د یمن حوثیانو پر اسرائیل دویم توغندیز برید کړی او ګواښ یې کړی، چې راتلونکو ورځو کې به نور بریدونه هم کوي

ژوندی پوښښ

1. ۳۹ دقیقې وړاندېوروستی, حوثیانو تائید کړه، چې پر اسرائیل یې دویم توغندیز برید کړی

   په یمن کې حوثي یاغیان وايي، نن (جمعه) یې د اسرائیل په سویلي برخو کې دویم توغندیز برید کړی. د وسله والو حوثي یاغیانو ډلې ویاند یحیی سریع وايي، دوی"د کروز توغندیو او بې ‌پیلوټه الوتکو یو لړ بریدونه" کړي چې هدف یې د اسرائیل "څو مهم پوځي مرکزونه" وو.

   هغه زیاته کړه چې دا بریدونه د ایران او حزب الله له پوځي عملیاتو سره "هممهاله" وو، او ادعا یې وکړه چې دا بریدونه "بریالي وو او خپل هدفونه یې ترلاسه کړل".

   نوموړي زیاته کړه، چې په راتلونکو ورځو کې به نور بریدونه هم ترسره شي "تر هغه چې دښمن خپل بریدونه او تېری بند نه کړي".

   له هغه وروسته چې د اسرائیلي او امریکايي رسنیو لخوا د حوثیانو د دوهم پړاو بریدونو راپورونه ورکړل شول، د نوموړي دا څرګندونې پر ټیلیګرام خواله رسنۍ خپرې شوې.

   دویم برید له هغه یوازې څو ساعته وروسته شوی،چې حوثیانو تائید کړه، دوی له ایران سره د امریکا او اسرائیل د شخړې له پیل وروسته لومړنی توغندی د اسرائیل پر لور توغولی و.

   تر دې وړاندې، اسرائیل ویلي وو چې دوی له یمنهراغلی یو توغندی شنډ کړی دی.

2. ۳ ساعتونه وړاندېوروستی, ایراني چارواکي وايي پر یوه روغتیايي مرکز برید شوی

   یوه ایراني چارواکي ویلي، په میناب ولسوالۍ کې د "شجره طیبه" لومړني ښوونځي ته څېرمه یو کلینیک، چې د جګړې په لومړۍ ورځ هم ویشتل شوی و، یو ځل بیا تر برید لاندې راغلی دی.

   د سوېلي هرمزګان ولایت مرستیال والي احمد نفیسي وایي، د "شهید ابسالان" پر روغتیايي مرکز دې برید کې د دغه طبي مرکز "زېرمتونونو ته زیان" اوښتی دی.

   د ایران د فارس خبري اژانس، چې د اسلامي انقلاب د ساتندوی ځواک (سپاه پاسداران) پورې تړلی دی، د نفیسي له قوله ویلي چې امریکا او اسرائیل پر دغه طبي کمپلیکس برید کې له "څو بې پیلوټه الوتکو" (ډرون) کار اخیستی. نوموړی زیاتوي: "له نېکه مرغه، دې برید کومه مرګ ژوبله نه ده اړولې،" او زیاته یې کړه چې د برید د کچې په اړه څېړنې روانې دي.

   دا سیمه وروسته له هغه خلکو تشه شوې وه چې د فبرورۍ پر ۲۸مه کله چې امریکا او اسرائیل پر ایران خپل بریدونه پیل کړل پر دغه لومړني ښوونځي خونړی برید وشو.

   ایراني چارواکي وایي چې پر ښوونځي په برید کې دوه پرله پسې توغندي ویشتل شوي وو، چې لږترلږه ۱۶۸ کسان یې ووژل، چې شاوخوا ۱۱۰ یې ماشومان وو.

   امریکایي رسنیو راپور ورکړی چې د امریکا پوځي پلټونکي پر دې باور دي چې د دوی خپلو ځواکونو په تېروتنې سره دا ښوونځی ویشتلی، په داسې حال کې چې د امریکا د دفاع وزیر پیټ هیګسیت ویلي چې دا موضوع تر څېړنې لاندې ده.

   نفیسي زیاتوي: "نن ټوله نړۍ پوهیږي چې د دوښمن لخوا په نښه شوې سیمه په هیڅ ډول نظامي نه ده، خو بیا هم موږ پر دې سیمه د یو بل برید شاهدان یو، چې دا په ښکاره ډول په میناب کې پر شجره طیبه ښوونځي باندې د برید او د ۱۶۸ زده کوونکو او ښوونکو د وژلو قصدي نیت ثابتوي."

3. ۴ ساعتونه وړاندېوروستی, متحده عرب اماراتو ۲۰ توغندي او ۳۷ ډرون الوتکې شنډې کړې

   د متحده عرب اماراتو د دفاع وزارت وایي، چې د دغه هېواد هوايي مدافع ځواکونو ۲۰ بالستیک توغندي او ۳۷ ډرون الوتکې شنډې کړې دي.

   وزارت زیاتوي چې د "ایران د ښکاره بریدونو" له پیل راهیسې، د هېواد هوايي دفاع تر اوسه ۳۹۸ بالستیک توغندي، ۱۵ کروز توغندي او ۱۸۷۲ ډرون الوتکې شنډې کړې دي.

   د دفاع وزارت په وینا، دغه بریدونه تر دا مهاله د ۱۱ کسانو د مړینې لامل شوي، چې په هغو کې د وسله والو ځواکونو دوه غړي او یو مراکشی ملکي وګړی چې له وسله والو ځواکونو سره یې کار کاوه، شامل دي.

   همدا نن د متحده عربي اماراتو په پلازمېنه ابو ظبۍ کې د یو توغندي له شنډولو وروسته پنځه کسان ټپیان شوي دي.

4. ۶ ساعتونه وړاندېاسرائیلو لبنان کې خبریالان وژلي

   د ځایی رسنیو د راپورونو له مخې، د لبنان په سویل کې د خبریالانو پر یو موټر د اسرائیلو په برید کې درې تنه لبناني خبریالان وژل شوي دي.

   علي شعیب، چې د المنار ټلویزیون (هغه شبکه چې د حزب الله ډلې لخوا اداره کیږي) خبریال و، او د المیادین شبکې دوه خبریالان، فاطمه او محمد فطوني، د جزین په ښارګوټي کې په یوه هوایي برید کې ووژل شول.

   د لبنان ولسمشر جوزف عون دا برید د یو "ښکاره جرم" په توګه وغانده او ویې ویل چې دا له نړیوالو قوانینو سرغړونه ده، ځکه د جګړې پر مهال باید خبریالان خوندي وي.

   د اسرائیلو پوځ تایید کړې چې علي شعیب یې په یو برید کې وژلی، خو پر هغه یې تور پورې کړی چې د حزب الله غړی و او د خبریال په جامه کې یې فعالیت کاوه.

   دا دویم ځل دی چې اسرائیل په لبنان کې د جګړې له پیل راهیسې د خبریالانو په نښه کولو تورنیږي. تېره اونۍ، د المنار ټلویزیون مشهور ویاند محمد شري او مېرمن یې هم په یوه نښه برید کې ووژل شول.

   تر دې دمه په لبنان کې د اسرائیلو په هوایي بریدونو کې له ۱۱۰۰ ډېر ولسي خلک وژل شوي، چې ۱۲۰ ماشومان او ۴۲ روغتیایي کارکوونکي هم په کې شامل دي.

   په لبنان کې ډېر خلک اندېښمن دي چې اسرائیل له هغو تکتیکونو کار اخلي چې په غزه کې پرې تورن و. په دې کې د ملکیانو، خبریالانو او روغتیایي کارکوونکو قصدي په نښه کول شامل دي، هغه تورونه چې اسرائیل یې ردوي.

5. ۸ ساعتونه وړاندېوروستی, قطر او اوکرایین دفاعي تړون لاسلیک کړ

   

   د عکس سرچینه، Reuters

   قطر او اوکرایین یو دفاعي تړون لاسلیک کړی چې له مخې به یې دواړه هېوادونه وکولی شي د توغندیو او ډرون الوتکو له ګواښونو سره د مبارزې په برخه کې خپلې تجربې شریکې کړي.

   دا د هغو ناستو ولاړو او بحثونو په لړ کې وروستی ګام دی چې د اوکرایین ولسمشر ولادیمیر زیلېنسکي دا اونۍ خلیج ته د خپل ګړندي سفر پر مهال ترسره کړل.

   د قطر دفاع وزارت د یوې ویناپاڼې له مخې، دواړو لورو په سیمه کې پر امنیتي بدلونونو او د همکاریو پر بېلابېلو برخو خبرې وکړې.

   وروسته بیا دا هوکړه لیک د اوکرابین د وسله والو ځواکونو د عمومي قومندان برید جنرال انډري هناتوف او د قطر د وسله والو ځواکونو د لوی درستیز برید جنرال جاسم بن محمد المناعي ترمنځ لاسلیک شو.

   دا تړون به په ټیکنالوژۍ او دفاعي پانګونه کې د دوه اړخیزې همکارۍ زمینه برابره کړي.

   اوکرایین غواړي د خلیج هغو هېوادونو سره مرسته و کړي چې په تېره میاشت کې له ایران سره د جګړې له پیل راهیسې تر بریدونو لاندې راغلي دي.

   اوکرایین داسې ګڼي چې ګواکې دې برخه کې یې تجربه پیاوړې ده.

   له بلې خوا، کېیف د هغو متحدینو لا زیات ملاتړ ته هم اړتیا لري چې د روسیې پر وړاندې جګړه کې ورسره مرسته وکړي هغه متحدین چې ډیرې مالي سرچینې او د ملاتړ وړتیا لري، په ځانګړې توګه دې ورځو کې چې د متحده ایالاتو پام بل لور ته اوښتی دی.

6. ۹ ساعتونه وړاندېوروستی, زیلېنسکي سعودي سره د ډرون ټیکنالوژۍ تجربې شریکوي

   

   د عکس سرچینه، Reuters

   په ټول منځني ختیځ کې د توغندیو او ډرون بریدونو لړۍ دوام لري. سعودي عربستان، متحده عربي اماراتو، ایران، لبنان، کویت او اسرائیل ټولو تېره شپه د بریدونو راپورونه ورکړي دي.

   د اوکراسین ولسمشر ولادیمیر زیلېنسکي له سعودي عربستان سره یو تړون لاسلیک کړی چې د ډرون دفاع په برخه کې خپله تجربه او ټیکنالوژي ورسره شریکه کړي. د اوکرایین ولسمشر په متحده عربي اماراتو کې له پوځي مشرانو سره هم کتلي او نن په قطر کې پر خبرو بوخت دی.

   هغه وایي، سعودي عربستان له ایرانه د هماغه ډول بالستیک توغندیو او ډرون بریدونو سره مخ دی چې اوکرایین یې له څلورو کلونو زیات وخت راهیسې د روسیې پر وړاندې مقاومت کوي. د اوکرایین د ډرون جوړولو څو شرکتونو بي بي سي ته ویلي چې د خلیج هیوادونو ترې د مرستې غوښتنه کړې ده.

   زیلېنسکي وایي "موږ چمتو یو چې خپلې تجربې او د پوځي اډانو معلومات له سعودي عربستان سره شریک کړو او د ژوند د خوندیتوب د پیاوړتیا لپاره په ګډه کار وکړو."

   اوس داسې راپورونه ترلاسه کېږي چې ایران په دوبۍ کې د اوکرایین د هوایي دفاع یو زېرمتون ویجاړ کړی دی، خو کېیف دا ادعا ردوي.

7. ۸ وری ۱۴۰۵ - ۲۸ مارچ ۲۰۲۶وروستی, پاکستان د کړکېچ کمولو په موخه د سعودي عربستان، ترکیې او مصر کوربتوب کوي

   د پاکستان د بهرنیو چارو وزیر اسحاق ډار وایي، دا هیواد به د مارچ له ۲۹مې تر ۳۰مې، اسلام اباد کې د سعودي عربستان، ترکیې او مصر د بهرنیو چارو د وزیرانو کوربه وي.

   هغه پر اېکس (X) په یوه اعلامیه کې لیکلي چې دوی به د "سیمې د کړکېچ کمولو" د هڅو په ګډون پر "هر اړخیزو بحثونو" خبرې وکړي. د مصر د بهرنیو چارو وزارت یو بیان خپور کړی چې تاییدوي د دوی د بهرنیو چارو وزیر د خبرو اترو لپاره پاکستانۍ پلازمینې ته سفر کړی دی.

   پاکستان په سیمه کې د سولې د منځګړي په توګه د رول لوبولو هڅې کوي. په جلا توګه، دې هیواد د متحده ایالاتو او ایران ترمنځ د خبرو اترو د کوربتوب وړاندیز هم کړی دی، که څه هم تر اوسه د دې خبرو د ترسره کېدو په اړه هیڅ رسمي تایید نشته. د روانې اونۍ په پیل کې، ډار ویلي وو چې د "پاکستان له خوا د پیغامونو د رسولو" له لارې "نا مستقیمې خبرې" روانې دي.

   ټرمپ هم د روانې اونۍ په پیل کې د پاکستان د لومړي وزیر شهباز شریف د اېکس (X) پوسټ یو سکرین شاټ په ټروت سوشلکې شریک کړی و. په دغه پوسټ کې شریف ویلي وو چې پاکستان د خبرو اترو کوربتوب ته "چمتو دی".

8. ۸ وری ۱۴۰۵ - ۲۸ مارچ ۲۰۲۶د پاکستان لومړي وزیر د ایران له ولسمشر سره پر ټلیفون خبرې کړي

   د پاکستان لومړي وزیر شهباز شریف ویلي، نن یې د ایران له ولسمشر مسعود پزشکیان سره یو "تفصیلي" ټیلیفوني اړیکه درلوده. هغه وایي چې دا خبرې اترې تر یو ساعت اوږدې وې.

   شریف پر خپله اېکس (X) پاڼه لیکلي چې هغه پزشکیان د پاکستان له هغو روانو ډیپلوماټیکو هڅو خبر کړی چې له امریکا او د خلیج هیوادونو سره د "خبرو اترو د اسانتیا او د تاوتریخوالي د کمولو" په موخه پیل شوې دي.

   پاکستان تر دې وړاندې هم وړاندیز کړی و چې د امریکا او ایران ترمنځ د خبرو اترو کوربتوب ته چمتو دی.

   شریف همداراز پر ایران د اسرائیل بریدونه وغندل او د "ایران له زړور ولس" سره یې د پاکستان یووالی او همغږي څرګنده کړه.

9. ۸ وری ۱۴۰۵ - ۲۸ مارچ ۲۰۲۶وروستی, د امریکا-اسرائیلو او ایران جګړه کې د حوثیانو ورګډېده یوه نوې جبهه پرانیستلی شي

   په یمن کې د ایران په ملاتړ حوثيانو تائید کړه چې له ایران سره د امریکا او اسرائیلو د جګړې له پیل راهیسې یې د لومړي ځل لپاره پر اسرائیلو برید کړی دی.

   دې ډلې ویلي چې د ایران، لبنان، عراق او فلسطیني سیمو په نښه کولو غبرګون کې یې "د اسرائیلو حساس پوځي تاسیسات" په څو بالستیکو توغندیو ویشتلي دي. دوی زیاته کړه چې عملیات به یې تر هغه وخته دوام ومومي چې په ټولو جبهو کې "تېری" پای ته ونه رسیږي.

   د امریکا-اسرائیل او ایران جګړه کې د حوثيانو ورګډېده د دې خطر لري چې جګړه سره سمندر ته نږدې یوې نوې جبهې پرانیزي.

   حوثيانو د ۲۰۲۳ کال په نومبر کې په سره سمندر کې پر کښتیو بریدونه پیل کړل او د اکټوبر د اوومې له بریدونو وروسته یې په منظم ډول پر اسرائیل توغندي وویشتل؛ دوی وویل چې دا کار د فلسطینیانو سره د خواخوږۍ په موخه کوي.

   حوثيانو سوداګریزې کښتۍ پر ډرون او توغندیزو بریدونو، او همدارنګه د کښتیو او چورلکو له لارې په بریدونو سره په نښه کړې، چې له امله یې شرکتونو خپلې کښتۍ له سره سمندره واړولې او د افریقا د "کیپ آف ګوډ هوپ" له لارې یې اوږده لاره غوره کړه.

   حوثيانو د ۲۰۲۴ کال په جنورۍ کې د بریتانیا او امریکا پر جنګي بیړیو هم بریدونه وکړل.

   بریتانیا او امریکا په ځواب کې په یمن کې د حوثيانو پر اهدافو بریدونه وکړل او د شاهي سمندري ځواکونو یوه دفاعي بېړۍ یې واستوله چې د حوثيانو له بریدونو نورې کښتۍ وساتي.

   په منځني ختیځ کې په جګړه کې د حوثيانو ورګډېده د هرمز تنګي له لارې د بار وړونکو کښتیو په اړه اندېښنې نورې هم زیاتولی شي، هلته چې پر یو شمېر ټانکرونو بریدونه شوي او د ایران لخوا په عملي توګه تړل شوی و.

   حوثيان له ۲۰۱۴ کال راهیسې د یمن پر ډېره برخه شمال لوېدیځ کنټرول لري، هغه وخت چې دوی پلازمینې صنعا کې په نړیواله کچه په رسمیت پېژندل شوی حکومت وپرځاوه او یوه ویجاړونکې کورنۍ جګړه یې پیل کړه.

   

   د عکس سرچینه، Reuters

10. ۸ وری ۱۴۰۵ - ۲۸ مارچ ۲۰۲۶وروستی, د امریکا یوه ستره الوتکه لېږدونکې بېړۍ منځني ختیځ ته روانه ده

    په امریکا کې د بي بي سي همکارې رسنۍ ته امریکايي چارواکو تائید کړې، چې یو اېس اېس جارج ایچ. ډبیلو. بوش نومې بېړۍ، چې په اوبو کې روانه هوايي اډه بلل کېږي، او له ۸۰ ډېرې الوتکې لېږدولای شي، د امریکا د مرکزي قوماندانۍ له امر سره سم منځني ختیځ ته استول کېږي.

    د چارواکو په وینا، دغه لویه بېړۍ او د هغې ملګری پوځي ډله (سټرائک ګروپ) د روانې میاشتې پیل کې له استول کېدو مخکې روزنه بشپړه کړې ده، او کېدای شي په ایران کې د امریکا له عملیاتو سره یوځای شي.

    دغه راز، دوه لارښود توغندي ویشتونکي بېړۍ یو اېس اېس ډونلډ کوک او یو اېس اېس ماسون هم دا اونۍ له امریکا روانې شوې دي، چې د ایران اړوند عملیاتو سره یوځای شي.

    یوه بله بېړۍ، یو اېس اېس روز هم له امریکا وتلې ده، خو تر اوسه یې منزل په عامه توګه نه دی اعلان شوی.

11. ۸ وری ۱۴۰۵ - ۲۸ مارچ ۲۰۲۶وروستی, اسرائیل وايي، د یمن له لوري یو توغندی ورتوغول شوی

    د اسرائیلو پوځ وايي، له یمن څخه د اسرائیلو پر لور د یوه توغندي توغول شوي. د راپورونو له مخې، دا د جګړې له پیل راهیسې لومړی ځل دی چې له یمن نه دا ډول برید کېږي.

    په هغه پیغام کې چې پر ټیلیګرام خپور شوی، ویل شوي: ''د هوايي دفاع سیستمونه د دې ګواښ د مخنیوي لپاره فعال شوي دي.''

    له دې شاوخوا ۱۵ دقیقې وروسته، د اسرائیلو پوځ اعلان وکړ چې خلک کولی شي له پناه ځایونو ووځي.

    دا پېښه وروسته له هغه رامنځته کېږي چې په یمن کې د ایران له ملاتړه د برخمنو حوثیانو ویاند خبرداری ورکړی و چې که پر ایران بریدونه دوام وکړي، دوی به جګړې ته داخل شي.

    یحیی سریع، چې د حوثي ځواکونو ویاند دی، په یوه بیان کې وویل:''زموږ ګوتې پر ماشه دي او موږ د مستقیمې پوځي مداخلې لپاره چمتو یو''، په ځانګړي ډول که:

    • نور هېوادونه د امریکا او اسرائیلو تر څنګ د ایران پر ضد جګړې ته داخل شي
    • له سره سمندره د ایران یا کوم بل مسلمان هېواد پر ضد ''دښمنانه'' عملیات وشي
    • پر ایران ''بریدونه زیات'' شي

    په دې بیان کې د ایران، فلسطین او غزې، عراق او لبنان پر ضد د امریکا او اسرائیلو اقدامات د حوثیانو د دې دریځ اصلي لامل بلل شوی دی.

12. ۸ وری ۱۴۰۵ - ۲۸ مارچ ۲۰۲۶وروستی, سعودي عرب کې پر هوايي اډې برید کې ۱۲ امریکايي پوځيان ټپیان شوي

    د امریکايي رسنیو رټونو کې ویل شوي، سعودي عرب کې پر یوې هوايي اډې د برید له امله ۱۲امریکايي سرتېري ټپیان شوي دي. له دې مخکې راپور ورکړل شوی و چې ۱۰سرتېري ټپیان شوي، خو اوس نوې شمېرې ښيي چې لږ تر لږه ۱۲ تنه ژوبل شوي دي.

    د راپورونو له مخې، لږ تر لږه دوه سرتېري سخت ټپیان دي. ویل کېږي، چې سرتېري د سعودي په هوايي اډه کې د یوې ودانۍ دننه موجود وو، چې دا برید هغه وخت وشو کله

    سرچینو ویلي چې دا برید د یوه توغندي او څو ډرونونو په وسیله ترسره شوی، او په دې کې یو شمېر هغه الوتکې هم زیانمنې شوې، چې په هوا کې الوتکو ته تېل ورکوي.

    تر اوسه پورې د امریکا دفاع وزارت (پینټاګون) او د امریکا مرکزي قوماندې په دې اړه د رسنیو پوښتنو ته کوم رسمي ځواب نه دی ورکړی.

13. ۷ وری ۱۴۰۵ - ۲۷ مارچ ۲۰۲۶وروستی, پر تل ابیب د ایران توغندیز برید کې یو کس وژل شوی

    د اسرائیلو د بېړنیو خدماتو اداره وايي، په تل ابیب کې یو ۵۲ کلن سړی د هغه توغندي له امله وژل شوی چې دې هېواد ته ورتوغول شوی و.

    د یادې ادارې ویاند وايي، د ښار په یوه بله برخه کې د دوو کسان د برسېرنو ټپونو درملنه شوي دي. د رسنیو د راپورونو له مخې، توغندی په کلسټر سرګلولې سمبال و چې په پراخه سیمه کې کوچني بمونه خپروي.

    د اسرائیلو پوځ په وینا دوی د جمعې په ماښام له ایرانه توغول شوي توغندي کشف کړل او له خلکو یې وغوښتل چې په "خوندي ځایونو" کې پاتې شي.

    په تل ابیب کې د ۵۲ کلن سړي د وژل کېدو له اعلانه یو ساعت مخکې د اسرائیلو پوځ وویل، دوی له ایرانه توغول شوي توغندي شنډوي.

14. ۷ وری ۱۴۰۵ - ۲۷ مارچ ۲۰۲۶وروستی, ایران وايي، پر بوشهر اټومي بټۍ دریم ځل برید شوی, غونچه حبیبي ازاد- بي بي سي فارسي

    د ایران اټومي انرژۍ سازمان (اې اي او ای) په یوه اعلامیه کې چې ایراني رسنیو خپره کړې وايي، د روانې جګړې په ترڅ کې د بوشهر اټومي انرژۍ پر تاسیساتو نن دریم ځل برید شوی دی.

    اې اي او ای وايي، د دوی د لومړنۍ ارزونې له مخې، دې برید هیڅ ډول مرګژوبله یا مادي زیان نه دی اړولی او هیڅ تخنیکي خنډ نه دی رامنځته شوی.

    اې اي او ای زیاتوي، برېښناکوټ اوسمهال "فعال دی او پاموړ کچه راډیو اکټېو مواد لري." له همدې امله، "دې تاسیساتو ته هر ډول زیان کولی شي د جدي اټومي پیښې لامل شي چې د سیمې لپاره به نه جبرانیدونکي پایلې ولري".

    اعلامیه کې ادعا شوې، چې برید د متحده ایالاتو او اسرائیلو لخوا شوی.

    په اعلامیه کې دا "سوله ییز اټومي تاسیسات" بلل شوي، دا بریدونه غندي او خبرداری ورکوي چې دا ډول کړنې کولای شي د سیمه ییز امنیت او خوندیتوب لپاره "خطرناکې او نه جبرانیدونکې پایلې" ولري، "په ځانګړې توګه د خلیج د غاړې هېوادونو لپاره".

    د اې اي او ایاعلامیه کې ویل شوي، د مارچ پر۲۴او ۱۷مه هم همدا اټومي بټۍ په نښه شوې وه، خو د اې اي او ای په وینا، هغوپېښو هم کوم ځاني او مالي زیان نه دی اړولی.

    د ایران یوازینۍ فعاله اټومي بټۍ، چې په سویلي ښار بوشهر کې وه، د روسیې په مرسته بشپړه شوه.

    د ایران اټومي پروګرام له اوږدې مودې راهیسې د لانجې ټکی و، چې له کبله یې پر پراخ نړیوال بندیزونه یې رامینځته کړل.

    له ایران سره د امریکا او اسرائیلو جګړه د فبروري په ۲۸مه، په جینیوا کې د امریکا او ایران د غیر مستقیمو له دریم پړاو دوه ورځې وروسته پیل شوه.

15. ۷ وری ۱۴۰۵ - ۲۷ مارچ ۲۰۲۶امریکا : ایران کې به عملیات "تراونیو دوام کوي، نه تر میاشتو"

    د امریکا د بهرنېو چارو وزیر،مارکو روبیو، ویلي دي چې ایران کې به د متحدو ایالتونو عملیات "تراونیو دوام کوي نه تر میاشتو".

    په فرانسه کې د اوو سترو صنعتي هېوادو یا جی اوه د بهرنېو چارو وزیرانو سره له غونډې وروسته خبریالانو سره خبرو کې دې پوښتنې ته ځواب کې چې ایا امریکا منځني ختیځ‌ ته د نورو پوځیانو پر لېږلو غور کوي؟ ده وویل دی به په نظامي تاکتیکونه تبصره نه کوي.

    خو ده زیاته کړه چې متحد ایالتونه هلته ځانګړي هدفونه لري او ډاډه یو چې ډېر زر به دا هدفونه ترلاسه کړو.

    دې پوښتنې ته چې ایران کې به د امریکا عملیات ترکومه دوام کوي؟ هغه وویل " مونږ تراونیو پردوام غږیږو نه تر میاشتو".

16. ۷ وری ۱۴۰۵ - ۲۷ مارچ ۲۰۲۶په بیروت کې شپږ ایراني دېپلوماتان په یو برید کې وژل شوي دي

    په دې دېپلوماتانو بیروت کې د هغوی د اوسېدو ځای کې حمله شوې. د ایران د بهرنېو چارو وزارت وايي دا برید د جنګ به دویمه اون‍ۍ کې شوی و.

    ددې نه وړاندې اسراییلو ادعا کړې وه چې بیروت کې پر یوه هوټل برید کې " د قدس ځواکونو څو مهم قوماندان په نښه کړي دي".

    اخوا د ایران دولتی خبر رسنۍ وايي چې ایران کې د اتوم اړونده پر دوو ځايونو بریدونه شوي دی، خو هیڅ رادیواکټیو مواد هوا ته نه دی خارج شوي.

    د ارنا خبر اژانس د چارواکو له خلې ویلي دی. چې دې بریدونو کې چاته تاوان نه دی رسېدلی.

17. ۷ وری ۱۴۰۵ - ۲۷ مارچ ۲۰۲۶د اوو سترو صنعتي هېوادو ډلې پر ملکیانو د بریدونو بندولو غوښتنه وکړه

    د فرانسې د بهرنېو چارو وزیر وايي. د اوو پرمختللو صنعتي هېوادو ډله "جی اوه" په استثنايي ډول دې ته ژمنه ده چې ایران کې د جګړې اغېز راکم کړي

    یان نیول بارروت وویل جي اوه ډله ددې غوښتنه کوي چې " په ملکیانو او ملکي تاسیساتو باید په سم لاسي ډول بریدونه بند شي".

    د جي اوو غړو هېوادو د بهرنېو چارو وزیرانو سره له غونډې وروسته ده وویل " هیڅ څه پر ملیکانو د برید اجازه نه ورکوي او ملکیان باید خوندي وي".

    ده وویل د. جی اوه ډله هرمز تنګي کې د کښتیو خوندي او ازاد تګ راتګ باوري کولو لپاره خپلو هڅو ته دوام ورکوي.

18. ۷ وری ۱۴۰۵ - ۲۷ مارچ ۲۰۲۶اسراییلو خبرداری ورکړی چې " بریدونه یې پراخیږي"

    اسراییلو پر ایران د بریدونو تازه څپه پیل کړې ده او ددې هېواد چارواکي وايي راتلونکو ورځو کې به " بریدونه پراخیږي".

    دا په داسې حال کې ده چې د بحران د حل لپاره دېپلوماتیکه هڅې هم تردې دمه بې نتیجې دي.

    د اسراییلو پوځ ویلي‌ چې د " تهران په زړه" کې یې د بالستیکي توغندیوو د تولید اړونده تاسیسات په نښه کړې دي.

    د اسراییلو د د دفاع وزیر اسراییل کاتس ویلي دي خبرداریو سره سره پر دوی حملې روانې دي. نو له همدې امله " ددوی بریدونه به هم سختیږي" او ایران به ددې" لویه بیه" پرې کوي.

19. ۷ وری ۱۴۰۵ - ۲۷ مارچ ۲۰۲۶د ایران پر قم ښار برید کې "۱۸ کسان وژل شوي او ۱۰ ژوبل "دي

    د ایران د صدا او سیما خبري اژانس د راپور له مخې قم ښار کې یو برید کې لږتر لږه "۱۸کسان وژل شوي او ۱۰ ژویل" شوي دي.

    دې اژانس د امنیتي چارواکو له خلې ویلي چې دا برید تېره شپه د قم ښار پردیسیان سیمه کې شوی دی.

    د ایران سرې میاشتې ویلي دا برید د استوګنې یوې سیمې کې شوی دی، او هلته د دوی د ژغورنې او مرستو رسولو چارې روانې دي.

    د سرې میاشتې ویاند ویلي دی امکان شته چې د قربانیانو شمېر لوړ شي.

20. ۷ وری ۱۴۰۵ - ۲۷ مارچ ۲۰۲۶چین: ایران کې د نجونو پر ښوونځي برید له بشري حقونو "لویه سرغړونه" ده

    د ملګرو ملتو د بشري‌ حقونو شورا کې د ایران استازي ویلي دي د ایران په جنوب میناب کې د نجونو پر ښوونځی شوی برید یوه داسې فاجعه ده چې ټولې اخلاقي او انساني پولې یې ماتې کړې دي.

    دې برید کې چې د ایران د جنګ په پیل کې شوی ۱۶۸ نجونې وژل شوې وې. د برید په اړه د ملګرو ملتو د بشري حقونو شورا غونډې کې د وینا پرمهال د چین استازي وویل " دا برید له بشري حقونو لویه سرغړونه ده".

    ده وویل هېواد یې ددې برید له امله ټکان خوړلی دا په سختو ټکو غندي او د قربانیانو کورنیو سره خپله خواخوږي څرګندوي.

    ده وویل امریکا او اسراییلو د امنیت شورا له اجازې پرته پرایران حملې پیل کړې دي، او همدا کار "ددې فاجعې اصلي سبب دی".

    د چین استازي وویل اسراییلو او امریکا نه یوآځې د ایران مشران ترور کړي، بلکې د ایرانیانو بشري حقونه یې هم د پښو لاندې کړي دي.