Warar hor leh oo ka soo kordhay hawlgalka ciidammada ICE ee Minnesota

Tebin toos ah

1. 27 Jannaayo 2026Trump oo war fiican u sheegay guddoomiyaha haysta taageerada Soomaali badan

   

   Xigashada Sawirka, The Minnesota Star Tribune via Getty Images

   Madaxweynaha Maraykanka ayaa ayaa sheegay in wadahadal midho dhalay uu la qaatay Jacon Frey oo ah guddoomiye codad badan ka helay Soomaalida gobolka.

   Frey, oo Dimuqraadi ah, ayaa dhaleeceeyay kororka howlgallada fulinta sharciyada socdaalka ee magaaladaasi.

   Qoraal uu ku qoray Truth Social, Trump wuxuu yiri “horumar badan ayaa la sameynayaa” waxa kale oo jirta in Homan uu la kulmi doono Frey Talaadada.

2. 27 Jannaayo 2026War degdeg ah: Maxaa ka jira in ciidammadii la geeyay Minneapolis ay baxayaan?

   

   Xigashada Sawirka, Reuters

   Madaxa Ilaalada Xuduudaha, Dan Bovino, iyo qaar ka mid ah wakiilladiisa ayaa ka tagi doona Minneapolis kaddib markii Alex Pretti la toogtay Sabtidii, sida ay sheegtay CBS News oo wada shaqayn la leh BBC-du.

   Tani waxay ka dambeysay cadho xooggan ay ka dhalatay sida saraakiisha sare ee federaalka, oo ay ku jiraan Bovino iyo Xoghayaha Amniga Gudaha, Kristi Noem, ay uga jawaabeen toogashada.

3. 27 Jannaayo 2026Imaaraadka Carabta oo war cusub soo saaray

   

   Xigashada Sawirka, Google

   Isu tagga Imaaraatka Carabta ayaa sheegay in aanu ogolaan doonin in hawadiisa, dhulkiisa ama biyihiisa loo isticmaalo ficillo milateri oo ka dhan ah Iiraan. Bayaanka oo adkeeyay go’aanka dhexdhexaadnimada ayaa lagu soo saaray xilliga markab dagaal oo Mareykan ahi uu gaaray Bariga Dhexe.

4. 26 Jannaayo 2026Toban talo oo ku socota dadka da'doodu u dhexeyso 30 ilaa 40 jir

   Qofka marka uu gaaro da'da 30, waxaa sii kordhaya culeyska iyo mas'uuliyadda saaran qofka, tusaale ahaan waxaa sare u kacaya tartamada loogu jiro ganacsiga, shaqooyinka iyo soo dhacsashada nolol maalmeedka, qofka waa in uu diiradda saaraa noloshiisa iyo tan qoyska, inta badan waxaa dhacdaa in dadka qaar aysan muhiimad gaar ah siin caafimaadkooda.

   Khuburrada waxay sheegayaan in dadka da'dooda u dhexeyso 30 ilaa 40 waa inay daryeelaan jirkooda isla markaana ay ka fakaraan caafimaadkooda.

   Waxaa muhiim ah in la raaco talooyinkan si looga dhabbeeyo oraahda ah "Ka hortagga wuxuu wanaagsan yahay daweynta", qofka marka uu fiiro gaar ah u yeesho jirkiisa wuxuu iska ilaalin karaa cudurrada ka dhasha gabowga iyo qaab nololeedka khaldan.Halkan ka akhriso

5. 26 Jannaayo 2026Aqalka Cad oo ka hadlay xaaladda Minnesota

   Aqalka Cad ayaa sheegtay in maamulku uu baadhayo dilka Alex Pretti.

   Leavitt ayaa ku eedaysay mas’uuliyiinta heer gobol iyo heer degmo ee Minnesota in ay masuul ka yihiin fowdada iyo rabshadaha ka dhashay kadib markii saraakiil federaal ah si ballaaran loogu soo diray gobolka, taas oo keentay mudaharaadyo iyo in ugu yaraan laba Mareykan ah ay ku baxaan gacanta saraakiisha.

   Waxaanay diidday in ay ku celiso hadalladii hore ee mas’uuliyiinta maamulka ee ku tilmaamay Pretti “qof samaynayay isku day dil" iyo in uu ahaa “argagixiso gudaha ah”, iyadoo sheegtay in madaxweynuhu doonayo in baardhtaanku si caadi ah u socdo.

6. 26 Jannaayo 2026Donald Trump iyo Tim Walz oo wadahadal ka yeeshay xiisadda Minnesota

   

   Donald Trump iyo Tim Walz ayaa yeeshay wicitaan “wax ku ool ah”, sida uu sheegay guddoomiyaha Minnesota, isagoo sheegay in uu madaxweynaha ku cadaadiyey baahida loo qabo baadhitaan dhex-dhexaad ah oo lagu sameeyo toogashooyinkii dhawaan ay sameeyeen saraakiisha federaalka ee gobolka.

   Pretti, oo ahaa muwaadin Mareykan ah oo 37 jir ah, ayaa la toogtay oo la dilay Sabtidii intii lagu jiray bannaanbaxyo ka dhacayay Minneapolis.

   Saacadihii la soo dhaafay, madaxweynuhu wuxuu beddelay fariintiisa, isagoo isku dayaya in uu la falgalo dareenka dadweynaha isaga oo si degdeg ah u debcinaya siyaasadaha socdaalka, ayuu qoray wariyaha Waqooyiga Ameerika Anthony Zurcher.

7. 26 Jannaayo 20267 qof ayaa ku dhimatay diyaarad ku burburtay gobolka Maine ee Mareykanka

   

   Xigashada Sawirka, APTN / WABI

   Toddobo qof ayaa ku dhintay hal qofna si daran ayuu u dhaawamcay kaddib markii diyaarad yar oo gaar ah ay dhacday xilli ay ka duuleysay garoonka Bangor gobolka Maine ee dalka Mareykanka.

   Shilka ayaa dhacay iyadoo duufaan baraf ah ay ka socoto qeybo badan oo Mareykanka ah taas oo ay ku dhinteen dhowr qof, waxayna korontada ka go’day boqollaal kun.

   Duuliyaha ayaa la sheegay in uu arki waayay garoonka ka hor inta aysan diyaarada dhicin.

   Warbixin kooban oo soo baxday maanta oo Isniin ah ayey hay’ada duulista feearkalka ku sheegtay in diyaarad siday sideed qof ay “ku burburtay duruufo aan la ogeyn markii ay kaceysay”.

   Garoonka Bangor ayaa sheegay in dhacdadan kaddib la xiray iyadoo kooxaha gurmadka degdegga ay howshoodu wataan.

   Barafka ayaa saameeyay garoomada diyaaradaha Philadelphia, Washington DC, Baltimore, North Carolina, New York iyo New Jersey.

8. 26 Jannaayo 2026Xuutiyiinta ayaa ku hanajabay in ay weerarayaan maraakiibta Badda Cas

   

   Xigashada Sawirka, EPA-EEE/REX/Shutterstock

   Xuutiyiinta Yemen ayaa ku hanjabay in ay weerarayaan maraakiibta mareya badda taas oo ah isku day ay ku taageerayaan Iran kadidb markii madaxweyne Donald Trump uu ku hanjabay in uu tallaabo militeri ka qaadayo Iran oo la xiriirta dibadbaxyada dalka ka socda.

   Fidiyow ay soo bandhigeen Xuutiyiinta ayaa waxaa ku jiray sawirada Markab gubanaya oo ay ku qoran tahay “taas ayaa dhaceysa”.

   Xutiyiinta ma bixin faahfaahin intaas dheer balse hore ayey u weerareen maraakiib boqol ka badan oo marayay Badda Cas taas oo ay ku doonayeen in ay Isreal ku saaraan cadaadis.

   Kooxda ayaa joojisay weerarada kaddib markii heshiis nabadeed laga gaaray Gaza, waxayna ka digeen in ay diyaar u yihiin in ay dib u bilaabaan weeraradooda hadii loo baahdo. Kooxda waxay sidoo kale ku rideen boqolaal gantaal Israel labadii sano ee la soo dhaafay

   Hanjabaadda Xuutiyiinta ayaa ku soo aaday kaddib markii markabka USS Abraham Lincoln ee qaada diyaaradaha dagaalka lagu arkay isagoo ku socda dhinaca Bariga Dhexe.

9. 26 Jannaayo 2026Madaxweyne Trump ayaa wakiil gaar ah u dirsaday Minnesota

   

   Xigashada Sawirka, EPA/Shutterstock

   Madaxweynaha Mareykanka Donald Trump ayaa Minnesota u diraya Tom Homan oo ah wakiil isaga gaar u ah kaddib markii ciidamada federalka ay toogteen Alex Pretti.

   Homan waa “qof adag balse caadi ah, si toos ah ayuuna iigu soo warinayaa” ayuu ku qortay Trump bartiisa bulsho.

   “Goobtaas kuma uusan lug laheyn balse wuu yaqaan, dad badan oo halkaas joogana way jecel yihiin”.

   Homan waa 64 jir, shaqadana ka soo bilaabay booliska ka hor inta uusan ku biirin ciidamada ilaalada xuduudaha.

   Madaxweynihii hore Mareykanka Barack Obama ayaa sanadkii 2013-kii u magacaabay madaxda laanta masaafurinta ee hay’adda socdaalka.

   Sidoo kale madaxweyne Trump ayaa u magacaabay ku-simaha hay’ada socdaalka iyo kastamka.

   Dhawaan markii lagu dilay Ranee Good Minneapolis, Homan wuxuu CBS u sheegay in uusan dooneyn in uu ka hordhaco xaqiiqooyinka balse wuxuu ammaanay ciidamada ICE, wuxuuna sheegay sida qof kasta oo Mareykanka, waxay saraakiisheeana xaq u leeyihiin in ay is difaacaan.

10. 26 Jannaayo 2026Ruushka ayaa ka digay hadii Iran la weerao in Bariga Dhexe uu galayo xasillooni-darro

    

    Xigashada Sawirka, Alexander KAZAKOV/POOL/AFP via Getty Images

    Ruushka ayaa ka digay hadii Iran la weeraro in ay “xasillooni-darro ka abuureyso Bariga dhexe”, wuxuuna ku baaqay in dhammaan dhinacyada ay is-xakameeyaan.

    “Shaki kuma jiro in tallaabadan ay noqoneyso mid kale oo loo qaaday dhinaca khalkhal gelinta xaalada gobolka”, ayuu yiri Dmitry Peskov oo ah afhayeenka Kremlin-ka.

    Wakaaladda wararka Ruushka TASS oo soo xiganeysa Mr. Peskov ayaa sheegtay in “Ruushka uu sii wadayo dadaaladiisa uu hoos ugu dhigayo xiisadaha”.

    Wasiirka arrimaha dibadda, Sergei Lavrov, ayaa xaqiijiyay tododbaadkii la soo dhaafay in uu dhexdhexaadiyay fariimo ay is weydaarsadeen Iran iyo Israel sanadkii hore.

11. 26 Jannaayo 2026Markabka dagaalka Mareykanka ee Abraham Lincoln ayaa gaaray Bariga Dhexe.

    

    Xigashada Sawirka, US Navy via Reuters

    Sarkaal Maraykan ah ayaa u xaqiijiyay telefishinka CBS in Markabka diyaaradaha dagaalka xambaaro ee Abraham Lincoln uu gaaray aagga Taliska Dhexe ee Mareykanka ee Bariga Dhexe.

    Sida warbixinta lagu sheegay, markabka weli si buuxda “meeshii loogu talagalay” uma istaagin, taas oo micnaheedu yahay in uusan weli gaarin goobtii ugu dambaysay ee loo qorsheeyay.

    Qiyaastii laba toddobaad ka hor, kaddib markii ay cirka isku sii shareertay xiisadaha u dhexeeya Iran iyo Mareykanka taas oo ka dhalatay mudaharaadyadao Iran ayaa keentay in Markabka uu ka dhaqaaqo gobolka baasifiga ee uu aado Bariga Bariga Dhexe.

    Madaxweynaha Mareykanka Donald Trump ayaa horay u sheegay in Markab weyn uu ku sii jeedo dhanka dalka Iran, balse uu rajaynayo in aan loo baahneyn in la adeegsado.

12. 26 Jannaayo 2026Wiilka Museveni, ahna taliyaha ciidanka Uganda oo su'aal galiyey joogitaanka ciidankooda ee Soomaaliya

    

    Xigashada Sawirka, UPDF

    Wiilka u dhalay Madaxweynaha Uganda, ahna taliyaha ciidanka difaaca ee Uganda Muhoozi Kainerugaba ayaa su'aal galiyey joogitaanka ciidankiisa ee Soomaliya.

    Bartiisa X ayuu ku soo qoray goor dhoweyd in ay damacsan yihiin inay ciidankooda la baxaan.

    "19 sano oo aan joognay Soomaaliya ka dib, waxaan damacsannahay in gabi ahaanba aan dalkaas ka baxno mar dhow” ayuu yiri, isagoon sheegin sababta.

    Ma aha markii ugu horreysay ee Muhoozi u ka hadlo ka bixitaanka ciidankooda ee Soomaaliya.

    Wuxuu sannadkii hore sidoo kale barta X ku sheegay inay ka bixi doonaan Soomaaliya.

    Uganda waxaa soomaaliya ka jooga ciidanka ugu badan ee nabad ilaalinta Midowga Afrika, waxaana go’aanka ugu dambeeya inta badan qaata madaxweynaha Uganda Yoweri Museveni.

13. 26 Jannaayo 2026Trump ayaa loogu baaqay in baaris buuxda lagu sameeyo toogashada Alex Pretti

    

    Xigashada Sawirka, Getty Images

    Madaxweyne Donald Trump ayaa laga dalbaday in baaris buuxda lagu sameeyo toogashadii Alex Pretti kaas oo ay toogteen ciidamada federalka ee loo yaqaan ICE.

    Geerida Preetti ayaa ku soo aaday wax ka yar saddex toddobaad kaddib markii Renee Good ay ku dileen ciidamada waaxda socaalka Minneapolis.

    Guddoomiyaha Minnesota, Tim Walz, ayaa ku celiyay dalabkiisa maamulka Trump in ay ka saaraan ciidamada faderalka gobolka isagoo sheegay in Mareykanka uu joogo “halkii ugu dambeysay”.

    Wargeyska Wall Street Journal oo Axadii wareysi la yeeshay madaxweyne Trump ayuu ku sheegay in maamulkiisa uu “dib u eegis ku sameynayo waxkasta” iyo sidoo kale in ugu dambeyn uu ciidamada xuduudaha iyo kastamka ee ICE uu ka saarayo magaalada. Madaxweynaha ma bixin waqti cayiman uu arrintan sameynayo.

    Madaxda fedealka iyo gobolka ayaa siyaabo kala duwan uga hadlay daqiiqadihii ugu horeeyay geerida Pretti.

    Maamulka Trump ayaa difaacay sarkaalka toogtay Pretti iyadoo xoghayaha ammaanka, Kristi Noem, ay sheegtay in Pretti loo toogtay maadama uu “haystay” bistoolad.

    Madaxda gobolka ayaa beeniyay arrintan iyagoo sheegay in bistoolada ay aheyd sharci, waxaana Pretti la toogtay markii laga qaaday bistooladda.

    Dibadbaxayaal ayaa u soo baxay wadooyinka Minneapolis iyo qeybho kale oo kale oo Mareykanka ah kaddib toogashadii dhimashada keentay.

14. 26 Jannaayo 2026Iran ayaa sheegtay in gardarro kasta ay ka bixinayaan jawaab laga qoomameeyo

    

    Xigashada Sawirka, Fatemeh Bahrami/Anadolu via Getty Images

    Afhayeenka wasaaradda arrimaha dibadda Iran, Esmail Baghaei, ayaa kaga hadlay warsaxaafadeedkiisa toddobaadlaha ahaa joogista gobolka ay joogaan militeriga Mareykanka taas oo sii krodheysa.

    “Iran way ku kalsoon tahay awoodaheeda, waxayna xusuusan tahay khibaradeedii bishii June, waxayna bixin doontaa jawaab ka xoogan tii hore oo ay ka qoomameeyaan cid kasta oo ku soo gardarooto”

    Mr. Baqaei ayaa tusaale u soo qaatay dagalkii 12-ka maalmood socday ee dhexmaray Iran iyo Israel.

    Wuxuu kaloo sheegay in Iran ay wajaheysay bilihii u dambeeyay “khataro cusub” oo kaga imaanayay Mareykanka iyo Israel, wuxuu sheegay “in wadamada gobolka ay si wanaagsan ula socdaan in khatarta ammaanadarada gobolka aysan ku ekaaneyn Iran oo kaliya balse ay sii gudbeyso, taasina ay tahay sababta waxa keenay walaaca guud ee dalalka gobolka”.

    Wuxuu intaas ku daray, in marakiibta gobolka la keenayo aysan khalkhal gelinayn Iran iyo sida ay isku difaaceyso .

15. 26 Jannaayo 2026Taiwan ayaa isha ku haysa isbeddelka “aan caaidga aheyn” ee hoggaanka militeriga Shiinaha

    

    Xigashada Sawirka, Reuters

    Taiwan ayaa dusha kala socota wax ay ug yeertay isbeddealka “aan caadiga aheyn” ee hoggaanka militeriga Shiinaha kaddib markii janaraalkoodi ugu sareeyay baaris lagu bilaabay. Waxay kaloo sheegeen in ay sii wadayaan difaacooda maadama ay heerka qatarta weli sareyso, sidaasina waxaa sheegay wasiirka difaaca Taiwan.

    Shiinaha ayaa ku dhawaaqay Sabtigii in Zhang Youxia oo ah guddoomiye ku xigeenka guddiga dhexe ee ciidamada iyo sarkaal kale oo lagu magacaabo Liu Zhenli in la baarayo oo loo haysto xadgudubyo ka dhan ah anshaxa iyo qeynuunka.

    “Si dhow ayaan ula soconeynaa xaalada aan caadiga aheyn ee la xiriita madaxda sare ee xisbiga Shiinaha, dowladda iyo hoggaanka militeriga” ayuu yiri wasiirka difaaca oo intaas ku daray, “Mowqifka militeri waxa uu ku saleysan yahay in Shiinuhu uusan marnaba meesha ka saarin suurgalnimada in uu awood u sheegto Taiwan.

    Zhang waxaa muddo dheer loo arkayay in uu yahay sarkaal militeri oo aad ugu dhow Xi iyo in uu yahay saraakiisha dhifka ee leh khibrad sare ee dagaalka. Zan ayaa ka qeybqaatay dagaalka la xiriira muranka xadka ay la galeen Vietnam.

    Shiinaha oo u arka Taiwan qeyb ka mid ah dalkiisa ayaa si joogta ah ugu dira diyaarado dagaal iyo maraakiib hawada iyo badda u dhow jasiiradda. Taipei ayaa u aragta olole dowladeeda loogu cadaadinayo in ay aqabsho sheegashada Shiinaha.

16. 26 Jannaayo 2026Trump oo gacanta miis ku dhufsaday kadiba faahfaahiyay waxa dhacay

    

    Xigashada Sawirka, Getty Images

    Trump ayaa u saariyay nabar muuqda oo kaga yaalla gacantiisa bidix isticmaalka badan ee daawada aspirin. Nabarku wuxuu soo baxay kadib markii uu ku dhacay miis intii uu ku sugnaa Shirka Dhaqaalaha Adduunka ee ka dhacay magaalada Davos ee dalka Switzerland. Trump ayaa sidaas u sheegay wariyeyaasha isagoo saaran diyaarada Air Force One xilli uu dib ugu laabtay Maraykanka.

    Madaxweyne Donald Trump ayaa la il-daranaa xanuunkan ka xididdada kaga dhacay, kaasoo aad u daran, sida uu Aqalka Cad ku dhawaaqay sanadkii la soo dhaafay, ka dib maalmo warar la isla dhex marayay kuwaasoo la xiriiray sawirro muujinayay nabar ka muuqda gacanta madaxweynaha Maraykanka.

    Ka dib markii uu xilligaas la kulmay barar lugaha ah, Trump ayaa maray "baaritaan dhamaystiran" oo ay ku jiraan baaritaanka xididdada dhiigga, sida ay sheegtay xoghayaha warfaafinta ee Aqalka Cad Karoline Leavitt.

    Hoos ka akhriso sheekada oo dhameystiran:Trump oo ka qoomameynaya kaniini uu aad u isticmaalay kadib markii uu bogsan waayay

17. 26 Jannaayo 2026Wasiirka arrimaha dibadda Israa'iil oo ammaanay madaxweyne Ilham Aliyev

    

    Xigashada Sawirka, Facebook/Gideon Sa'ar

    Wasiirka arrimaha dibadda Israa’iil Gideon Sa'ar ayaa sheegay ku ammaanay Madaxweynaha Azerbaijan Ilham Aliyev hoggaamiye aragti fog leh, oo qarankiisa u horseedaya guulo cajiib ah.

    “Waxaan kulan xiiso leh ku yeelanay Baku, waxaana uga mahadceliyay Madaxweynaha saaxiibtinimadiisa iyo taageeradiisa bulshada Yuhuudda ah ee Azerbaijan” ayu uku yiri qoraal uu bartiisa Facebook soo dhigay.

    Wasiir Gideon Sa'ar ayaa intaasi raaciyay hadafkayaga wadajirka ah waa inaan xoojinno iskaashigayaga tamarta, difaaca, biyaha, beeraha, dalxiiska iyo waxyaabo kaloo badan,”

    Waxaa kale oo uu yiri: “Waxaan xoojinaynaa xiriirkeena istaraatiijiyadeed”.

18. 26 Jannaayo 2026Weerar rag hubeysan gaysteen oo dad lagu laayay

    

    Xigashada Sawirka, AD

    Rag hubeysan ayaa toogasho ku dilay 11 qof garoon kubadda cagta ah oo ku yaalla gobolka Guanajuato ee bartamaha Mexico. 12 qof oo kale ayaa ku dhaawacmay weerarka ka dhacay magaalada Salamanca Axaddii shalay. Howlgal baadi-goob ah ayaa la bilaabay si loo helo dambiilayaasha.

    Mas’uuliyiinta maxalliga ah weli ma sheegin waxa sababay dilalkan, balse Guanajuato marar badan waxaa ka dhaca rabshado, kuwaas oo ka dhasha kooxo dambiyeedyo is haya oo ku dagaallamaya dhul iyo saameyn.

    Gobolka Guanajuato ayaa laga diiwaan geliyay tirada ugu badan ee dilalka marka loo eego gobollada kale ee Mexico sanadkii 2025, iyadoo ay ka dhaceen in ka badan laba kun iyo shan boqol oo dil.

19. 26 Jannaayo 2026Afhayeenkii Netanyahu oo loo haysto sir uu bixiyay

    

    Xigashada Sawirka, Reuters

    Maxkamad ku taalla Israa’iil ayaa Axaddii sheegtay in la xiray afhayeenkii hore ee Ra’iisal Wasaare Benjamin Netanyahu, kaddib markii looga shakiyay inuu dukumiintiyo sir ah u dusiyay saxaafadda oggolaansho la’aan, taasoo dhaawac u geysan karta heshiiskii lagu sii daayay maxaabiistii lagu haystay Qasa.

    Maamulka warbaahinta Israa'iil ayaa sheegay in maxkamaddu ay ogolaatay in la shaaciyo 4 qof oo loo xiray kiiska sirta amaanka.

    Maxkamadda ayaa sheegtay in Eli Feldstein lala xiray saddex qof oo kale, oo ay ku jiraan xubno ka tirsan laamaha ammaanka.

    Kiiskan ayaa keenay in mucaaradka ay su’aal ka keenaan in Netanyahu uu ku lug lahaa wararka la faafiyay iyo in kale, iyadoo xafiiska Ra’iisul wasaaraha uu beeniyay warkaas.

    Netanyahu ayaa beeniyay inay wax khalad ah ay sameeyeen shaqaalaha xafiiskiisa, wuxuuna bayaan uu soo saaray sabtidii ku sheegay inuu ka war helay kaliya dukumentiyada la faafiyay ee warbaahinta lala wadaagay.

    Sii akhri:Maxaad ka taqaanaa ninka afhayeenka u ahaan jiray Netanyahu ee loo xiray sirta Israa'iil ee la dusiyay?

20. 26 Jannaayo 2026Madaxweyne ku-xigeenkii hore ee Kenya oo sheegay in isku day dil ka badbaaday

    

    Xigashada Sawirka, AFP/Getty Images

    Rigathi Gachagua oo oo ka tirsan mucaaradka Kenya ayaa ku andacoonaya in isku day dil ka badbaaday shalay oo ahayd Axad, xilli uu ku sugnaa Kaniisad.

    Gachagua, oo laga eryay xilka madaxweyne ku xigeenka maxkamadeyn xilka looga qaadayay sanadkii 2024, ayaa sheegtay in koox boolis ah ay weerareen kaniisadda Othaya ee gobolka Nyeri, iyagoo adeegsaday rasaas iyo gaaska ilmada keena.

    Isagoon bixin caddayn, wuxuu ku eedeeyay madaxweynaha ay horey isku kooxda u ahaayeen ee William Ruto inuu amray weerarka lagu qaaday. Ruto ma uusan ka hadlin laakiin wasiirka arrimaha gudaha Kipchumba Murkomen ayaa cambaareeyay rabshadaha, isagoo ku tilmaamay mid aan la aqbali karin.

    Booliisku waxay sheegeen in baaritaan la bilaabay, iyagoo intaa ku daray in aan la soo sheegin wax dhaawac ah.

    Warbixinno loo diray booliiska ayaa tilmaamaya in gaaska ilmada keena lagu tuuray gudaha Kaniisadda Anglican ee St Peters taasoo carqaladeysay howlihii Kiisadda ka socday.Booliisku waxay intaas ku dareen in dhowr baabuur ay ku waxyeeloobeen gudaha xarunta kaniisadda.

    Gachagua, oo ah ganacsade ka soo jeeda bartamaha Mount Kenya haddana ah dhaleeceeye aad uga soo horjeeda madaxweynaha Kenya , ayaa sheegay in kooxdiisa amniga ay u galbiyeen meel ammaan ah markii weerarka lagu soo qaaday sida u uku andacoonayo.