رمضان: کووڈ کے سائے میں مسلمان دوسری مرتبہ روزے رکھیں گے

دنیا کے مختلف ممالک میں ماہ رمضان کا آغاز ہوگیا ہے اور مسلمان جہاں کہیں بھی بستے ہیں اس مبارک مہینے کو عقیدت و احترام سے مناتے ہیں۔

ماہِ رمضان اسلامی کیلنڈر کا نواں مہینہ ہے اور روایات کے مطابق خدا نے اسی ماہ میں قرآن نازل فرمایا تھا۔

یہ دوسری مرتبہ ہے کہ مسلمان کورونا کی وبا کے دوران رمضان کے روزے رکھیں گے۔

ماہ رمضان میں دنیا بھر کے مسلمان مسلسل 30 دن تک صبح صادق سے لے کر غروب آفتاب تک کھانے پینے سے پرہیز کریں گے۔

روزے رکھنا ایک عبادت ہے جس کے ذریعے مسلمان خود کو خدا کے قریب محسوس کرتے ہیں اور اپنی روحانی صحت اور ذاتی ڈسپلن کو بہتر کرتے ہیں۔

دنیا بھر سے یہ چند تصاویر رمضان اور پہلے روزے کی تیاری کے مختلف مناظر پیش کر رہی ہیں۔

اسلامک قمری کیلینڈر میں رمضان نواں مہینہ ہے۔

رمضان مسلمانوں کے لیے مقدس ترین مہینوں میں سے ایک ہے اور روزرے رکھنا لازمی عبادات میں سے ایک ہے۔

اس مہینے میں مسلمان عبادت کرتے ہیں، خدا سے قربت حاصل کرتے ہیں اور صبر و رحم دلی کا مظاہرہ کرتے ہیں۔

ایک ٹویٹ کے ذریعے اپنے پیغام میں متحدہ عرب امارات کے حکام نے لوگوں کو ہدایت دی ہے کہ وہ شام میں تقریبات سے اجتناب کریں، رشتے داروں سے ملنے جلنے کا سلسلہ کم سے کم رکھیں اور افطاریوں کے تبادلوں سے بھی گریز کریں۔

بنگلہ دیش میں حکومت نے 14 اپریل سے ایک ہفتے کے لیے سخت لاک ڈاؤن کا اعلان کیا ہے۔

بنگلہ دیش کے قصبے بریشال میں لوگ لاک ڈاؤن شروع ہونے سے پہلے سبزیاں خرید رہے ہیں۔

13 اپریل کو عراق کے شہر موصل میں لوگ سڑکوں پر جشن منا رہے ہیں۔