Opera ifaçısı Montserrat Caballé 85 yaşında vəfat edib

İspan opera ifaçısı Montserrat Caballé-nin Freddie Mercury ilə dueti 1992-ci il Barselona Olimpiyadasının əsas mahnısına çevrilmişdi.

Səhhətində problemlərlə üzləşmiş ifaçı, keçən ay Barselonada xəstəxanaya yerləşdirilib, Efe xəbər agentliyi məlumat verir.

O, 50 il peşəkar ifaçılıqla məşğul olub.

İfaçı 1965-ci ildə New York-un Carnegie konsert sarayında beynəlxalq miqyaslı nailiyyətə imza atıb. Bundan əvvəlsə o, Bazel və Bremen operaları ilə əməkdaşlıq edib.

Caballé bundan əvvəl də səhhətində problemlərlə üzləşib. 1985-ci ildə o, beyin xərçəngi diaqnozu ilə üç ay xəstəxanada keçirib. 1993-cü ildə isə ürəyindəki problemlərə görə müalicə alıb.

Montserrat Caballé-nin 2013-cü ildə Azərbaycanın işğal olunmuş ərazilərinə səfəri rəsmi Bakının narazılığıa səbəb olmuşdu.

Həmin səfəri zamanı o, tanınmamış Dağlıq Qarabağ Respublikasının prezidenti Bako Sahakyanla görüşüb.