د امریکا فلوریډا ایالت ځواکمن 'ایډالیا تواپان' ته چمتووالی نیسي

د امریکا په فلوریډا ایالت کې سلګونو زره خلکو ته چې د ایډالیا په نوم د توپان له خطر سره په مخامخ سیمو کې پراته دي، امر شوی چې ژر تر ژره خوندي سیمو ته ووځي‌.

دا غوښتنه د فلوریډا والي ران ډې‌سانټېس کړې ده.

هغه ویلي، د دغه ایالت هغو سیمو چې د دغه توپان مخ کې پرتې دي، د نوولسمې زېږدیزې پېړۍ له نیمایي راهیسې داسې ځواکمن توپان نه دی تجربه کړی.

ښاغلي ډې‌سانټېس زیاته کړې چې د فلوریډا له ۶۷ ناحیو څخه د ۲۸ ناحیو اوسېدونکو ته خوندي سیمو ته د وتلو امر شوی دی.

دغه ۲۸ ناحیې یا ولسوالۍ ټولټال یو نیم میلیون اوسېدونکي لري.

دغه توپاند دمګړۍ د تامپا ښار او پراخو نورو سیمو پر لور د حرکت په حال کې دی.

اټکل دا دی چې ایډالیا توپان به په ځايي وخت چارشنبه د فلوریډا سواحلو ته ورسېږي.

امریکا کې د هواپېژندنې خدماتو ادارې ویلي، چې دغه توپان شېبه په شېبه ځواکمنېږی او اوس په یوه ساعت کې ۱۶۵ کیلومتره چټک بادونه ورسره مله دي.

دې ادارې همدا راز د سختو ورښتونو وړاندوینه هم کړې ده.

ایډلیا توپان دوشنبه له کیوبا تېر شو او سې‌شنبه د امریکا د فلورېډا د سویل ختیځ ۴۴۰ کیلومترۍ ته رسېدلی و.

د دغه توپان له خطره سره په مخامخ سیمو کې لیدل کېږي، چې خلک پر پراخ چمتووالي بوخت دي.

خو د فلوریډا والي ویلي، چې د توپان له خطر سره د مخامخ سیمو اوسیدونکي ډېر وخت نه لري او څومره ژر چې کېدای شي باید خوندي سیمو ته وخوځېږي.

له دې سره هممهاله د تامپا ځايي چارواکو خبر ورکړی چې د دغه ښار هوايي ډګر هم تر پنجشنبې ورځې تړل شوی دی.

رپوټونو کې راغلي چې فلوریډا کې د ملي ګارد ۵۵۰۰ او د برېښنا ادارې ۴۰ زره کارکوونکي د تیارسي په حال کې دي.

تېر کال د ایان په نوم موسمي توپان د امریکا په دغه ایالت کې تر سلو ډېر کسان وژلي او همدا راز له سل میلیارد ډالرو ډېر زیانونه اړولي وو.