د طالبانو بهرنیو چارو وزارت: لندن او ویانا کې افغان سفارتونه "د اعتبار وړ نه دي"
د عکس سرچینه، Getty Images
په افغانستان کې د طالبانو حکومت د بهرنیو چارو وزارت وايي، په لندن او ویانا کې د افغانستان سفارتونه د دوی په ټکو د باور وړ نه دي.
د دغه وزارت ویاند عبدالقهار بلخي په یوه خبرپاڼه کې ویلي، د دې پرېکړې دلیل دا دی چې دغه سفارتونه په افغانستان کې د طالبانو له حکومت سره همغږي نه لري او بل دا چې "په کارونو کې یې شفافیت نشته."
په دغو دواړو هېوادونو کې لسګونه زره افغانان اوسېږي او د کونسلي خدمتونو لپاره افغان سفارتونو ته ورځي. د طالبانو د بهرنیو چارو وزارت په اعلامیه کې ویل شوي چې "د اکټوبر له اتمې وروسته دې افغانان دغو سفارتونو ته د کونسلي خدمتونو (ویزو، د پاسپورتونو غځولو او د اسناد تصدیق) لپاره نه ورځي."
د طالبانو د بهرنیو چارو وزارت دا نه دي ویلي، چې بریتانیا او او اوتریش کې مېشت افغانان د کونسلي خدمتونو لپاره کوم ځای ته ولاړ شي خو په اعلامیه کې یې ویل شوي چې تر دویمې خبرتیا دې یادو سفارتونو ته نه ورځي.
دې لیکنه کې له social media راخیستل شوي مواد شته. له ښودلو وړاندې یې ستاسې اجازه پکار ده، ځکه ښایيکوکیز یا بله تکنالوژي پکې کارول شوې وي. کولی شئ له اجازې مخکې د social media site پالیسي ولولئ. د دې لپاره غوښتنه ومنئ او مخکې لاړ شئ
د پوسټ X پای
له دې وړاندې د اسپانیا ماډریډ کې د افغانستان سفارت ویلي، چې کابل کې د طالبانو حکومت د بهرنیو چارو له وزارت سره په تعامل کې دی.
دا درېیم ځل و چې د اروپايي ټولنې په یوه غړي هېواد کې د افغانستان سفارت په رسمي ډول په کابل کې د طالبانو د بهرنیو چارو له وزارت سره د تعامل اعلان کوي.
دغه سفارت پر مېټا (فېسبوک) پاڼه اسپانیا کې له مېشتو افغان وګړو غوښتي چې د اړتیاوو پوره کولو لپاره په عادي ډول دغه سفارت ته مراجعه وکړي.
په اروپا کې ګڼ سفارتونه خپل مالي لګښتونه د پاسپورټونو له تمدید او کونسلي خدمتونو پوره کوي. د طالبانو دغه اعلان ته په لندن او ویانا کې افغان سفارتونو تر اوسه غبرګون نه دی په ډاګه کړی.
د طالبانو حکومت تر اوسه هېڅ هېواد په رسمیت نه دی پېژندلی او د اروپا په ګډون په ګڼو هېوادونو کې افغان سفارتونه د طالبانو د حکومت استازولي نه کوي. خو طالبان هڅه کوي چې ورو ورو په اروپا او نورو هېوادونو کې سفارتونه په یو نه یو ډول ور خپل کړي او د دې کار لپاره ښايي له هرې ممکنه وسیلې کار واخلي.
