நேரலை, இரானுடன் ஒப்பந்தம் செய்வது பற்றி டிரம்ப் கூறியது என்ன?

நேரடி செய்தி/ ஒலி/ஒளிபரப்பு

1. 30 மார்ச் 2026ரூ.520 கோடி சொத்து மதிப்பு - வேட்புமனுவில் விஜய் குறிப்பிட்டது என்ன?

   தமிழ்நாடு சட்டமன்ற தேர்தலுக்கான வாக்குப்பதிவு ஏப்ரல் 23ம் தேதி நடைபெறுகிறது. முன்னதாக வேட்புமனு தாக்கல் இன்று தொடங்கியுள்ள நிலையில் தமிழக வெற்றி கழகத்தின் தலைவர் விஜய் பெரம்பூர் தொகுதியில் போட்டியிடுவதற்காக தன்னுடைய வேட்புமனுவை இன்று தாக்கல் செய்தார்.

   அந்த வேட்புமனுவில் தன்னுடைய பெயரில் 404 கோடி ரூபாய் மதிப்பிலான அசையும் சொத்துக்கள் இருப்பதை அவர் குறிப்பிட்டுள்ளார். தன்னுடைய மனைவி பெயரில் 15.5 கோடி ரூபாய் சொத்துக்கள் இருப்பதையும் அவர் குறிப்பிட்டுள்ளார்.

   தன்னுடைய பெயரில் 4 சொகுசு கார்கள் உட்பட 5 கார், ஒரு டிவிஎஸ் XL சூப்பர் இருசக்கர வாகனம் இருப்பதை அவர் குறிப்பிட்டுள்ளார்.

   மேலும் தன்னுடைய பெயரில் 1 கோடியே 20 லட்சம் ரூபாய் மதிப்பிலான 883 கிராம் தங்கம் மற்றும் 15 லட்சம் மதிப்பிலான வெள்ளிப்பொருட்களும், தன்னுடைய மனைவி பெயரில் 4 கோடி ரூபாய் மதிப்பிலான 3132 கிராம் தங்கம், 25 ஆயிரம் ரூபாய் மதிப்பிலான வெள்ளிப்பொருட்கள் மற்றும் ஒரு கோடி ரூபாய் மதிப்பிலான 135 கேரட் வைரம் இருப்பதையும் அவர் குறிப்பிட்டுள்ளார்.

   அதேபோல தன்னுடைய பெயரில் சுமார் 115 கோடி ரூபாய் மதிப்பிலான அசையா சொத்துக்கள் இருப்பதையும் அதன் தற்போதைய சந்தை மதிப்பு 220 கோடி என்பதையும் வேட்புமனுவில் விஜய் குறிப்பிட்டுள்ளார்.

   மேலும் தன்னிடம் கடன் பெற்றவர்களின் பட்டியலில் மனைவி சங்கீதா விஜய் 12.60 கோடி ரூபாய் கடனும், தந்தை சந்திரசேகர் 3 கோடி ரூபாய், தாய் சோபா 87 லட்சம், மகன் ஜேசன் விஜய் 8 லட்சம், தவெக பொதுச்செயலாளர் என் ஆனந்த் 3 கோடி ரூபாய் கடன் வாங்கியிருப்பதாகவும் விஜய் குறிப்பிட்டுள்ளார்.

   மேலும் லயோலா கல்லூரியில் பட்டப்படிப்பு இடைநிற்றலையும் தன்னுடைய வேட்புமனுவில் அவர் குறிப்பிட்டுள்ளார்.

2. 30 மார்ச் 2026விஜயின் வில்லிவாக்கம் பிரசாரம் ரத்து

   "பொதுமக்கள் பாதுகாப்பு கருதி" வில்லிவாக்கம் தொகுதியில் த.வெ.க. தலைவர் விஜயின் பிரசாரம் ரத்து செய்யப்படுவதாக அறிவிக்கப்பட்டுள்ளது.

   இது தொடர்பாக அக்கட்சியின் பொதுச்செயலாளர் என். ஆனந்த் வெளியிட்டுள்ள அறிக்கை ஒன்றில்,"வில்லிவாக்கம் தொகுதி தெருமுனைப் பிரசார கூட்டங்கள் நடைபெறும் இடங்களில் மட்டுமல்லாமல், அங்கே செல்வதற்கான வழிகளிலும் சென்னைப் பெருநகர காவல்துறை செயல்படுத்தவில்லை" என கூறப்பட்டுள்ளது.

   இதன் காரணமாக "வில்லிவாக்கம் தொகுதி தெருமுனைப் பிரசாரக் கூட்டத்தை ரத்து செய்யவேண்டிய சூழல் ஏற்பட்டுள்ளது" எனவும் அந்த அறிக்கை கூறுகிறது.

   மேலும் த.வெ.க.வின் அதிகாரப்பூர்வ எக்ஸ்தள பக்கத்தில் வெளியிடப்பட்டுள்ள பதிவில்,"பிரசாரத்திற்கு முறையாக அனுமதி பெற்றும் ஒரு பிரசார இடத்தில் இருந்து இன்னொரு பிரசார இடத்திற்கு செல்லும் வழியில், காவல்துறை பாதுகாப்பு மற்றும் போக்குவரத்து முறைபடுத்துதல் கொஞ்சம்கூட இல்லை" என கூறப்பட்டுள்ளது.

   "சென்னை மாநகர காவல்துறையின் இத்தகைய, ஒருதலைபட்சமான நடவடிக்கைகளின் மீது தேர்தல் ஆணையம் உடனடியாக தலையிட்டு பாதுகாப்பு மற்றும் போக்குவரத்து முறைபடுத்துதலை உடனடியாக மேற்கொள்ள அறிவுறுத்த வேண்டும்" எனவும் வலியுறுத்தப்பட்டுள்ளது.

3. 30 மார்ச் 2026மு.க. ஸ்டாலின், விஜய் வேட்பு மனு தாக்கல்

   திமுக தலைவரும் முதலமைச்சருமான மு.க. ஸ்டாலின், தமிழக வெற்றிக் கழக தலைவர் விஜய் ஆகியோர் இன்று வேட்பு மனு தாக்கல் செய்தனர்.

   தமிழ்நாட்டில் 2026 சட்டப்பேரவை தேர்தலுக்கான வேட்புமனு தாக்கல் இன்று (மார்ச் 30) தொடங்கியது. முதல்நாளான இன்று திமுக தலைவர் மு.க.ஸ்டாலின் தான் போட்டியிடும் கொளத்தூர் தொகுதியில் தேர்தல் நடத்தும் அலுவலரிடம் வேட்புமனுவை தாக்கல் செய்தார்.

   கொளத்தூர் தொகுதியில் அதிமுக சார்பில் சந்தான கிருஷ்ணன், தவெக சார்பில் வி.எஸ். பாபு ஆகியோர் போட்டியிடுகின்றனர்.

   தொகுதி மறுசீரமைப்பின்படி கொளத்தூர் தொகுதி உருவாக்கப்பட்டதிலிருந்து 2011, 2016, 2021 என மூன்று சட்டப்பேரவை தேர்தல்களிலும் இத்தொகுதியில் இருந்து வெற்றி பெற்றிருந்தார் மு.க.ஸ்டாலின்.

   தமிழக வெற்றிக் கழக தலைவர் விஜய் தான் போட்டியிடும் பெரம்பூர் தொகுதியில் வேட்பு மனுவை தாக்கல் செய்தார். பெரம்பூர் தொகுதியில் திமுக சார்பில் ஆர்.டி.சேகர், அதிமுக கூட்டணியில் பாமக சார்பாக திலகவதியும் போட்டியிடுகின்றனர்.

   வேட்பு மனு தாக்கலின் முதல் நாளான இன்று பல்வேறு அரசியல் கட்சிகளை சேர்ந்தவர்கள் வேட்பு மனுக்களை தாக்கல் செய்துவருகின்றனர். திமுக சார்பில் சைதாப்பேட்டை தொகுதியில் போட்டியிடும் அமைச்சர் மா. சுப்பிரமணியன், வில்லிவாக்கம் தொகுதியில் தவெக சார்பில் போட்டியிடும் ஆதவ் அர்ஜுனா உள்ளிட்டோரும் வேட்பு மனுக்களை தாக்கல் செய்தனர்.

   • வேட்புமனுத் தாக்கல் செய்ய கடைசி நாள் : 06-04-2026
   • வேட்புமனு பரிசீலனை : 07-04-2026
   • வேட்புமனுக்களை திரும்பப் பெறுவதற்கான கடைசி நாள் : 09-04-2026
   • வாக்குப் பதிவு நாள் : 23-04-2026
   • வாக்கு எண்ணிக்கை : 04-05-2026

4. 30 மார்ச் 2026இரானுடன் ஒப்பந்தம் செய்வது பற்றி டிரம்ப் கூறியது என்ன?

   அமெரிக்காவுக்கும் இரானுக்கும் இடையே ஒரு ஒப்பந்தம் ஏற்படும் என்று அமெரிக்க அதிபர் டொனால்ட் டிரம்ப் கூறியுள்ளார். இருப்பினும், பின்னர் அவர் "அப்படி ஒரு ஒப்பந்தம் ஏற்படாமலும் போகலாம்" என்றும் தெரிவித்தார்.

   அமெரிக்க அதிபருக்கான ஏர்ஃபோர்ஸ் ஒன் விமானத்தில் செய்தியாளர்களிடம் பேசிய டொனால்ட் டிரம்ப், "நீங்கள் கவனித்துப் பார்த்தால், அங்குள்ள (இரானில்) ஆட்சியாளர்கள் ஏற்கெனவே மாறிவிட்டனர். ஏனெனில், முதலில் இருந்து ஆட்சியாளர்கள் முற்றிலும் மறைந்துவிட்டனர், அழிக்கப்பட்டுவிட்டனர், அதில் தொடர்புடைய அனைவரும் இறந்துவிட்டனர்," என்று கூறினார்.

   "இரண்டாவது ஆட்சியில் இருந்தவர்களில் பெரும்பாலானோர் இறந்துவிட்டனர். தற்போது அமைந்துள்ள மூன்றாவது அரசில் நாம் முற்றிலும் மாறுபட்ட நபர்களுடன் தொடர்புகொண்டு வருகிறோம். இது முற்றிலும் மாறுபட்ட ஒரு குழுவாகும்; எனவே, இதை நான் ஒரு அதிகார மாற்றம் என்றே கருதுகிறேன்."

   "அங்கு ஒரு அதிகார மாற்றம் (change of guard) நிகழ்ந்திருப்பதாக நான் கருதுகிறேன்; இதைவிடச் சிறந்ததாக வேறு எதையும் செய்துவிட முடியாது," என்று டிரம்ப் கூறினார்.

   இரானுடனான ஒப்பந்தம் குறித்துப் பேசிய டிரம்ப், "நாம் அவர்களுடன் ஒரு ஒப்பந்தத்தை எட்டுவோம் என்று நான் கருதுகிறேன்—அது ஏறக்குறைய உறுதியானது என்றே சொல்லலாம்; ஆனால், ஒருவேளை அது நிகழாமலும் போகலாம்," என்றார்.

   மேலும் அவர், "இரானைப் பொறுத்தவரை, எதையும் உறுதியாகச் சொல்லிவிட முடியாது; ஏனெனில், நாம் அவர்களுடன் பேச்சுவார்த்தை நடத்துகிறோம்; ஆனால், சில சமயங்களில் நாம் அவர்கள் மீது தாக்குதல் நடத்தி அவர்களைத் தகர்க்க வேண்டிய சூழலும் ஏற்படுகிறது," என்று கூறினார்.

   இரானுடனான பேச்சுவார்த்தைகளை முன்னெடுப்பதில், இரானும் அமெரிக்காவும் தங்கள் மீது நம்பிக்கை தெரிவித்துள்ளதாகப் பாகிஸ்தான் கூறியிருப்பது இங்கு குறிப்பிடத்தக்கது. இருப்பினும், இந்த அமைதிப் பேச்சுவார்த்தைகளில் தாங்கள் பங்கேற்கப்போவதை இரானோ அல்லது அமெரிக்காவோ இதுவரை அதிகாரப்பூர்வமாக உறுதிப்படுத்தியுள்ளனவா என்பது குறித்துத் தெளிவுபடுத்தப்படவில்லை.

5. 30 மார்ச் 2026பிகார் சட்ட மேலவை உறுப்பினர் பதவியை ராஜினாமா செய்த நிதிஷ் குமார்

   பிகார் முதலமைச்சர் நிதீஷ் குமார் அம்மாநில சட்ட மேலவை உறுப்பினர் பதவியிலிருந்து விலகியுள்ளார்.

   சட்ட மேலவைத் தலைவர் அவதேஷ் நாராயண் சிங் இதுகுறித்துத் தெரிவிக்கையில், "நிதிஷ் குமார் தனது பதவியை ராஜினாமா செய்துள்ளார். இனி அடுத்தகட்ட நடைமுறைகள் மேற்கொள்ளப்படும்," என்று கூறினார்.

   நிதிஷ் குமாரின் ராஜினாமா கடிதத்துடன், சட்ட மேலவை உறுப்பினர் (MLC) சஞ்சய் காந்தி சட்ட மேலவைக்கு வருகை தந்தார்.

   நிதிஷ் குமார் சமீபத்தில் மாநிலங்களவைக்குத் தேர்ந்தெடுக்கப்பட்டார். அரசியலமைப்பு விதிகளின்படி, அவர் மார்ச் 30-க்குள் சட்ட மேலவை உறுப்பினர் பதவியிலிருந்து விலக வேண்டியது அவசியமாக இருந்தது.

   நிதிஷ் குமார் முதலமைச்சர் பதவியிலிருந்து விலகவில்லை; தற்போதைக்கு அவர் முதலமைச்சராகவே தொடர்கிறார்.

   நிதிஷ் குமார் 2006-ஆம் ஆண்டு முதல் பிகார் சட்ட மேலவையின் உறுப்பினராக நீடித்தார்.

   2024-ஆம் ஆண்டில், நிதிஷ் குமார் தொடர்ந்து நான்காவது முறையாக சட்ட மேலவை உறுப்பினரானார்; அவரது பதவிக்காலம் 2030-ஆம் ஆண்டில் நிறைவடைய இருந்தது.

   ஆனால் அதற்கு இடைப்பட்ட காலத்தில், 2026-ஆம் ஆண்டு மார்ச் 16-ஆம் தேதி அவர் மாநிலங்களவைக்குத் தேர்ந்தெடுக்கப்பட்டார்.

6. 30 மார்ச் 2026வணக்கம் நேயர்களே!

   இன்று (30-03-2026) மதியம் வரையிலும் நேரலை பக்கத்தில் சமீபத்திய நிகழ்வுகள் குறித்த விவரங்களை சுருக்கமாக தொகுத்து அளிப்பது நந்தினி வெள்ளைச்சாமி.