لائیو, امریکی بحری جہاز آبنائے ہرمز سے گزر سکتے ہیں اگر وہ دشمنی کا مظاہرہ نہ کریں، ایرانی نائب وزیرِ خارجہ

لائیو کوریج

1. 14 منٹ قبلانڈیا کا لبنان میں اسرائیلی حملوں میں ہونے والی ’بڑی تعداد میں شہری ہلاکتوں‘ پر تشویش کا اظہار

   

   ،تصویر کا ذریعہGetty Images

   انڈیا نے لبنان میں اسرائیلی حملوں کے نتیجے میں ہونے والی ’بڑی تعداد میں شہری ہلاکتوں‘ پر تشویش کا اظہار کیا ہے۔

   انڈین وزارتِ خارجہ کے ترجمان رندھیر جیسوال نے کہا کہ انڈیا کے لیے موجودہ صورتحال ’انتہائی پریشان کن‘ ہے، خصوصاً اس لیے کہ انڈیا اقوامِ متحدہ کی امن فوج یونیفِل میں اپنے دستے تعینات کیے ہوئے ہے اور لبنان کے امن و استحکام میں براہِ راست دلچسپی رکھتا ہے۔

   ترجمان نے مزید کہا کہ لبنان میں جاری صورتحال پر انڈیا گہری نظر رکھے ہوئے ہے اور ملک کی اولین ترجیح وہاں موجود شہریوں کا تحفظ ہے۔

   وزارتِ خارجہ کے ترجمان نے بتایا کہ انڈیا لبنان میں امن اور استحکام کا خواہاں ہے اور اس مقصد کے لیے عالمی برادری کے ساتھ رابطے میں ہے۔

   ترجمان کے مطابق اسرائیل کی جانب سے جاری حملوں کے باعث صورتحال تشویشناک ہے، اور انڈیا نے زور دیا ہے کہ شہریوں اور سول تنصیبات کا تحفظ بین الاقوامی انسانی قوانین کے مطابق یقینی بنایا جانا چاہیے۔

   انڈیا نے یہ بھی کہا کہ وہ لبنان کی خودمختاری، سلامتی اور علاقائی سالمیت کی حمایت کرتا ہے اور خطے میں کشیدگی کم کرنے کی کوششوں کی حوصلہ افزائی کرتا ہے۔

2. 29 منٹ قبلپاکستان کی تیاریوں کے باوجود امن مذاکرات سے متعلق غیر یقینی صورتحال ہے, بی بی سی نیوز کی چیف بین الاقوامی نامہ نگار لیز ڈوسیٹ کا تجزیہ

   

   ،تصویر کا ذریعہEPA

   اسلام آباد میں سنیچر کے روز طے شدہ امریکہ اور ایران کے اعلیٰ سطح مذاکرات کے بارے میں اب بھی غیر یقینی صورتحال برقرار ہے۔ جب میں نے جمعے کی صبح تہران میں وزارتِ خارجہ کے ایک سینیئر اہلکار سے پوچھا تو ان کا جواب تھا کہ ’ابھی کچھ حتمی فیصلہ نہیں ہوا‘۔

   گذشتہ روز سوشل میڈیا پر یہ رپورٹس سامنے آئیں کہ ایرانی وفد پاکستان پہنچ چکا ہے، لیکن ان کی تردید کر دی گئی اور ایک پوسٹ بھی حذف کر دی گئی۔ اس کے باوجود پاکستان میں تیاریوں کی رفتار سے اندازہ ہوتا ہے کہ یہ مذاکرات طے شدہ منصوبے کے مطابق ہونے جا رہے ہیں۔

   ایران کی نیم سرکاری خبر رساں ایجنسی تسنیم، جو پاسدارانِ انقلاب کے قریب سمجھی جاتی ہے، نے کل رپورٹ کیا تھا کہ جب تک لبنان میں جنگ بندی نہیں ہوتی، مذاکرات معطل رہیں گے۔ ایران کے نائب وزیرِ خارجہ سعید خطیب زادہ نے بھی بی بی سی کے پروگرام ٹوڈے میں یہی مؤقف دہرایا۔

   یہ صورتحال ایک مشکل انتخاب کی طرف اشارہ کرتی ہے: کیا ایران اپنے اہم ترین اتحادی حزب اللہ سے لاتعلقی اختیار کرے، یا اہم سفارتی کوششوں کو خطرے میں ڈال دے؟ جنگ بندی کے لیے ہونے والی ہنگامی کوششیں آخری لمحات تک جاری رہیں، اور بظاہر یہی کیفیت ان مذاکرات پر بھی اثر انداز ہو رہی ہے۔

3. 45 منٹ قبلآبنائے ہرمز میں ’ٹول ٹیکس یا گزرگاہ پر پابندیاں‘ قابلِ قبول نہیں ہوں گی، برطانوی وزیر اعظم کا خلیجی دورے کے اختتام پر بیان

   

   ،تصویر کا ذریعہUK Pool

   خلیجی ممالک کے دورے کے اختتام پر برطانوی وزیرِ اعظم کیئر سٹارمر نے کہا ہے کہ اس پورے دورے میں زیادہ تر گفتگو آبنائے ہرمز سے جہازوں کی محفوظ گزرگاہ کے لیے ’عملی منصوبے‘ پر مرکوز رہی۔

   یہ اہم آبی راستہ دنیا کی تقریباً 20 فیصد تیل اور گیس کی ترسیل کا مرکز ہے، لیکن ایران کی جانب سے اجازت کے بغیر گزرنے والے جہازوں کو نشانہ بنانے کی دھمکیوں کے بعد یہاں سے گزرنے کی شرح میں نمایاں کمی آئی ہے۔

   ایران کا آبنائے ہرمز پر ٹول ٹیکس لگانے کا منصوبہ، امریکہ کی دھمکی

   برطانوی وزیر اعظم کیئر سٹارمر نے کہا کہ ’یہ تنازع ہماری آنے والی نسل کو متعین کرے گا اور ہمیں اس کا جواب دینا ہوگا، اور ہم مضبوطی سے جواب دیں گے‘۔ ان کا کہنا تھا کہ انھوں نے خلیجی رہنماؤں کے ساتھ ’مشترکہ دفاع‘ کے موضوع پر بھی بات چیت کی۔

   جمعرات کی شب کیئر سٹارمر نے امریکی صدر ڈونلڈ ٹرمپ سے بھی گفتگو کی، اور ڈاؤننگ سٹریٹ کے مطابق دونوں رہنماؤں نے موجودہ جنگ بندی اور آبنائے ہرمز میں جہاز رانی کی بحالی کے لیے ’عملی منصوبے‘ کی ضرورت پر بات کی۔

   موجودہ صورتحال کے بارے میں بات کرتے ہوئے وزیرِ اعظم نے تسلیم کیا کہ موجودہ جنگ بندی ’نہایت نازک‘ ہے، اور انھوں نے نشریاتی اداروں کو بتایا کہ خطے میں کسی بھی طویل المدتی امن معاہدے کے حصے کے طور پر آبنائے ہرمز میں ’ٹول ٹیکس یا گزرگاہ پر پابندیاں‘ قابلِ قبول نہیں ہوں گی۔

4. ایک گھنٹہ قبلجنگ بندی کی صورت میں اسرائیل سے مذاکرات کریں گے: لبنان

   

   ،تصویر کا ذریعہReuters

   لبنان کے صدارتی دفتر کے ایک سینیئر اہلکار نے بی بی سی کو تصدیق کی ہے کہ اگر پہلے جنگ بندی نافذ ہو جائے تو لبنان آئندہ ہفتے اسرائیل کے ساتھ براہِ راست مذاکرات میں شرکت کرے گا۔ اہلکار کے مطابق ملاقات کی تاریخ اور وقت کا ابھی فیصلہ نہیں ہوا۔

   لبنان اور اسرائیل کے درمیان براہِ راست مذاکرات ماضی میں بھی کبھی کبھار ہوئے ہیں، لیکن یہ ایک غیر معمولی عمل سمجھا جاتا ہے۔ عموماً دونوں ممالک کے درمیان رابطہ امریکی ثالثی کے ذریعے ہوتا ہے۔

   نومبر 2024 میں ہونے والی جنگ بندی کے بعد سے مذاکرات کی بحالی کی کوششیں جاری ہیں، اور امریکی نمائندے اس دوران دونوں فریقوں کے درمیان بالواسطہ بات چیت کی سہولت فراہم کرتے رہے ہیں۔

5. 2 گھنٹے قبللبنان میں جنگ بندی صرف نام کی رہ گئی، لڑائی بدستور جاری, بی بی سی نیوز کے فرینک گارڈنرکا تجزیہ

   

   ،تصویر کا ذریعہReuters

   لبنان میں جاری صورتحال کو دیکھتے ہوئے یہ کہا جا سکتا ہے کہ موجودہ جنگ بندی ’صرف نام کی‘ رہ گئی ہے، کیونکہ اس پر عملدرآمد میں متعدد خامیاں سامنے آ رہی ہیں۔ اگرچہ بمباری میں کمی آئی ہے، لیکن فائرنگ اور جھڑپیں مکمل طور پر نہیں رکیں، جبکہ کویت نے دعویٰ کیا ہے کہ گذشتہ چند گھنٹوں میں اسے ایرانی ڈرون حملوں کا سامنا کرنا پڑا۔

   دوسری جانب لبنان میں جنگ شدت اختیار کر رہی ہے۔ اسرائیل کا مؤقف ہے کہ جنگ بندی اس پر لاگو نہیں ہوتی، جبکہ پاکستان اور ایران اسے قابلِ عمل سمجھتے ہیں۔

   آبنائے ہرمز، جہاں سے دنیا کی تقریباً 20 فیصد تیل اور گیس کی ترسیل ہوتی ہے، بدستور کشیدگی کا مرکز بنی ہوئی ہے۔ اسی دوران سابق امریکی صدر ڈونلڈ ٹرمپ نے سوشل میڈیا پلیٹ فارم ٹروتھ سوشل پر ناراضی کا اظہار کرتے ہوئے کہا ہے کہ ایران اپنے معاہدے کی پاسداری نہیں کر رہا۔

   تجزیہ کاروں کے مطابق ایران اگرچہ اس جنگ میں فوجی نقصان اٹھا چکا ہے اور اس کے متعدد میزائل اور ڈرون تباہ کیے گئے ہیں، لیکن وہ انھیں دوبارہ تیار کرنے کی صلاحیت رکھتا ہے اور اسے روس اور چین جیسے ممالک سے مزید مدد بھی مل سکتی ہے۔

   چونکہ ایران اس جنگ میں نقصانات کے باوجود بچ نکلا اس لیے مبصرین کے مطابق وہ خطے میں اپنی روایتی حدود سے باہر نکل آیا ہے اور اس کی پوزیشن پہلے سے زیادہ مضبوط دکھائی دیتی ہے۔

   

   ،تصویر کا ذریعہGetty Images

   ’ایران جغرافیے کو استعمال کرتے ہوئے اثر و رسوخ بڑھا رہا ہے‘

   موجودہ صورتحال میں ایران اپنے جغرافیائی محلِ وقوع کو استعمال کرتے ہوئے خطے میں اپنا اثر و رسوخ بڑھا رہا ہے۔ چھ ہفتے قبل تک ایران پابندیوں کے باعث محدود تھا اور آبنائے ہرمز کو نشانہ نہیں بنا رہا تھا، لیکن جنگ کے بعد اس کی پوزیشن تبدیل ہوئی ہے۔

   اب ایران آبنائے ہرمز سے گزرنے والے جہازوں پر ٹول ٹیکس عائد کرنے کی تجویز دے رہا ہے اور چاہتا ہے کہ اس کی فوج کو جہازوں کے کارگو کی جانچ کا اختیار حاصل ہو۔ خلیجی ممالک کے لیے یہ مطالبات قابلِ قبول نہیں، لیکن ایران اس اہم آبی گزرگاہ پر اپنا کنٹرول بڑھانے کی کوشش کر رہا ہے اور اس کی بنیادی وجہ اس کا جغرافیہ ہے۔

   ماہرین کا کہنا ہے کہ آبنائے ہرمز کو مکمل طور پر طاقت کے ذریعے کھلا رکھنا تقریباً ناممکن ہے۔ اس علاقے میں بے شمار چھوٹے راستے، غاریں اور ساحلی مقامات ہیں، جہاں ایران صرف ایک میزائل چھپا کر بھی حملے کے خطرے کو برقرار رکھ سکتا ہے۔ یہی خطرہ کافی ہے کہ انشورنس کمپنیاں جہاز رانی کو انتہائی مہنگا یا غیر محفوظ قرار دے دیں۔

   اسی لیے ایران کو اپنی بحریہ کی ضرورت نہیں پڑتی، اس کے لیے اس کا ساحل ہی کافی ہے۔

6. 2 گھنٹے قبلپاکستانی اور فرانسیسی وزرائے خارجہ کا لبنان میں ’سنگین جنگ بندی کی خلاف ورزیوں‘ پر اظہارِ تشویش

   

   ،تصویر کا ذریعہReuters

   پاکستان اور فرانس کے وزرائے خارجہ نے لبنان میں جنگ بندی کی مبینہ سنگین خلاف ورزیوں پر گہری تشویش کا اظہار کیا ہے۔

   پاکستان کے نائب وزیرِ اعظم و وزیرِ خارجہ محمد اسحاق ڈار اور فرانسیسی وزیرِ خارجہ ژاں نوئل بارو کے درمیان ہونے والی ٹیلی فونک گفتگو میں خطے کی صورتحال اور جاری کشیدگی پر تبادلہ خیال کیا گیا۔

   پاکستان کے دفترِ خارجہ کے مطابق دونوں رہنماؤں نے اس بات پر زور دیا کہ لبنان میں جنگ بندی کا مکمل احترام اور اس پر عمل درآمد علاقائی امن کے لیے ناگزیر ہے۔

   فرانسیسی وزیرِ خارجہ نے گفتگو کے دوران کہا کہ فرانس خطے میں پائیدار امن اور استحکام کے لیے پاکستان کی سفارتی کوششوں کی حمایت کرتا ہے۔

   یہ پیش رفت ایسے وقت میں ہوئی ہے جب امریکہ اور ایران کے درمیان امن مذاکرات اس ہفتے کے آخر میں پاکستان میں متوقع ہیں، تاہم اب بھی واضح نہیں کہ یہ مذاکرات طے شدہ شیڈول کے مطابق ہوں گے یا نہیں۔

7. 2 گھنٹے قبلآبنائے ہرمز میں جہاز رانی محدود، جنگ بندی کے باوجود مال بردار بحری ٹریفک بحال نہ ہو سکی, ڈین آئزیکس، بی بی سی نیوز

   امریکہ اور ایران کے درمیان دو ہفتوں کی جنگ بندی کے اعلان کے باوجود آبنائے ہرمز میں بحری آمدورفت معمول پر نہیں آ سکی، اور جہاز مالکان اب بھی گزرگاہ کو غیر محفوظ تصور کر رہے ہیں۔

   بحری ٹریفک کی نگرانی کرنے والی ویب سائٹ میرین ٹریفک کے مطابق جنگ بندی کے اعلان کے بعد سے اب تک صرف 15 بحری جہاز آبنائے ہرمز سے گزرے ہیں، جبکہ تنازع سے قبل یہاں سے روزانہ تقریباً 140 جہاز گزرتے تھے۔

   ان 15 جہازوں میں سے چار ٹینکر تھے جو تیل، گیس یا کیمیکلز لے جا رہے تھے، جبکہ باقی مختلف اقسام کے کنٹینر بردار جہاز تھے۔

   اگرچہ جنگ بندی کے معاہدے میں ’محفوظ گزرگاہ‘ کی شق شامل ہے، تاہم ایران نے واضح کیا ہے کہ جو جہاز بغیر اجازت آبنائے ہرمز عبور کرنے کی کوشش کریں گے انھیں ’نشانہ بنا کر تباہ‘ کیا جا سکتا ہے۔

   تجزیہ کاروں کے مطابق ایران کی جانب سے سخت نگرانی، پیشگی منظوری کے تقاضے اور سکیورٹی خدشات کی وجہ سے بیشتر جہاز مالکان رسک لینے سے گریز کر رہے ہیں۔

   شپنگ انٹیلیجنس فرم ’لائیڈز لسٹ‘ کا کہنا ہے کہ تنازع کے آغاز کے بعد ایران کی مؤثر ناکہ بندی کے نتیجے میں تقریباً 800 جہاز خلیج میں پھنسے ہوئے ہیں، جن میں سے زیادہ تر مال بردار ہیں اور کئی ہفتوں سے اپنی منزل تک پہنچنے کے منتظر ہیں۔

   واضح رہے کہ آبنائے ہرمز دنیا کی اہم ترین توانائی گزرگاہوں میں شمار ہوتی ہے، جہاں سے عالمی تیل کا بڑا حصہ گزرتا ہے۔ ماہرین کا کہنا ہے کہ موجودہ صورتحال نے عالمی سپلائی چین، تیل کی قیمتوں اور شپنگ انشورنس پر نمایاں دباؤ ڈالا ہے، اور ٹریفک کی مکمل بحالی میں مزید وقت لگ سکتا ہے۔

   

8. 3 گھنٹے قبل’آپریشن سندور‘ کے دوران انڈین فوج نے نماز کے اوقات میں حملہ نہ کرنے کا فیصلہ کیا تھا: انڈین آرمی چیف

   

   ،تصویر کا ذریعہNurPhoto via Getty Images

   انڈیا کے آرمی چیف جنرل اُپندر دویدی کا کہنا ہے کہ ’آپریشن سندور‘ کے دوران انڈین فوج نے نماز کے دوران حملہ نہ کرنے کا فیصلہ کیا تھا۔

   بدھ کے روز شائع ہونے والے ایک انٹرویو کے دوران ایک سوال کے جواب میں جنرل دویدی کا کہنا تھا کہ آپریشن کے دوران ایک موقع پر ہم اپنے اہداف کو تباہ کرنے کے وقت کا تعین کر رہے تھے۔ ان کا کہنا ہے کہ حملے کا وقت دو بجے، چار بجے یا کوئی بھی بھی وقت ہو سکتا تھا۔

   ’لیکن ہم نے یہ یقینی بنایا کہ ہم اس وقت عسکریت پسندوں کے کیمپوں پر حملہ نہ کریں جب وہاں لوگ نماز پڑھ رہے ہوں کیونکہ سب کا خدا ایک ہی ہے۔

   جنرل دویدی نے مزید کہا، ’اسی لیے ہم نے وہ وقت چنا جب ہمیں معلوم تھا کہ نماز ادا نہیں کی جا رہی ہوگی۔‘

9. 4 گھنٹے قبلامریکی بحری جہاز بھی آبنائے ہرمز سے گزر سکتے ہیں، ایرانی نائب وزیرِ خارجہ

   

   ،تصویر کا ذریعہNurPhoto via Getty Images

   ایران کے نائب وزیرِ خارجہ سعید خطیب زادہ کا کہنا ہے کہ امریکی بحری جہاز بھی آبنائے ہرمز سے گزر سکتے ہیں تاوقتیکہ وہ کوئی دشمنی پر مبنی طرزِ عمل اختیار نہ کریں۔

   بی بی سی فارسی کے مطابق خطیب زادہ نے ایرانی میڈیا کو بتایا کہ ’آبنائے ہرمز کھلی ہوئی ہے تاہم تکنیکی وجوہات کے باعث جہازوں کے لیے ضروری ہے کہ وہ ایرانی افواج کے ساتھ رابطہ رکھیں۔‘

   ایرانی وزیر کا کہنا تھا ہم آبنائے ہرمز میں موجود اپنے محفوظ راستوں کے ذریعے ان کے محفوظ سفر کو یقینی بنائیں گے۔

   اس سے قبل امریکہ کے صدر ڈونلڈ ٹرمپ نے ایران پر تنقید کرتے ہوئے کہا تھا کہ وہ آبنائے ہرمز کے ذریعے تیل کی نقل و حمل کے معاملے میں ’بہت خراب کام‘ کر رہا ہے۔ ان کا کہنا تھا کہ ’یہ وہ معاہدہ نہیں جو ہمارے درمیان طے ہوا تھا۔‘

   یاد رہے کہ گذشتہ روز ایران کے سرکاری میڈیا میں شائع ہونے والے ایک بیان میں پاسدارانِ انقلاب نے آبنائے ہرمز سے گزرنے کا ارادہ رکھنے والے بحری جہازوں کو مشورہ دیا تھا کہ وہ ’بحری حفاظت کے اصولوں پر عمل کریں اور سمندری بارودی سرنگوں سے محفوظ رہنے کے لیے متبادل راستے اختیار کریں۔‘

   پاسدارانِ انقلاب نے اپنے بیان میں متبادل راستوں کا تعین کرنے کے ساتھ ساتھ ایک نقشہ بھی جاری کیا ہے۔

   نقشے کے مطابق بحیرہ عمان سے داخل ہونے والے بحری جہاز لاراک جزیرے کے شمال کی طرف جا سکیں گے اور پھر وہاں سے خلیج فارس کی طرف اپنا سفر جاری رکھ سکیں گے۔

   دوسری سمت جانے والے بحری جہاز خلیج فارس سے نکلتے ہوئے جزیرہ لاراک کے جنوب سے گزر کر بحیرہ عمان کی طرف جا سکتے ہیں۔

   

   ،تصویر کا ذریعہIRGC

10. 5 گھنٹے قبلحزب اللہ کا جنوبی لبنان میں اسرائیلی فوجیوں کے ایک گروپ کو نشانہ بنانے کا دعویٰ

    حزب اللہ نے دعویٰ کیا ہے کہ اس کی فورسز نے جمعے کے روز علی الصبح اسرائیلی فوجیوں کے ایک گروپ پر حملہ کیا ہے۔

    مسلح تنظیم کے مطابق اسرائیلی فوجیوں کو جنوبی لبنان کے قصبے الخیام کے نزدیک نشانہ بنایا گیا ہے۔

    اسرائیل کی جانب سے اس بارے میں تاحال کوئی تبصرہ سامنے نہیں آیا ہے۔

11. 5 گھنٹے قبلایران جنگ کے دوران عمان نے اپنے عرب ہمسایوں سے مختلف رویہ کیوں اپنایا؟, اومنیہ النجار، بی بی سی مانیٹرنگ

    

    ،تصویر کا ذریعہGallo Images/Orbital Horizon/Copernicus Sentinel Data 2026

    امریکہ اور اسرائیل کی جانب سے ایران کے خلاف جاری جنگ کے دوران تہران کے حوالے سے خلیجی تعاون کونسل کے بیشتر ممالک کے مؤقف میں سختی آئی ہے۔ مگر عمان کا معاملہ مختلف ہے۔

    واشنگٹن اور تہران کے درمیان طویل عرصے سے ثالث کا کردار ادا کرنے والا یہ ملک اس جنگ کے دوران بھی غیر جانبدار رہا ہے اور خطے میں اپنی ایک منفرد حیثیت برقرار رکھے ہوئے ہے۔

    جہاں دیگر خلیجی ممالک نے ایران کے خلاف زیادہ جارحانہ اور دھمکی آمیز لہجہ اختیار کیا ہے، وہیں عمان نے اپنی روایتی خارجہ پالیسی قائم رکھتے ہوئے ’سب کا دوست، کسی کا دشمن نہیں‘ کے اصول پر عمل پیرا رہا۔

    اس مؤقف کے باعث عمان خیلج تعاون کونسل میں امریکی اور اسرائیلی مہم کے ناقد کے طور پر سامنے آیا اور اسے ’غیر قانونی جنگ‘ قرار دیتے ہوئے اس کے خاتمے کا مطالبہ کرتا آیا ہے۔

    عمان کونسل کا وہ واحد ملک ہے جس نے اپنی سرزمین پر حملے کے بعد بھی واضح طور پر اعلان کیا ہے کہ وہ اس جنگ میں شامل نہیں ہوگا۔

    اپنے اس رویے کے باعث عمان خطے میں تہران کے ساتھ جنگ بندی تک پہنچنے کے لیے آخری قابلِ اعتماد سفارتی راستہ رہ گیا ہے۔

12. 6 گھنٹے قبلعالمی رہنماؤں کی ایران، امریکہ جنگ بندی ختم ہونے سے قبل تیل کی سپلائی یقینی بنانے کی کوشش

    دنیا بھر کے رہنما ایران اور امریکہ کے درمیان طے پانے والی دو ہفتے کی جنگ بندی ختم ہونے سے قبل تیل اور ایندھن کی فراہمی کو یقینی بنانے کی کوشش کر رہے ہیں۔

    جاپانی میڈیا رپورٹس کے مطابق جاپان نے تصدیق کی ہے کہ وہ آئندہ ماہ تک اپنے تیل کے ذخائر میں سے 20 دن کا سٹاک جاری کر دے گا جبکہ آبنائے ہرمز سے گزرنے والے جہازوں کی آمدورفت پر نظر رکھے ہوئے ہے۔

    اسی دوران آسٹریلیا کے وزیرِ اعظم انتھونی البانیز سنگاپور کے دورے پر ہیں جہاں وہ اپنے ملک کے لیے ایندھن کی سپلائی کو یقینی بنانے کی کوشش کر رہے ہیں۔

    امریکی نائب صدر جے ڈی وینس بھی سنیچر کے روز سے شروع ہونے والے ایران کے ساتھ امن مذاکرات کی قیادت کے لیے اسلام آباد پہنچ رہے ہیں۔

    دوسری جانب اسرائیلی وزیرِ اعظم بنیامین نیتن یاہو نے اپنی کابینہ کو لبنان کے ساتھ امن معاہدے پر بات چیت شروع کرنے کی تیاری کرنے کا کہنا ہے۔ یہ پیش رفت ایک ایسے وقت میں سامنے آئی ہے جب بدھ کے روز اسرائیلی فضائی حملوں میں لبنان میں سینکڑوں افراد ہلاک ہو گئے تھے۔

13. 6 گھنٹے قبلاسرائیل اور حزب اللہ کے درمیان رات بھر جھڑپیں, ڈینیئل ڈی سیمون, یروشلم

    

    ،تصویر کا ذریعہAFP via Getty Images

    رات بھر اسرائیل اور حزب اللہ کے درمیان تازہ جھڑپیں ہوتی رہیں جس کے دوران ایران نے لبنان پر فضائی حملے کیے جبکہ مسلح گروہ کی جانب سے اسرائیل کی جانب راکٹ داغے گئے جس کے باعث تل ابیب سمیت کئی علاقوں میں ہنگامی الرٹس جاری کیے گئے۔

    ایران اور امریکہ کے درمیان جنگ بندی معاہدے میں لبنان کی مبینہ حیثیت تنازع کا باعث بن رہی ہے اور اس سے رواں ہفتے کے آخر میں پاکستان میں ہونے والے طے شدہ امن مذاکرات سے پہلے کشیدگی میں اضافہ ہو رہا ہے۔

    اسرائیل کا کہنا ہے کہ اس نے رات بھر لبنان میں ان مقامات کو نشانہ بنایا جہاں سے اس کے مطابق حزب اللہ راکٹ داغ رہا تھا۔

    دوسری جانب ایران کی حمایت یافتہ تنظیم کا کہنا ہے کہ اس نے اسرائیل کے متعدد علاقوں پر راکٹ فائر کیے ہیں۔

    یہ تازہ جھڑپیں ایک ایسے وقت میں ہو رہی ہیں جب امریکی صدر ٹرمپ نے ایک بیان میں اسرائیل کی جانب سے لبنان میں کارروائیوں میں کمی لانے کا عندیہ دیا تھا۔

    بدھ کے روز اسرائیل کے لبنان پر حملوں میں 300 سے زیادہ افراد ہلاک ہوئے تھے۔

    ایران کے سرکاری ٹی وی پر نئے رہبرِ اعلیٰ مجتبیٰ خامنہ ای سے منسوب ایک بیان نشر کیا گیا جس میں کہا گیا ہے کہ ایران امریکہ اور اسرائیل کی جانب سے اپنے ملک اور کے اتحادیوں پر حملوں کا ’بدلہ لینے کا حق محفوظ‘ رکھتے ہیں۔

14. 7 گھنٹے قبلجیفری اپسٹین نے ڈونلڈ ٹرمپ سے نہیں ملوایا: میلانیا ٹرمپ کی افواہوں کی تردید

    

    ،تصویر کا ذریعہGetty Images

    امریکی خاتونِ اول میلانیا ٹرمپ نے جنسی مجرم جیفری اپسٹین سے کسی بھی قسم کے تعلق کی تردید کی ہے۔

    میلانیا ٹرمپ نے وائٹ ہاؤس میں صحافیوں کو بتایا کہ ان کے اور ایپسٹین کے درمیان رابطوں کے بارے میں پھیلی افواہیں ’آج ہی ختم ہو جانی چاہیئیں۔‘

    جمعرات کے روز کیے جانے والے غیر متوقع اعلان میں امریکی خاتونِ اول نے اپسٹین کے جنسی جرائم کے متاثرین کے لیے کانگریس میں سماعتوں کا مطالبہ کیا۔

    انھوں نے آن لائن پھیلی ان افواہیں کی بھی تردید کی جن میں دعویٰ کیا گیا تھا کہ ایپسٹین نے انھیں ڈونلڈ ٹرمپ سے ملوایا تھا۔ میلانیا ٹرمپ کا کہنا ہے کہ یہ افواہیں ان کی ’ساکھ کو نقصان پہنچانے کی بدنیتانہ کوششیں‘ ہیں۔

    تاحال یہ واضح نہیں کہ انھیں یہ اعلان کرنے کی ضرورت کیوں پیش آئی۔

    انھوں نے کہا کہ وہ ایپسٹین کے جرائم کی متاثرہ نہیں اور یہ کہ ان کا ایپسٹین سے سنہ 2000 میں مختصر تعارف ہوا تھا۔

    میلانیا ٹرمپ نے اپسٹین کی ساتھی اور سزا یافتہ گیلین میکسویل سے تعلقات کی بھی تردید کی۔

    انھوں نے اپسٹین فائلز میں شامل سنہ 2002 کی اپنی اور میکسویل کے درمیان ایک ای میل کا حوالہ دیتے ہوئے اسے محض ’غیر رسمی خط و کتابت‘ اور ’شائستہ جواب‘ قرار دیا۔

    میلانیا ٹرمپ جس ای میل کا حوالہ دے رہی تھیں وہ بظاہر ’’جی‘‘ کے نام لکھی گئی تھی جو غالباً گیلین میکسویل کے لیے استعمال ہوا تھا۔ اس ای میل میں ’جے ای‘ کے متعلق نیو یارک میگزین میں شائع ہونے والی ایک تحریر کی تعریف بھی کی گئی ہے۔ اس تحریر کے ساتح ’جی‘ کی ایک تصویر شائع ہوئی تھی۔

15. 8 گھنٹے قبلپاکستان کا ایران، امریکہ مذاکرات کے لیے آنے والے مندوبین اور صحافیوں کے لیے ’ویزا آن ارائیول‘ کا اعلان

    

    ،تصویر کا ذریعہAFP via Getty Images

    پاکستان نے اسلام آباد میں ہونے والے ایران اور امریکہ مذاکرات میں شرکت کے لیے آنے والے مندوبین اور صحافیوں کے لیے ’ویزا آن اراول‘ کا اعلان کیا ہے۔

    جمعہ کی صبح ایکس پر جاری ایک پیغام میں پاکستان کے نائب وزیر اعظم اور وزیرِ خارجہ اسحاق ڈار کا کہنا ہے کہ مذاکرات کے لیے آسلام آباد آنے والے تمام مندوبین، بشمول شریک ممالک کے صحافیوں، کا خیرمقدم کیا جائے گا۔

    ڈار کا کہنا ہے کہ ’اس مقصد کے لیے تمام ایئرلائنز سے درخواست کی جاتی ہے کہ وہ ایسے تمام افراد کو بنا ویزا بورڈنگ کی اجازت دیں۔‘

    ’پاکستان میں امیگریشن حکام ان افراد کو ویزا آن ارائیول جاری کریں گے۔‘

16. 8 گھنٹے قبلعالمی آبی راستوں سے گزرنے والے جہازوں سے ٹول وصول نہیں کیا جا سکتا، برطانوی وزیرِ خارجہ

    برطانیہ کی وزیرِ خارجہ یوویٹ کوپر کا کہنا ہے کہ برطانیہ اس تنازع کے ’فوری حل‘ اور اس کے بعد کے مرحلے کے لیے ایک منصوبے پر کام کر رہا ہے۔

    برطانوی وزیر کا کہنا ہے کہ سب سے اہم آبنائے ہرمز کا ’دوبارہ کھلنا‘ ہے۔

    ان کا کہنا ہے کہ کوئی بھی ملک اس آبی گزرگاہ کو بند نہیں کر سکتا کیونکہ یہ بین الاقوامی سمندری قوانین کے خلاف ہے۔

    کوپر کا کہنا ہے کہ آبنائے ہرمز مکمل اور غیر مشروط طور پر کھولے جانے کی ضرورت ہے کیونکہ یہ نہ صرف موجودہ جنگ بندی بلکہ خطے کے طویل المدتی مستقبل کا بھی اہم جزو ہے۔

    برطانوی وزیر کے مطابق کوئی بھی فریق کسی بحری گزرگاہ سے گزرنے کا بنیادی حق یکطرفہ طور پر سلب نہیں کر سکتا اور نہ ہی انھیں کسی انفرادی خریدار کو فروخت کیا جا سکتا ہے۔

    ان کا مزید کہنا ہے کہ ’عالمی آبی راستے پر ٹول کی بھی کوئی گنجائش نہیں۔‘

17. 8 گھنٹے قبلتازہ اسرائیلی فضائی حملوں کے بعد لبنان میں تباہی کے مناظر

    جنوبی لبنانی شہر شوکین کے ایک گاؤں کی تصاویر سے ظاہر ہوتا ہے کہ اسرائیل کی جانب سے تازہ فضائی حملوں کے بعد گاؤں ملبے کے ڈھیر میں تبدیل ہو گیا ہے۔

    اسرائیلی فضائیہ نے ایکس پر جاری ایک پوسٹ میں کہا تھا کہ وہ علاقے میں ’دہشت گردوں‘ کی تنصیبات کو نشانہ بنا رہی ہے۔

    بیان میں کہا گیا اسرائیلی فضائیہ نے لبنان میں ان مقامات کو نشانہ بنایا ہے جہاں سے حزب اللہ اسرائیل پر راکٹ داغے تھے۔

    لبنان کے سرکاری میڈیا کے مطابق اسرائیلی طیاروں نے کئی دیگر شہروں کو بھی نشانہ بنایا، جس کے نتیجے میں متعدد افراد زخمی ہوئے جبکہ مکانات بھی تباہ ہوئے ہیں۔

    

    ،تصویر کا ذریعہGetty Images

    

    ،تصویر کا ذریعہGetty Images

    

    ،تصویر کا ذریعہGetty Images

18. 8 گھنٹے قبلایران آبنائے ہرمز کے معاملے میں ’بہت خراب کام‘ کر رہا ہے، یہ وہ معاہدہ نہیں جو طے ہوا تھا: ڈونلڈ ٹرمپ

    

    ،تصویر کا ذریعہAFP via Getty Images

    امریکہ کے صدر ڈونلڈ ٹرمپ نے ایران پر الزام عائد کیا ہے کہ وہ آبنائے ہرمز کے ذریعے تیل کی نقل و حمل کے معاملے میں ’بہت خراب کام‘ کر رہا ہے۔ ان کا کہنا ہے کہ ’یہ وہ معاہدہ نہیں جو ہمارے درمیان طے ہوا تھا۔‘

    اپنے سوشل میڈیا ویب سائٹ ٹروتھ سوشل پر جاری پیغام میں صدر ٹرمپ کا کہنا ہے کہ ایسی خبریں سامنے آئی ہیں کہ ایران آبنائے ہرمز سے گزرنے والے ٹینکروں سے فیس وصول کر رہا ہے۔

    امریکی صدر کا کہنا ہے ایران کو ایسا نہیں کرنا چاہیے ’اور اگر وہ کر رہے ہیں تو فوراً بند کر دیں۔‘

    میرین ٹریفک ڈیٹا کے تجزیے سے پتہ چلتا ہے کہ منگل کی رات جنگ بندی کے اعلان کے بعد سے کم از کم نو بحری جہاز آبنائے ہرمز عبور کر چکے ہیں۔ ان میں دو آئل اور کیمیکل ٹینکرز بھی شامل ہیں۔

    ملٹی نیشنل جوائنٹ میری ٹائم انفارمیشن سینٹر کے اعداد و شمار کے مطابق، جنگ سے پہلے ہر روز اوسطاً 138 بحری جہاز یہاں سے گزرتے تھے۔ لیکن تنازع کی وجہ سے یہاں ٹریفک نہ ہونے کے برابر ہے اور لگ بھگ 800 بحری جہاز خطے میں پھنسے ہوئے ہیں۔

19. 10 اپريل 2026برطانوی وزیرِ اعظم اور امریکی صدر کے درمیان آبنائے ہرمز کھلوانے کے حوالے سے گفتگو

    

    ،تصویر کا ذریعہGetty Images

    برطانوی وزیرِ اعظم کے دفتر کے مطابق برطانیہ کے وزیرِ اعظم کیئر سٹامر اور امریکی صدر ٹرمپ نے کہا ہے کہ وہ آبنائے ہرمز کو کھلوانے کے لیے کسی حل تک پہنچنے کے عمل کے ’اگلے مرحلے‘ میں داخل ہو چکے ہیں۔

    کیئر سٹامر ابھی قطر پہنچے ہیں، جہاں سے امریکی صدر کے ساتھ ان کی فون پر گفتگو ہوئی ہے۔

    برطانوی وزیرِ اعظم کے دفتر سے جاری بیان میں کہا گیا ہے کہ سٹامر نے ٹرمپ کو آبنائے ہرمز میں جہاز رانی کے راستے کو کھولنے کے لیے ’قابلِ عمل منصوبے پر اتفاق رائے پیدا کرنے کے لیے شراکت داروں کو اکٹھا کرنے کی برطانیہ کی کوششوں‘ سے آگاہ کیا ہے۔

    بیان میں کہا گیا ہے: ’انھوں نے اس بات پر اتفاق کیا ہے کہ اب جبکہ جنگ بندی نافذ ہو چکی ہے اور آبنائے کو کھولنے پر اتفاق رائے موجود ہے، ہم کسی حل تک پہنچنے کے اگلے مرحلے میں داخل ہو چکے ہیں۔‘

    بیان میں مزید کہا گیا ہے کہ سٹامر اور ٹرمپ نے ’جہاز رانی کو جلد از جلد دوبارہ بحال کرنے کے لیے ایک عملی منصوبے کی ضرورت پر گفتگو کی ہے‘

20. 10 اپريل 2026ایرانی کی مذاکراتی ٹیم اسلام آباد نہیں پہنچی، لبنان پر اسرائیلی حملے رُکنے تک مذاکرات معطل ہیں: خبر ایجنسی

    ایران میں پاسدارانِ انقلاب سے منسلک نیوز ایجنسی تسنیم نے ایرانی وفد کے اسلام آباد پہنچنے سے متعلق خبروں کی تردید کی ہے۔

    تسنیم نیوز ایجنسی نے ایک ’باخبر ذرائع‘ کا حوالہ دیتے ہوئے رپورٹ کیا کہ: ’ایرانی مذاکراتی ٹیم کے امریکہ سے مذاکرات کے لیے اسلام آباد، پاکستان پہنچنے سے متعلق کچھ میڈیا اداروں کی خبریں مکمل جھوٹی ہیں۔‘

    خبر رساں ادارے کے مطابق ذرائع نے اسے بتایا کہ جب تک امریکہ لبنان پر اسرائیلی حملے رکوانے کا اپنا وعدہ پورا نہیں کرتا، تب تک مذاکرات معطل رہیں گے۔