د ټرمپ د استيضاح محاکمه له ناندریو سره پیل شوه

د امریکا کانګرس کې ډیموکراټان دې هڅه کې پاتې راغلل، چې د ولسمشر ټرمپ د استیضاح محاکمې په لومړۍ ورځ نور سندونه برابر کړي.

دوی هڅه کوله چې سپیه ماڼۍ چې له اوکراین سره د ټرمپ د اړیکو په هکله نور سندونه تیار کړي.

همدا وجه وه چې مشرانو جرګه کې د ولسمشر ټرمپ د استیضاح محاکمه د مقرراتو په هکله د جمهوريپالو او ډیموکراټانو له ناندریو سره پیل شوه.

مشرانو جرګه- چې ډېری غړي یې جمهوریپال دي- مشر یې میچ مکانل د داسې مقرراتو غوښتنه کوله چې د حساسو شاهدانو حاضرول یا د اسنادو غوښتلو مخه ډب کوي.

خو ډیموکراټان وايي، دا هڅه د ولسمشر ټرمپ پر تېروتنو له پردې اچولو پرته بل څه نه دي.

* د امریکا ولسي جرګې ولسمشر ټرمپ استیضاح کړ

* د ټرمپ استیضاح؛ ډیموکراتانو رسماً پر ولسمشر تورونه ولګول

له دې بهیر پیلېدو مخکې د استیضاح په محاکمه کې مشر څارنوال او د کانگرېس ډېموکراټ غړي اډم شیف ویلي قاطع دلایل شته چې ښیي ښاغلى ټرمپ د ولسمشرۍ له واکونو ناوړه ګټه پورته کړې ده.

ښاغلي شیف په سنا جرګه کې د ولسمشر ټرمپ د استیضاح بهیر له پيله وړاندې خبریالانو ته وینا کې ادعا وکړه، په دغه جرگه کې چې جمهوريپال اکثریت لري او د عیني شاهدانو راغوښتلو ته یې لیوالتیا نه لري د دې خطر دى چې عادلانه محاکمه ونه شي.

پر ولسمشر ټرمپ د لګېدلو تورونو د سپیناوي لپاره په مشرانو جرګه یا سنا کې د غونډو لړۍ پيل شوې.

دا غونډې به هره ورځ شپږ ساعته او شپږ ورځې دوام وکړي.

د امریکا د سترې محکمې ریيس به د دې غونډو مشري کوي.

پر ټرمپ لګېدلي تورونه

ډونلډ ټرمپ تورن دی چې د اوکراین له حکومته یې په راتلونکو ولسمشریزو ټاکنو کې د مرستې تر لاسه کولو هڅه کړې ده.

د دې تور جزيياتو کې ویل شوي چې ښاغلي ټرمپ له خپل اوکرایني سیال ویلادیمیر زلېنسکي سره په ټيلفوني خبرو کې ګواښ کړی که اوکرایین د ده د سیال جو بایډن د زوی "هنټربایډن" په اړه پلټنې ونه کړي نو له دغه هېواد سره کېدونکې مرستې به وځنډوي.

هنټر بایډن د انرژۍ له اوکرایني شرکت "بوریسما" سره کار کاوه.

* ډونلډ ټرمپ: "سملاسي مې محاکمه" کړئ

* "ډونلډ ټرمپ د دېموکراسۍ لپاره ښکاره خطر دی"

بل تور دا دی چې ښاغلي ټرمپ کانګرس ته د شاهدۍ ورکولو په مخنیوي سره د پارلمان د کار مخنیوی کړی. خو ټرمپ دا تورونه ردوي.

د دې تورونو په دفاع کې د ښاغلي ټرمپ مدافع وکیلانو ویلي "دا تورونه د قناعت وړ نه دي او خطرناک دي".

د دوی له نظره پر ټرمپ پورې شوي تورونه جنایت نه بلل کیږي او داسې سرغړونه نه ده چې له مخې یې ولسمشر له دندې ګوښه کړل شي.

ډیموکراټان څه وايي؟

خو د کانګرس د غړو له خوا چې ټول دیموکراټان دي، په وړاندې شوي سند کې ولسمشر ټرمپ تورن دی چې " د ولسمشرۍ له واکونو یې ناوړه ګټه پورته کړې چې پر یوه کمزوري بهرني شریک په ټاکنو کې د ده د ګټې لپاره فشار راولي".

په دې سند کې ویل شوي " په دې کار سره - ټرمپ - زموږ ملي امنیت او ډېموکراټ نظام له ګواښ سره مخامخ کړی.

دغه راز هغه هڅه کړې چې خپلې کړنې پټې کړي او دا زموږ د جمهوریت په تاریخ کې ساری نه لري".

ایا ټرمپ له دندې ګوښه کېدای شي؟

د ټرمپ د پړ خېژولو او په پایله کې د ولسمشر په توګه له دندې ګوښه کولو لپاره د مشرانو جرګې درېیمې برخې رایو ته اړتیا ده، خو جمهوریپال ګوند- چې ټرمپ یې مشري کوي- پر مشرانو جرګې واکمن دی.

د همدې اکثریت پر بنسټ د ټرمپ پرضد د ډېرو رایو کارېدل د ډیرو له امکان لرې خبره ده.

ډیموکراټ ګوند په سنا مجلس کې یوازې ۴۷ غړي لري.