د پاکستاني پوځ پر څوکیو د طالبانو حکومت ځواکونو "غچ اخیستنې'' بریدونه: څه وخت څه پېښ شول؟

په افغانستان کې د طالبانو حکومت چارواکي وايي، د پاکستاني پوځ وروستیو بریدونو ته غبرګون کې یې په پراخه کچه 'پوځي عملیات' پیل کړي دي.

د طالبانو حکومت ویاند ذبیح الله مجاهد وویل، دغه بریدونه د پنجشنبې په شپه د دواړو هېوادونو تر منځ د ډېورنډ کرښې په اوږدو کې پیل شوي، چې په خبره یې پایله کې یې ''ګڼ شمېر''پاکستاني پوځیان وژل شوي او ځینې نور نیول شوي دي.

خو د بهرنیو رسنیو لپاره د پاکستاني لومړي وزیر ویاند دا ادعاوې رد کړې او د طالبانو هغه خبره یې هم ناسمه وبلله چې وايي، دوی د پاکستان پوځ پوستې نیولې دي. مشرف زیدي وویل چې د پاکستان له لوري په ځوابي بریدونو کې افغان لوري ته ''درانه تلفات'' اوښتي دي.

د طالبانو حکومت چارواکو د پنجشنبې ماخوستن بریدونه په پکتیکا، خوست او ننګرهار کې د پاکستان هغو هوايي بریدونو ''غچ اخیستنه'' وبلل، چې د روانې اونۍ پیل کې وشول او د طالبانو چارواکو په وینا لږ تر لږه اته ملکي وګړي په کې ووژل شول.

خو اسلام‌اباد ویلي وو چې دوی د وسلوالو ادعا شوي کمپونو او پټنځایونو په نښه کړي دي.

د طالبانو پوځي ویاند مولوي وحیدالله محمدي وايي، د ''غچ اخیستنې عملیات'' د پنجشنبې په ماخوستن له ځايي وخت سره سم نژدې اته بجې پیل شوي دي.

د طالبانو حکومت مرکزي ویاند ذبیح الله مجاهد پر اېکس پاڼه په دې هکله وویل: ''د پاکستان د پوځي حلقي د بار بار تمرد او سرکشیو په غبرګون کې د ډیورند کرښې په اوږدو کې د پاکستاني پوځیانو په مراکزو او نظامي تأسیساتو پراخ تهاجمي عملیات پيل شول.''

نوموړي ادعا کړې چې طالب ځواکونو ۱۵ پوځي پوستې نیولي دي.

د پاکستان حکومت وویل طالبانو ''ناسمه محاسبه کړې او د خیبر پښتونخوا په بېلابېلو سیمو کې یې بې‌ دلیله ډزې پیل کړې دي'' خو د پاکستان امنیتي ځواکونو له لوري ورته ''سملاسي او اغېزمن ځواب'' ورکړل شوی دی.

د پاکستان اطلاعاتو وزارت په یوه اعلامیه کې چې پر اېکس خپره شوې، ویل شوي: ''لومړني راپورونه ښيي چې افغان لوري ته درانه تلفات اوښتي او ګڼ شمېر پوستې او تجهیزات یې له منځه وړل شوي دي.''

په اعلامیه کې زیاته شوې:''پاکستان به د خپلې ځمکنۍ بشپړتیا او د خپلو وګړو د خوندیتوب او امنیت د ډاډ لپاره ټول اړین ګامونه واخلي.''

د لومړي وزیر شهباز شریف ویاند مشرف زیدي د پاکستان لوري ته د اوښتو زیانونو ادعاوې رد کړې او په خبره یې، هر ډول یرغل ته به ''سملاسي او اغېزمن'' ځواب ورکړل شي.

کابل تر دې وړاندې خبرداری ورکړی و چې د اونۍ په پیل کې د افغانستان په بېلابېلو سیمو کې د پاکستان بریدونو ته به ''په مناسب وخت'' غچ اخیستونکی اقدام وکړي.

اسلام‌اباد ویلي وو چې ډیورنډ کرښې ته نږدې یې د مشکوکو وسلوالو اووه کمپونه او پټنځایونه په نښه کړي او دا بریدونه یې په پاکستان کې د وروستیو ځانمرګو چاودنو وروسته ترسره کړي دي.

بل لور کابل ویلي و چې د ملکي خلکو کورونه او یوه ديني مدرسه په نښه شوي او په وژل شویو کې ښځې او ماشومان هم شامل دي.

وروستۍ نښتې وروسته له هغې شوې چې دواړو هېوادونو د اکتوبر په میاشت کې له خونړیو نښتو وروسته پر یوه نازک اوربند هوکړه کړې وه، خو له هغه وروسته بیا هم ځینې نښتې شوې دي.