اسراییلو د ابراهیم رئیسي پر ټاکل کېدو ژوره اندېښنه وښوده

اسراییلو ویلي نړیواله ټوله باید د ایران د نوي ولسمشر ابراهیم رئیسي پر ټاکل کېدو په ژوره توګه اندېښمنه وسي.

د اسراییلو د بهرنیو چارو وزرات ویاند لېور حیات ویلي ښاغلی رئیسي تر ټولو سخت دریځه ولسمشر دی او خبرداری یې ورکړ چې د ایران نوی ولسمشر به اتومي فعالیتونه ډېر کړي.

ابراهیم رئیسي د تېرې شنبې په ورځ د ولسمشرۍ ټاکنو ګټونکی اعلان شو او راتلونکې اګست میاشت به د ولسمشرۍ لُوړه وکړي.

ښاغلی رئیسي یو مخکښ قاضي دی او ډېر محافظه کاره لېدلوری لري.

پر نوموړي د امریکا له خوا بندیزونه لګول شوي او ویل کېږي چې د سیاسي بندیانو په اعدامولو کې لاس لري.

په ټاکنو کې د ښاغلي رئیسي د بریالي کېدو له اعلان وروسته نوموړي په یوه اعلامیه کې ژمنه وکړه چې پر حکومت به د خلکو باور پیاوړی کړي او دی به د ټول ولس مشري کوي.

په اعلامیه کې د ښاغلي رئیسي له خولې راغلي ''زه یو جدي کاري، انقلابي او فساد ضد حکومت جوړ کړم ''.

خو د اسراییلو د بهرنیو چازو وزارت ویاند په یوه انتقادي ټویټ کې ویلي ''ابراهیم رئیسي یوه سخت دریځه څېره ده او په چټکۍ سره د ایران پوځي اتومي پروګرام پرمخ بېولو ته ژمن دی ''.

ایران او اسرییل له ډېرې مودې راهیسې دښمني پالي او له یو بل نه د غچ اخیستلو لپاره اقدامات کوي خو تر اوسه پورې یې ترمنځ جګړه نه ده شوې او په وروستیو کې د دواړو هېوادونو ترمنځ یو ځل بیا ترینګلتیا ډېره شوې ده.

حالت پېچلی دی خو د کړکېچ ډېره برخه د ایران د اتومي فعالیتونو له امله ده.

ایران تور پورې کوي چې اسراییلو یې تېرکال یو جګپوړی اټومي ساینسپوه وواژه او د تېر اپریل په میاشت کې یې د یورانیمو د بډایلو پر یوه مرکز برید وکړ.

په ورته وخت کې اسراییل وايي د ایران اټومي پروګرام د سوله ییزو موخو لپاره نه دی، بلکې ګومان کوي چې ایران د اټومي وسلې د جوړولو هڅې کوي.

اټومي تړون

په ۲۰۱۵ کال کې له ایران سره د اټومي پروګرام په اړه یې د لوېدیځو هېوادنو له خوا یو تړون وشو خو په ۲۰۱۸ کال کې د امریکا پخوانی ولسمشر ډونلډ ټرمپ له دې تړونه ووت او پر ایران یې یو ځل بیا اقتصادي بندیزونه ولګول.

د بندیزونو په غبرګون کې ایران خپل اټومي فعالیتونه ډېر کړل او اوس مهال د بل هر وخت پرتله تر لوړې کچې یورانیم غني کوي، خو تر هغې کچې نه دي چې اتومي وسله دې جوړه کړای شي.

د ولسمشر بایډن اداره اوس بیا هڅه کوي چې له دې تړون سره یوځای شي.

په همدې حال کې نن (یکشنبه د جون ۲۰مه) د هغو هېوادونو مشران چې له ایران سره د شوي تړون غړي دي په ویانا کې سره جرګه کېږي چې له ایران سره د چلن په اړه سلا مشورې وکړي.

د امریکا متحده ایالاتو ویلي د ولسمشر په توګه د سخت دریځه ملا ابراهیم رئیسي له ټاکل کېدو سره سره به خبرو ته دوام ورکړي.

ښاغلي رئیسي په تېر کې د شوي اتومي تړون ملاتړ کړی و.

د دې تړون له مخې د بندیزونو د لرې کولو په بدل کې ایران منلې چې خپل اټومي فعالیتونه به کم کړي.

په دې تړون کې اروپايي ټولنه، روسیه، چین، فرانسه، جرمني او برتانیا شامل دي.