Yoo karoora nagaatti wal hin galle Iraan 'balaa hamaatu' eeggata - Tiraamp

Haguuggii Tamsaasa Kallattii

1. 26 Bitooteessa 2026Seenegaalonni waancaa Afrikaa nyaatanii turan qabatanii agarsiisaf karaatti bahuufi

   

   Madda suuraa, Reuters

   Senegaal tapha michoomaa Peeruu waliin Sanbat-duraa dhufu taphachuuf jirtu dursuun lammiileen ishee waancaa Afrikaa nyaatanii turan qabatanii agarsiisaf karaatti bahuuf akka jiran Federeeshiniin Kubbaa Miilaa biyyattii hime.

   Senegaal agarsiisa kana mormii waancaa isaanirraa fudhatamurraa qabaniif akka ta'e himame.

   Leenconni Teraangaa, gareen kubbaa miilaa Senegaal, waancaan Afrikaa yeroo lammaffaaf Ammajjii 18, 2026 mo'atan Morookoo tapha xumuraa waancaa waliin taphataniif dabarsamee akka kennamu murtaa'uun isaa ni yaadatama.

   Tapha kanarratti atakaaroon dirree keessaa ka'ee ture.

   Dilbata Amajji 18, 2026 biyyi waancaa kana qopheessite Morookoon daqiiqaa 98ffaa irratti peenaaliitiin yeroo kennameefitti leenjisaan Senegaal Peeppee Tiyaaw gareesaa dirree keessaa baase ture.

   Saadiyoo Maanee fi karra eegaan Senegaal Eduwaard Mendiin garuu taphattoota Senegaal dirreetti deebisuun taphni itti fufe. Taphataan Morookoo Biraahim Diyaaz penaaliitii argamte yeroo rukutu karra eegaan Senegaal salphaatti kubbattii qabatee oolche.

   Senegaal fi Morookoon zeeroo fi zeeroon dhumee yeroo dabalataa kenname.

   Senegaal sa'aatii dabalame keessatti Morookoo 1 fi 0n mo'atte.

   Garuu torban dabre Konfedereeshiniin Kubbbaa Miilaa Afrikaa (CAF), bu'aa tapha kanaa jijjiiruun Morookoon 3-0 dhaan Seenegaal mo'achuu labse.Waancaanis Morookoof akka kennamu jedhe.

   Kibxata immoo Manni Murtii ijibbaataa Ispoortii (Cas) iyyata Senegaal simate.

   Adeemsi murtii iyyata Seneegaal kunis akka saffisu ajaje.

   Federeeshiniin Kubbaa Miilaa Senegaal murtii kana akka hin fudhanne ibseera.

   Federeeshiniin Kubbaa Miilaa Senegaal tapaha michoomaa biyyattiin Peeruu waliin Sanbat-duraa Paarisitti qabdu dura agarsiisni daandiirraa akka qophaawuu Preezdaantiin Federeeshinii Kubbaa Miilaa Senegaal Abdoulaye Fall himan.

   "Senegaal hin jilbiiffattu, gatii ishees dabarsitee hin kennitu" jedhan Pireezdaantichi. "Qabsoon keenya dirree tapha kubbaa bira ceheera" jedhan ibsa miidiyaaleef Paarisirraa kennaniin.

   Waa'ee 'Ambaasaaddar kubbaa miilaa Afrikaa' Saadiyoo Maanee maaltu jedhame?

2. 26 Bitooteessa 2026Ergamaan US Ameerikaan karoora nagaa abbaa qabxii 15 Iraanitti erguu mirkaneessan

   

   Madda suuraa, Reuters

   Marii Waayit Haawusitti adeemaa tureerratti Giddugala Bahaatti ergamaan addaa Tiraamp Istiiv Witkoof Ameerikaan ''qabxiilee 15'' waliigaltee nagaaf bu'uura ta'an Iraanitti erguu mirkaneessan.

   ''Kuni karaa mootummaa Paakistaan Iraanitti [ergame],'' jechuun dubbatani.

   Kuni yeroo jalqabaafi Waayit Haawus ifatti karoora nagaa abbaa qabxii 15 Iraanitti erguu mirkaneesse.

   Guyyoota darban miidiyaaleen US fi Israa'el qondaalota maqaa hin dhahiin gabaasaa turan.

   Wiitkoof dhimma kanarratti yoo dubbatan US ''icciitii'' marii kanaa akka eegduufi Ameerikaan ''karaa miidiyaa waliigaltee nagaa teessi miti'' jechuun dubbatan.

   ''Garamitti akka qajeelu ni ilaalla,'' jechuunis himan.

   ''Iraaniif kuni du'aafi mancaatiirraa filmaata gaarii ta'u yoo amansiisne... kuni akka milkaa'u mallattoon'' agarsiisu cimaa jira jedhan.

   Karoorri nagaa Tiraamp 15'n waraana dhaabuuf baasaniifi Iraan mormitu maali?

3. 26 Bitooteessa 2026NATO'n Iraanirratti US faana ejjennoo tokko qabaachuu qaba - M/Dh/Alaa Jarmanii

   

   Madda suuraa, EPA

   Minitirri Dhimma Alaa Jarmanii biyyoonni miseensota NATO dhimma Iraan irratti "ejjennoo tokkotti" dhufuun murteessaa dha jedhan.

   Ministirichi Johann Wadephul UK fi Firaans marii ministiroonni dhimma alaa garee biyyoota G-7 Jimaata Paarisitti Maarkoo Ruubiyoo waliin godhamu dura ejjennoo isaanii kana qooddachuu isaanii Rooytarsitti himan.

   Pireezdant Tiraamp gamtaa NATO waraana kanarratti Ameerikaa waliin dhaabbachuu diduu isaaniif qeeqaa ture. Tiraampi osuma akkas jedhuu tumsa NATO hin feenus jedha.

   Sa'aatii muraasa dura,hoggantuun dhimma alaa Gamtaa Awurooppaa Kaja Kallas, Raashiyaan Iraan ragaalee tikaatiin deeggaruun "akka Ameerikaarratti qiyyaafattuu fi Ameerikaanota ajjeeftu gochaa jirti" jechuun himatte. Akkanumas Raashiyaan Iraan biyyoota Baha Jiddu-galeessaa akka haleeltu dirooniin deeggaraa jirti jechuun AFP'tti himte.

   Marii ministirootra dhimma alaa G7 miilanaa Firaansitti taa'amurratti dhimmi waraana Yukireenii fi Iraan wal faana ajandaa ijoo akka ta'u ibsiteerti dippiloomaatittiin. US waraana Baha Jiddu-galeessaa yoo dhaabuu feete "Raashiyaarrattis dhiibbaa gochuu qabdi" jette.

4. 26 Bitooteessa 2026Tiraamp dhimma marii nagaa Iraanirratti tooftaa karaa lakkuu hordofu itti fufe

   

   Madda suuraa, EPA/Shutterstock

   Prirezdaanti Tiraampi marii Kaabinee isaa waliin tolcherratti irra deebiin Iraan mariitti dhufuu qabdi, Teehraan nu waliin teessee hin mari'attu taanaan immoo "isaan barbadeessina" jechuun dhaadate.

   Haasaan Tiraampi kun dubbiiwwan asiin dura US fi Iraan gidduu mariin al kallattii eegalame jedhu gaaffii keessa galcheera.

   Akkuma guyyoota darban dubbachaa ture Tiraamp, Iraan waraana dhaabuf mari'achuu feeti jedhe. Aangawoonni Iraan garuu biyyattiin US waliin marii akka hin eegalin dubbatu.

   Roobii, Iraan karoora nagaa US kan Iraan sagantaa niwukilaraa gabbisuu akka dhaabduu fi sagantaa ishee misayeloota baalistikii akka daangessitu gaafatu fudhatama dhorkattee turte.

   Marii kaabinee kanarratti, Istiiv Wiitkoof, Ergamaa addaa Tiraamp, US karoora marii abbaa qabxii 15 Iraaniif dhiyeessuu mirkaneessan. Witkoof guutuu karoora marii kanaa hin dhiyeessine.

   Tiraamp, Iraan karoora nagaa US diduu isheerratti homaa hin jenne. US loltoota lafoo gara Baha Jiddu-galeessaa bobbaasuu ilaalchisees homaa hin haasofne.

   Hireen murteessuu harka Iraan jirti jechuun sirni mootummaa Iraan dhukaasa dhaabuuf yoo hin mari'anne waan hamaan akka isa eeggatu akeekkachiise Tiraamp.

   "Yoo mariif hin teenye, balaa isaanitti buufna," jedhe Tiraamp. "Isaan barbadeessina. Wanti nu dhaabu hin jiru. Hin dhaabbannu."

   US akkamiin Iraan gara mariitti akka fiddu garuu wanti jedhame hin jiru. Yoo waraana ji'a guutuuf deemun hanga yoonaa mariif hin jilbiiffanne, haleellaan haaraan godhamus akkamiin Iraan gara mariitti akka deebisu ifaa miti.

5. 26 Bitooteessa 2026Dhimma marii irratti Ameerikaafi Iraan keessaa eenyu amannu?

   Maxxansa YouTube irra dabri

   Qabiyyee Google YouTube hayyamtaa?

   Barreeffamni kun qabiyyee [social_media-site]n dhiyaatan qaba. Tarii 'cookies' fi teknolojiiwwan biraa fayyadamuu waan danda'aniif, osoo tokkoonsaa gadi hin buufamiin dura hayyama keessan gaafanna. Osoo hin simatin dura Google YouTubeimaammata cookies fi imaammata mateenyaa dubbisuu barbaadda ta'a. Qabiyyee kana ilaaluuf 'waliigaluun itti fufi' filadhu.

   Accept and continue

   Hubachiisa: Qabiyyee marsariitiiwwan alaatiif BBCn itti gaafatamummaa hin fudhatu. YouTube beeksisa qabaachuu danda'a.

   Xumura maxxansa YouTube

   Osoo waamichi marii cimee jirutti Israa’el aangawoota Iraan adamsuu itti fufteetti.

   Haleellaa tibbanaan ajajaa humna galaanaa Eegdota warraaksaa Iraan- IRGC kan ta'an Alirezaa Tangisirii ajjeesuu ibsiteetti.

   Gama Iraanii dhimma kanarratti wanti jedhame hin jiru.

   Viidiyoo kana keessa dhimma marii nagaa US fi Iraan gidduu falmii kaaseefi waan adeemaa jiru argattu.

6. 26 Bitooteessa 2026'Dandeettiin Iraan gamtaa NATO'tiif balaafamaa dha'- Hogganaa NATO, Ruutee

   

   Madda suuraa, Reuters

   Hogganaan NATO Maark Ruutee ammuma reefu Biraasilsitti gabaasa waggaa bara 2025 irratti miidiyaaf ibsa kennan.

   Waraanni Iraan NATO yoo ilaallateef gaaffii ka'eef, miseensonni NATO "balaa sagantaa misaayelootni Iraani isaanii fi dantaa isaaniirratti qabu erga hubatanii turaniiru" jedhan.

   Wanti US gochaa jirtu "dandeettii lachuu, kan misaayelaa fi niwukilaraa Iraan diiguudha jedhan.

   Iraan yeroo ammaa "dandeettii michoota NATO'f balaafamaa ta'e qabdi", kan jedhaN Hogganaan NATO Ruuteen sirni ittisa qilleensaa NATO misaayeloota baalistikii yeroo garaagaraatti gara Turkii furgugsiifaman sadi qolate jedhan.

   Triraamp irra deddeebiin Gamtaa NATO qeequu booda yaada kennan.

7. 26 Bitooteessa 2026Ajjeechaan ajajaa waraanaa Iraanirratti milkaahe 'qindoomina keenya agarsiisa'- Netaaniyaahuu

   

   Madda suuraa, Reuters

   Ministirri Muummee Israa'el Benjamiin Netaaniyaahuu ajjeechaan ajajaa humna galaanaa Iraan Alireez Tangisiir irratti raawwatan agarsiiftuu kan biraa qindoomina US fi Israa'el gidduu jiruuti jedhe.

   Ergaa viidiyoo afaan Hibruun dabarseen Israa'eel humna jabaan xiyyeeffannoolee Iraan keessa jiran haleelaa jirtii jedhe.

   Irra deebiinis Tangisiirii nama ulaa Hormuuz cufuu keessatti gahee olaanaa taphateedha jedhe.

   ''Kuni fakkeenya kan biraa qindoomina nuu fi michoota keenya Yunaayitiid Isteets gidduugalma waloo milkeessuufi kaayyoo waraanichaa galmaan gahuurratti jiruuti''

8. 26 Bitooteessa 2026'Libaanos marii dhukaasa dhaabuu keessatti hammatamuu qabdi' - Iraan

   

   Madda suuraa, AFP

   Iraan jiddu deemtota dhimma araaraatiin Libaanos marii dhukaasa dhaabuu US, Israa'elii waliin taa'amu keessatti hammatamuu qabdi jechuu ishee Rooytarsi gabaase.

   Maddeen naannichaa jaha ejjennoo Iraan beekan wabeeffachuun Rooytarsi akka gabaasetti waraanni Israa'el Hizboolaarratti bantes dhaabbachuu akka qabu Iraan gaafatte.

   Televizhiniin Iraan Press TV'n Roobii akka gabaasetti Iraan waraanni kun akka dhaabbatu Ameerikaa waliin kan marii feetu waraanni Iraanirratti baname akka dhaabbatu qofa osoo hin taane gareewwan diddaa "resistance groups" Iraan deeggarturraayis akka dhaabbatu dha.

   Qondaaltonni Iraan Roobii Rooytarsitti akka himanitti Teehraan ammallee Karoora Nagaa US qopheessite madaalaa jirti. Iraan karooora kana hin fudhanne.

   Maddeen Rooytarsi jahan eenyummaa isaanii hin ibsin jiddu-deemtota marii kanaatiin waraanni hidhattoota Hizboolaa irraayis akka dhaabbatu haaldureetti dhiyeessite. Israa'el Libaanos keessatti garee kanas haleelaa jirti

9. 26 Bitooteessa 2026Traamp tumsa tokkollee nuu hin goone jechuun Gamtaa NATO qeeqe

   

   Madda suuraa, Getty Images

   Sa'aatii muraasa dura, ergaa miidiyaa hawaasummaa ofiirratti dabarseen Donaald Tiraamp, michuuwwan US NATO qeeqe.

   "Warra nu gargaaruuf homaa carraaqqii tokkollee hin goone" jechuun komate haala Iraan keessaa wajjin wal qabsiisun.

   "Ameerikaan NATO irraa homaa hin barbaaddu," Garuu "Yeroon murteessituu tana hin dagatamu" jedhe.

   Tiraamp biyyoonni doonii ulaa Hormuz keessa dabartu tiksuuf fedha qaban jiru jedhulleen ammas maqaa biyyoota kanneenii hin eerre.

   Bitootessa 15, Tiraamp ''fuuldureen isaa badaa dha'' jechuun NATO akeekkachiisee ture.

   Yoo miseensonni NATO ulaa Hormuz bansiisuu didan waan hamaatu isaan mudata jedhee ture Financial Times irratti dubbii dubbateen.

   Torban darbe Waayit Haawusitti haasawa godheen, miseensonni NATO waraana kanatti hirmaachuuf fedha akka hin qabne natti himameera jedhe.

   Waraana kana gariin miseensota NATO waraana seer-maleessa jedhanii yaadu.

   "Waraana kanatti milkaa'aa waan jirruuf, biyyoota NATO irraa gargaarsa isaanii hin feenu —TANA DURAS HIN BARBAADNE"

   Traamp ammallee irra deebiin Gamtaa NATO qeeqeera, "Dabeeyyii" tumsaaf ulaa Hormuuz bansiisuuf fedhii dhabuu isaaniin.

   "Waraana agarsiifachuu qofaaf jiru" jedheen.

   Hogganaan NATO Jeneraal Maark Ruut akkaataa ulaa Hormuuz bansiisuun danda'amurratti miseensonni gamtichaa mari'achaa jiru jedhe.

10. 26 Bitooteessa 2026Tiraamp, "Osoo isintti hin barfatin ariifadhaa!" jedha warra Iraaniin

    

    Madda suuraa, Getty Images

    Donaald Tiraamp, 'Hin qoosinaa, akka isinitti hin barfatne' jechuun aangawoota Iraaniif ergaa miidiyaa hawaasaa isaa Truth social irratti dabarse.

    Aangawoota Iraan mariitti jiran "warra baay'ee adda ta'anii fi keessummaa" jedheen.

    Nu "kadhachaa jiru" jedhe. Waraanni isaanii "barbadaayee" jira, carraan "bakkatti deebi'uusaa zeeroo" dha jedheera Tiraamp.

    "Garuu ammas karoora nagaa keenya "DOGOGGORA!!! jedhu" jechuun Truth Social irratti maxxanse.

    "Osoo jalaa hin barfanne, dafanii qalbiitti deebi'uu wayyaaf, didamee jennaan DUUBATTI DEEBIN hin jiru, salphaas hin ta'u" jechuun dhaadate.

    Roobii Ministirri Dhimma Alaa Iraan Abbaas Araagchii, biyyi isaanii, "ammatti akeeka mariyachuu hin qabdu" jedhan. "Ergaawwan keenya kanneenis karaa michoota keenyaa dabarsineerra, ergaawwan dabarsines fedha marii ykn jaarsummaas miti" jedhanii turan.

11. 26 Bitooteessa 2026Israa'el ajajaa humna galaanaa waraana Iraan ajjeesuu ibsite

    

    Madda suuraa, IRGC

    Israa'el ajajaa humna galaanaa Eegdota warraaksaa Iraan- IRGC kan ta'e Alireza Tangsiri ajjeesuu ibsite.

    Ministirri Ittisaa Israa'el, Israa'el Katzi akka jedhanitti, Tangsiriin ''gocha haleellaa dooniwwaan ulaa Hormuz cufuu kallattiin itti gaafatamummaa fudhataa ture''

    Taangsiriin haleellaa irratti rawwatameen ajjeefamuu akkasumas ajajoonni humna galaanaa olaanoo biroo hedduun taatee walfakkaatuun ajjeefamaniiru jedhan Israa'el Katzi

    Iraan garuu hanga yoonaa ajjeecha jedhame kana hin mirkaneessine.

12. 26 Bitooteessa 2026Haleellaan guutuu Baha Giddu Galeessaa keessatti har'a itti fufeera

    

    Madda suuraa, Geettii Images

    Haleellaan biyyootni raawwatan guutuu Baha Giddu-galeessaa keessatti itti fufeera.

    Haleellaan Ameerikaa fi Israa’el Iraan irratti, akkasumas haleellaan Israa’el Libaanos irratti raawwataa jirtu itti fufeera. Haleellaan Iraan ammoo Israa'elii fi biyyoota ollaa ishee Galoo galaanaa irratti cimeera.

    • UAE Abu Daabii keessatti caccabaa misaa'ela qolatamee naannawa manneen jireenyaa jirattootatti kukkufee namoota lama du'aniiru.
    • Taatee kun konkolaattota hedduu irrattis miidhaa kan qaqqabsiise yoo ta'u, kanaanis namoonni sadi madaa’aniiru.
    • UAE, Sa’udii Arabiyaa fi Kuweet sirni ittisa qilleensaa isaanii diroonii haleellaa irratti raawwattu qolachaa jiraachuu himaniiru -
    • UAE'n haleellaan kun Iraanin kan irratti raawwatamaa jiru ta'uu kan beeksifte yoo ta’u, Sa’udii fi Kuweet ammoo diroonii kunneen eessaa akka dhufan hin ibsine.

    • Baahireen Kamisa ganama jiraattonni naannoo nageenya qabutti akka da'atan ajajuudhaan sababa haleellaa Iraan kanaan balaan ibiddaa muudachuu akka malu akeekkachiifterti.

    • Israa'el keessatti haleellaa magaalaa Kafr Qaasim keessatti Iraan raawwatteen namoonni 6 gara hospitaalaatti geeffamaniiru.

13. 26 Bitooteessa 2026''Harki dhokataan Puutin Iraan keessa jira''- UK

    

    Madda suuraa, AP

    Biyyi addunyaa irratti biyyoota humna guddaa qaban keessaa tokko kan taate Raashiyaan waraana Iraaniif odeeffannoo basaasaa kenna jirtii jedhame.

    Ministirri Raayyaa Ittisa Biyyaa UK Joon Heelii BBC waliin afgaafii taasisaniin, Raashiyaa fi Iraan gidduutti ''walta'iinsi'' akka jiru ibsaniiru.

    Ragaan basaasa ittisaa yeroo dhiyoo bahe akka agarsiisutti. waldhabdee Baha Giddu Galeessaan dura Raashiyaan odeeffannoo basaasaa Iraan waliin qooddachaa akka turtee fi humnoota Iraaniif leenjii kennaa akka turte eeruu ibsan.

    Itti dabaluudhaan waraana akana keessatti giddu seentummaan Raashiyaa akka jiru eeruun ''harki deggersa dhokataan Puutiin'' Iraan keessa jira jedhan.

    Joon Heeliin UK'n dhaabbilee fi michoota ishee dabalatee lammiilee Biriteen Baha Giddu Galeessaa keessa jiran eeguuf hojjechaa jiraachuu himan

    Paayileetonni UK michoota fi dantaa Ingilizii naannicha keessa jiran eeguuf sa'aatii 1,000 ol balallin dabarsaniiru jedha.

    Raashiyaan gosoota diroonii fi waraana elektirooniksii irratti Iraaniif leenjii kennaa akka turte cimsanii dubbatan.

    "Puutiin waan bakka biraatti hojjechaa jiruun yaada keenya jeequu barbaada. Nuti isa hin hayyamnu," jedhan

    Michoonni Iraan Chaayinaa fi Raashiyaan maaliif waraanaan Iraan hin tumsine?

    Waraana Iraan irraa biyyootni waa buufatan eenyu? Kanneen miidhaman hoo?

14. 26 Bitooteessa 2026Daawwadhaa: Haleellaa Iraan gaggeessite hordofee midhaa magaalaa Israa'el keessatti mudate

15. 26 Bitooteessa 2026Iraan haleellaa Misaa'elaa cimaa Israa'el irratti raawwataa jirti

    

    Madda suuraa, Israeli emergency services

    Humni Ittisa Israa’el (IDF) sa’aatiiwwan darbe keessatti misaa’elli Iraan irraa gara magaalota giddu gala Israa’elitti dhukaafamaa akka jiru ibse.

    IDF ummanni bakka nageenya qabutti akka da'eeffatu akeekkachiiseera.

    Humna Ittisaa Israa'eel misaa'ela kana adda kutaa akka jiruu fi kannen miliqanii darban ammoo jiraattota irratti miidha qaqqabsiisuu ibseera.

    Giddugaleessa Israa'el keessatti qofa haleellaa misaa'elaa kana hordofuun namoonni jaha miidhamanii Hospitaala galuu tajaajilli hatattamaa yeroo balaa Israa'el Magen David Adom ibsaniiru.

    Magaalaa Kafr Qaasim keessattis manneen hedduu irra miidhaan qaqqabeera.

    Viidiyoon tajaajilli hatattamaa yeroo balaa Israa'el irraa argame akka agarsiisutti ganama har'aa Kafr Qasim keessatti miidhaan gaheera.

16. 26 Bitooteessa 2026Waayit Haawus waaa'ee marii Iraan waliin taasifamaa jiruu ibse

    

    Madda suuraa, EPA

    Piree Sekireetaariin Waayit Haawus Kaarooliin Liiviit dhimma marii Iraan ilaalchisee ibsa gaazexeessitootaaf kenniteen:

    • Pirezidaant Traamp Iraan waliin ''marii bu'a qabeessa'' taasifneerra jedhan, Iraan garuu ammallee kana haaltee jirti.
    • Livit karoorri qabxii 15 qabu miidiyaa hawaasaa irratti naanna'aa jiru ''tilmaama'' ta'us ''waan dhugaa of keessaa qaba'' jette.
    • Mariin biyyoota lamaan gidduutti taasifamaa ture jedhame akkamitti akka xumurame '' bal'inaan'' ibsuu hin barbaanne
    • Barreessituun pireesii Waayit Haawus kun Iraan keessatti jijjiiramni sirnaa galma ga’eera jechuun kan Tiraamp dubbatan deeggaran. Liiviit hoggantoonni Iraan akka ajjeefaman ibsuun hogganaa olaanaa Mojateba Kameni ''namni argee ykn dhaga'e hin jiru'' jette.

    • Liiviit itti dabaluun Ameerikaan loltoota lafoo gara Baha Giddugaleessaatti bobbaasuu fi dhiisuu ishee ibsuu didan, garuu loltoota bobbaasuuf hayyama kongireesii barbaaduun barbaachisaa ta’uu dhiisuu mala jette.
    • Guyyaan murtaa'aan waraanni kun itti xumuramu yoom akka ta'e kana gaafatamte Liiviit, guyyaa murtaa'e kana jedhamuu baatus Ameerikaan kaayyoo ijoo ishee galmaan ga'uuf ''baay'ee dhihoo'' ta'uu dubbatteetti.

17. 26 Bitooteessa 2026Iraan waraanni akka xumuramuuf maal barbaaddi?

    

    Madda suuraa, Reuters

    Iraan waraana mariin xumuruuf qabxiilee US dhiyeessite kufaa gochuushee miidiyaalen Iraan gabaasaa jiru.

    Midiyaan biyyattii Press TV jedhamu qondaala olaanaa Iraan biyyattii tokko waabeffachuun akka gabaasetti, Iraan yaada bulchiinsi Tiraamp dihyeesse kufaa gochuun haal-duree keessetti.

    "Waraanichi kan xumuramu yeroo Iraan akka xumuramu barbaadduufi waanti isheen barbaaddu guutamaniidha," jechuun qondaalli Iraan kun dubbachuu gabaase miidiyichi.

    Waraanni gaggeeffamaa jiru akka xumuramuuf Iraan haal-duree shan keessetti:

    • Haleellaafi ajjeechaan "diinni" gaggeessu akka dhaabatu
    • Waraanni irra deebiin Iraanirratti akka hin gaggeeffamne wabiin amansiisaa ta'e jiraachuu akka qabu
    • Badiifi mancaatii qaqqabeef US beenyaa akka kaffaltu
    • Humnoota naannichatti hidhatanii of ittisan (resistance group) dabalatee adda waraanaa hundatti haleellaan waraanaa gaggeeffamu akka dhaabatu
    • Iran Ulaa Hormuuz to'achuuf mirga akka qabdu beekamtiin idilaaddunyaa akka kennamuuf

    Dabaluunis, qondaalonni Iraan yeroo garaa garaatti dhukaasa dhaabuu osoo hin taane waraanni guutummaan akka dhaabatu ibsu. .

18. 26 Bitooteessa 2026Iraan xiyyaara waraanaa Ameerikaa F-18 haleeluu ibsite

    

    Madda suuraa, EPA

    Humni Egdoota warraaksaa Islaamummaa Iraan- IRGCn miidiyaa isaa Sepah News irratti ibs kenneen, xiyyaarri waraanaa Ameerikaa misaa’ela humna galaanaa IRGC'n rukutamee Galaana Hindii keessatti akka kufe ibse.

    Humni waraana Iraan kun Roobii darbe xiyyaara waraanaa Ameerikaa F-18 naannoo qilleensaa kibba baha biyyattii keessatti rukute jedheera. Viidiyoo xiyyaara waraanaa magaalaa Chabahar keessatti haleelamu agarsiisus gadhiisee ture.

    Itti dabaluudhaanis, xiyyaarri waraanaa Ameerikaa fi Israa’el kan sirna ittisa qilleensaa Iraaniin naannoo qilleensa biyyattii keessatti rukutamte isa 4ffaa ta’uu ibseera.

    Ameerikaan ammoo xiyyaarri waraanaa ishee F-18 waraana Iraan waliin geggeeffamuun haleelame akka hin jirre haalte jirti.

    Ajajni Giddugaleessaa Ameerikaa (CENTCOM) ibsa gabaabaa miidiyaa hawaasaa X irratti kenneen gabaasni kun dhugaa akka hin taane ibseera.

19. 26 Bitooteessa 2026USfi Israa'el qondaalota olaanoo Iraan lama tarree namoota ajjeefamuuf barbaadamanii keessaa yeroof baasan- gabaasa

    

    Madda suuraa, Getty Images

    Ameerikaafi Israa'el qondaalota olaanoo Iraan lama galmee qondaalota biyyattii ajjeefamuuf barbaadaman keessaa yeroof haquu miidiyaalen Israa'el gabaasaa jiru.

    Qondaalonni kunneen lamaan afayaa'ii paarlaamaa Iraan kan ta'an Mohaammad Bagher Galibaaf fi ministiira muummee biyyattii Abbaas Araagchii ta'uu miidiyaan Israa'el The Jerusalem Post gabaase.

    Akka gabaasa kanaatti, Ufi Israa'el qondaalonni kun lamaan akka hin ajjeefamne kan murteessan carraan marii Iraan waliin yoo jiraate waliin mariyachuufi.

    Abbaas Araagchii marii dhimma nikularaa Iraan irratti gaggeeffamaa tureen biyyattii bakka bu'uun US waliin yeroo garaa garaatti mariyataa turan.

    Qondaalonni lamaan waggaa afurii hanga shanii kan ta'uuf akka hin ajjeefamne galmee qondaalota ajjeechaaf barbaamanii keessaa haqamuu ibsa gabaasichi.

    Doonaald Tiraamp torban kana Iraan waliin mariin jalqabuu ibsus, Iraan gamasheen mariin homaatuu ammatti US waliin eegalame akka hin jirre waakkatte.

20. 26 Bitooteessa 2026Tiraamp daawwannaa Chaayinaa sababa waraana Iraanin dabarsan Caamsaa keessa taasisuufi

    

    Madda suuraa, Getty Images

    Pireezidaantiin Ameerikaa Doonaald Tiraamp sababa waraana Iraanin daawwannaa Chaayinaatti taasisuuf turan yeroo biraatti erga dabarsanii booda, walakkeessa baatii Caamsaa keessa daawwannaa akka taasisan mirkaneessaniiru. Caamsaa 14-15tti Chaayinaa keessatti pirezidaanti Chaayinaa ShiiJinping waliin akka wal argan himan.

    Dawwannaan kun waggoota kurnan booda daawwannaa hojii pirezidaantiin Ameerikaa Chaayinaatti taasisan isa jalqabaa ta’a. Tiraamp dhuma bara kanaa irratti Shii Jiinpiingi Waashingitan D.C.tti simachuuf yoo ta'u, Tiraamp Roobii darbe qondaaltonni “daawwannaa seena qabeessa kanaaf qophii xumuraa jiru” jechuun barreessaniiru.

    Waayit Haawus “Pireezidanti Shiin yeroo duula waraanaa kana hunda keessatti asitti argamuun baay’ee barbaachisaa ta’uu ni hubatu,” jedhe.

    Beejiing guyyoota Tiraampi jedhan kanaaf deebii hin kennine. Ministeerri Dhimma Alaa Chaayinaa jalqaba baatii kanaa waa’ee daawwannaa Tiraamp Waashingitan waliin mari’achaa akka jiru ibseera.

    Imalli kun jalqaba Amajjii 31tti kan beellamame yoo ta’u, Ameerikaa fi Israa’el ji’a darbe haleellaa Iraan irratti erga bananii booda dabarfame.

    Yeroo daawwannaa Tiraamp Chaayinaa taasisanitti waraanni Iraan ni xumurama jedhamee gaafatamee, Barreessituun preesii Waayit Haawus Kaaroolin Liiviit “Waraanni kun torban afur hanga ja’a'' akka hin dabarre eerean

    Yeroo dhumaaf pirezidaantiin Ameerikaa Chaayinaa kan daawwatan Sadaasa bara 2017, yeroo bulchiinsaTiraamp marsaa jalqabaatti ture.

    Hariiroon biyyoota lamaanii dhimmoota adda addaatiin, waldhabdee daldalaa irraa kaasee hanga dorgommii teeknooloojiitti hanga waldhabdee ji’oopoolitikaatti ga'eera. Daawwannaan Tiraamp kunis waldhabdee kana furuu irratti kan xiyyeefatu ta'uu mala.