میکسیکو: زلزلے کے باعث مرنے والوں کی تعداد 90 ہو گئی

میکسیکو میں جمعرات کو آنے والے شدید زلزلے میں مرنے والوں کی تعداد حکام کے مطابق اب 90 ہو گئی ہے۔

یہ زلزلہ رچٹر سکیل پر آٹھ اعشاریہ ایک ریکارڈ کیا گیا تھا۔

حکومت کے ایک ترجمان نے کہا ہے کہ صرف جنوب مغربی ریاست اوکساکا میں 71 افراد ہلاک ہو گئے۔

میکسیکو ’شدید ترین‘ زلزلے میں 61 ہلاک

اطلاعات کے مطابق سینکڑوں خاندان خوف سے سڑکوں پر رات گزارنے پر مجبور ہیں کہ کہیں پھر سے زلزلہ نہ آئے۔ میکسیکو کے زلزلہ ریکارڈ کرنے والے ادارے کا کہنا ہے کہ اس کے بعد سے آفٹر شاک کی صورت میں 721 بار زلزلے کے جھٹکے محسوس کیے گئے ہیں۔

ایک صدی میں یہ اس ملک میں آنے والا شدید ترین زلزلہ تھا۔

جمعے کو ملک کا مشرقی حصہ ٹراپیکل طوفان کیٹیا کی زد میں آ گیا تھا اور دو افراد کی شدید بارش میں مٹی کے تودے گرنے سے موت ہو گئی۔