هندوستان د ذاکر نایک پاسپورټ لغوه کړ

د هندوستان د بهرنیو چارو وزارت د اسلامي نړۍ د مبلغ ډاکټر ذاکر نایک پاسپورټ لغوه کړی دی. پر نوموړي له ترهګرو ډلو سره د مالي مرستو او د دغو ډلو لپاره د پیسو سپینولو تورونه دي.

د هندوستان د ترهګرۍ ضد ادارې ویاند ویلي، د ممبي د پاسپورټ ادارې د هندوستان د څېړنو د ملي ادارې په غوښتنه د ډاکټر ذاکر نایک پاسپورټ ناچله اعلان کړی دی.

پر دې سربېره د اپرېل په ۲۱مه هم محکمې د ملي څېړنو ادارې په غوښتنه د جون تر ۱۵مې محکمې ته د ډاکټر ذاکر نایک د حاضرېدلو حکم ور کړی و.

د هندوستان د ترهګرۍ ضد ادارې په خبره، د ډاکټر ذاکر نایک له خوا د محکمو د حکمونو تر بابېزه ګڼلو وروسته یې د هندوستان د بهرنیو چارو له وزارته د نوموړي د پاسپورټ د ناچله کولو غوښتنه کړې ده.

۵۱ کلن ذاکر نایک دمګړۍ له هندوستان بهر دی، خو پر نوموړي له ترهګرو ډلو سره د مالي مرستو او د پیسو سپینولو تورونه پر خپل ځای دی.

نوموړي د تېر کال د جولای پر لومړۍ له هندوستانه بهر تللی دی.

امنیتي ادارو تر هغه وروسته د ډاکټر ذاکر نایک په اړه پلټنې پیل کړې چې د تېر کال په جولای کې د بنګله دېش په پلازمېنه ډاکه کې پر یوه خوړنځي ډله ییز ترهګریز برید وشو.

په برید کې ښکېلو کسانو ادعا وکړه چې د اسلامي نړۍ د ستر مبلغ ډاکټر ذاکر نایک له تقریرونو اغېزمن شوي وو.

ښاغلي نایک د روان کال په جنورۍ کې خپل پاسپورټ د لسو کلونو لپاره تمدید کړی دی.

د پي‌ټي‌ای د راپور پر بنسټ، پر نوموړي د خپلو تقریرونو له لارې د نفرت خپرولو، د ترهګرو د مالي ملاتړ او پیسو وینځنې تورونه دي، خو ښاغلي نایک له هندي رسنیو سره په خبرو کې ځلونه یاد تورونه رد کړي دي.