’بہادری اور شجاعت‘ کا تمغہ مگر جنگی جرائم کا بھی الزام: افغان جنگ میں شریک آسٹریلوی فوجی کی کہانی
،تصویر کا ذریعہSam Mooy/The Sydney Morning Herald via Getty Images
- مصنف, ٹَیبی ولسن
- عہدہ, سڈنی
- مطالعے کا وقت: 4 منٹ
آسٹریلیا کے سب سے زیادہ اعزاز یافتہ فوجی بین رابرٹس سمتھ نے گذشتہ ہفتے ان پر عائد کیے گئے قتل کے پانچ الزامات کے بعد اپنے پہلے بیان میں تمام الزامات کی عوامی سطح پر تردید کی ہے۔
وکٹوریہ کراس حاصل کرنے والے رابرٹس سمتھ، جنھیں جمعے کے روز ضمانت پر رہا کیا گیا، نے کہا کہ انھیں افغانستان میں اپنی فوجی خدمات پر فخر ہے اور وہ اس مقدمے کو اپنے خلاف ان الزامات کو غلط ثابت کرنے کا موقع قرار دے رہے ہیں۔
ان کا کہنا تھا ’میں جانتا ہوں کہ یہ سفر مشکل ہو گا، لیکن میں سب کو یقین دلاتا ہوں کہ میں نے اپنی زندگی میں کبھی لڑائی سے پیچھے ہٹنا نہیں سیکھا۔‘
47 سالہ رابرٹس سمتھ پر الزام ہے کہ انھوں نے 2009 سے 2012 کے درمیان افغانستان میں غیر مسلح افغان قیدیوں کی ہلاکت میں کردار ادا کیا، یا تو خود انھیں ہلاک کیا یا اپنے ماتحتوں کو ایسا کرنے کا حکم دیا۔
آسٹریلیا کی سپیشل ایئر سروس (ایس اے ایس) رجمنٹ کے سابق کارپورل بین رابرٹس سمتھ نے میڈیا سے بات کرتے ہوئے کہا کہ ’اگرچہ میں یہ ترجیح دیتا کہ یہ الزامات عائد نہ کیے جاتے، لیکن میں اس موقعے کو اپنی بے گناہی ثابت کرنے کے لیے استعمال کروں گا۔‘
انھوں نے مزید کہا کہ ’مجھے افغانستان میں اپنی خدمات پر فخر ہے۔ وہاں قیام کے دوران میں نے ہمیشہ اپنی اقدار، اپنی تربیت اور قواعدِ کاروائی کے دائرے میں رہتے ہوئے کام کیا۔‘
رابرٹس سمتھ نے اپنی گرفتاری کو ’سنسنی خیز‘ اور ’غیر ضروری تماشہ‘ قرار دیا اور صحافیوں کے سوالات لینے سے انکار کر دیا۔
بین رابرٹس سمتھ کو 7 اپریل کو سڈنی ایئرپورٹ پر گرفتار کیا گیا تھا، جبکہ انھیں جمعے کے روز ضمانت پر جیل سے رہائی ملی۔
End of سب سے زیادہ پڑھی جانے والی
بی بی سی اردو کی خبروں اور فیچرز کو اپنے فون پر حاصل کریں اور سب سے پہلے جانیں پاکستان اور دنیا بھر سے ان کہانیوں کے بارے میں جو آپ کے لیے معنی رکھتی ہیں
سبسکرائب کرنے کے لیے کلک کریں
مواد پر جائیں
مقدمے کی سماعت کرنے والے جج نے ریمارکس دیے کہ یہ کیس ’غیر معمولی‘ نوعیت کا ہے اور اگر ضمانت نہ دی جاتی تو ملزم کو مقدمہ شروع ہونے سے پہلے ’ممکنہ طور پر کئی برس‘ حراست میں گزارنا پڑ سکتے تھے۔
رابرٹس سمتھ کے خلاف فوجداری مقدمہ 2023 میں ہونے والے ایک سول ہتکِ عزت کے مقدمے کے بعد سامنے آیا ہے، جس میں جج نے ’امکانات کے توازن‘ کی بنیاد پر قرار دیا تھا کہ قتل کے بعض الزامات میں ’بادی النظر میں سچائی‘ پائی جاتی ہے۔
یہ مقدمہ بین رابرٹس سمتھ نے نائن اخبارات کے خلاف دائر کیا تھا، جنھوں نے 2018 میں پہلی بار مبینہ بدسلوکی کے الزامات شائع کیے تھے۔ یہ ہائی پروفائل سماعت آسٹریلیا کی عدالتی تاریخ میں پہلی مرتبہ تھی جب آسٹریلوی فوج پر مبینہ جنگی جرائم کے الزامات کا عدالتی جائزہ لیا گیا۔
سابق فوجی افسر کا مؤقف تھا کہ مبینہ ہلاکتیں یا تو دورانِ جنگ ہوئیں یا پھر سرے سے ہوئیں ہی نہیں۔ تاہم گذشتہ برس وفاقی عدالت نے بھی ان کی طرف سے دائر کردہ اپیل مسترد کر دی تھی۔
اب رابرٹس سمتھ کو جنگی جرم کے تحت قتل، مشترکہ طور پر قتل کروانے اور قتل میں مدد، سہولت، مشورہ دینے یا اس کا بندوبست کرنے کے تین الزامات کا سامنا ہے۔
