د حکومت سوداګریز پلاوی بنګله‌دېش ته ولاړ؛ کابل له ډاکې سره د اړیکو پراخولو هڅه کوي

د طالبانو حکومت وایي، د صنعت او سوداګرۍ وزارت یو پلاوی د ۵۰ سوداګرو په ملتیا بنګله‌دېش ته تللی دی.

ویل شوي، دا پلاوی د یاد وزارت د معین احمدالله زاهد په مشرۍ، د دواړو هېوادونو ترمنځ د سوداګریزو اړیکو په اړه د خبرو لپاره د بنګله‌دېش پلازمېنې ډاکې ته روان شوی دی.

د وزارت د خبرپاڼې له مخې، د دې سفر موخه د صادراتو او وارداتو لپاره د اسانتیاوو رامنځته کول، د ګډو پانګونو فرصتونه ارزول او په راتلونکي کې د ګډو هوکړه‌لیکونو لاسلیک کول دي.

د کابل او ډاکې اړیکې په کوم پړاو کې دي؟

د ۲۰۲۴ کال د جولای د لاریونونو پر مهال، په بنګله‌دېش کې د شیخ حسینه سیکولر حکومت نسکور شو. ټاکل شوې د دې هېواد خلک د فبرورۍ په ۱۲مه، د پارلمان د غړو د ټاکلو تر څنګ، د اساسي قانون په اړه هم په ټول‌پوښتنه کې برخه واخلي او د خپل هېواد د راتلونکي سیاسي جوړښت په اړه پرېکړه وکړي.

د بنګله‌دېش د لنډمهالي حکومت لوړپوړي سلاکار پروفیسور محمد یونس د ۲۰۲۵ کال د جون په میاشت کې لندن ته د سفر پر مهال، د نړیوالو اړیکو د شاهي انسټیټیوټ (چتم هاوس) کې وویل، هېواد یې نوې بهرنۍ تګلاره غوره کړې، داسې تګلاره چې "ټولو ته د دوستۍ لاس غځوي."

کارپوهان دا بدلون د پخوانۍ لومړۍ وزیرې شیخ حسینه له "هند‌محور" سیاست څرګند اوښتون بولي. د ډاکې او کابل ترمنځ د اړیکو نژدېوالی، که څه هم لا ډېر تود نه‌دی خو د همدې نوې تګلارې په چوکاټ کې ارزول کېږي.

د ۲۰۲۵ کال په سپټمبر میاشت کې د بنګله‌دېش د دیني عالمانو یو اوه کسیز پلاوي چې مشري یې مولانا مأمون‌الحق کوله، د "طالبانو د حکومت په بلنه" افغانستان ته سفر وکړ.

بنګلا نیوز۲۴ راپور ورکړی چې دا سفر د دواړو هېوادونو ترمنځ د علمي او ډیپلوماټیکو اړیکو پیاوړتیا او همداراز د سوداګرۍ، روغتیا او پوهنې په برخو کې د همکاریو پر پراخولو ورټول و.

همدارنګه، د ۲۰۲۵ کال د ډسمبر په وروستیو کې څو سیمه‌ییزو رسنیو د فرانس پرېس له قوله راپور ورکړ، د طالبانو د حکومت د بهرنیو چارو وزارت لومړي سکرتر نور احمد نور (چې دا مهال په نوي ډيلي کې د طالبانو استازی بلل کېږي) بنګله‌دېش ته سفر کړی دی.

طالبانو د ښاغلي نور د سفر په اړه څه نه‌دي ویلي خو د پاکستان ډان ورځپاڼې او د هند ټایمز اف انډیا دا سفر د "سیاسي اړیکو د پراخولو" او د بنګله‌دېشي اسلام‌پالو له لوري "د فبرورۍ د ټاکنو تر مخه د نفوذ د ترلاسه کولو هڅه" بللې ده.

په ډاکه کې د ډیپلوماټیکو چارو کارپوه پوریمول پالما بي‌بي‌سي دري ته ویلي، د ښاغلي نور سفر شخصي او غیررسمي و او نوموړی د یوه فکري بنسټ په غونډه کې د ګډون لپاره بنګله‌دېش ته تللی و.

د هغه په وینا، بنګله‌دېش تر اوسه د طالبانو حکومت په رسمیت نه‌ دی پېژندلی او له همدې امله د دواړو هېوادونو ترمنځ هېڅ رسمي اړیکه نه‌شته.

د طالبانو د بهرنیو چارو وزارت د ویب‌پاڼې د معلوماتو له مخې، افغانستان په ډاکه کې سفارت لري، خو په افغانستان کې د بنګله‌دېش هېڅ فعاله سیاسي استازولي نه‌شته.

د افغانستان د صنعت او سوداګرۍ خونه: د سوداګرۍ د پراخېدو لپاره لوی ظرفیت شته

د افغانستان د صنعت او سوداګرۍ خونه وایي، د افغانستان او بنګله‌دېش ترمنځ د سوداګرۍ لپاره ښه ظرفیتونه شته او د افغانستان یو پلاوی به په بنګله‌دېش کې په یوه سوداګریز نندارتون کې ګډون وکړي.

د دې خونې مرستیال خان‌جان الکوزي بي‌بي‌سي ته ویلي چې بنګله‌دېش د جامو او کالیو د تولید، وریجو، چای او درملو په برخه کې پراخې وړتیاوې لري.

هغه زیاته کړه، په بنګله‌دېش کې د افغانستان تازه او وچه مېوه او نور درملیز بوټي هم ډېر پېرېدونکي لري.

د الکوزي په وینا، د افغانستان او بنګله‌دېش ترمنځ سوداګري د ایران د چابهار او بندرعباس له بندرونو ترسره کېږي او دا مهال له دې هېواد سره د سوداګرۍ لېوالتیا تر بل هر وخت زیاته شوې ده.

د افغانستان د صنعت او سوداګرۍ خونې مرستیال وایي، دا مهال د دواړو هېوادونو ترمنځ د سوداګرۍ کچه شاوخوا شل میلیونه ډالره ده خو داسې لوی ظرفیتونه شته چې دا کچه په کال کې تر یو میلیارد ډالرو لوړه شي.