د اسرائیلو په بریدونو کې ځینې وژل شوې ولسي څېرې څوک دي؟

د جون پر ۱۳مه، د جمعې سهار وختي د ایران دننه اهدافو باندې د اسرائیلو په بریدونو کې یو شمېر ایرانی ملکي وګړي هم ووژل شول.

د ندا ایراني ګوند غړی علي هاتفي، شاعره پارنیا عباسي او د کورنۍ غړي یې، د تکواندو ځوان لوبغاړی امیرعلي امیني، د ونډو د مارکېټ فعاله سینا سلیماني، د وسله والو ځواکونو د وژل شوي لوی درستیز محمد باقري لور او خبریاله فرشته باقري، د اس ځغلونې لوبغاړی مهدي پولادوند او د کورنۍ درې غړي یې، د ایران د ساینس وزارت مرستیال وزیر مسعود شمس بخش لور پارسا منصور، لوبغاړې نیلوفر قلعه‌وند او د اسلامي ازاد پوهنتون د رییس مهدي تهرانچي مېرمن، د اسرائیلو په بریدونو کې د وژل شویو ملکي وګړو په ډله کې دي.

د ایران دولتي تلویزیون مخکې راپور ورکړی و چې د اسرائیلو په بریدونو کې ۷۸ کسان وژل شوي، چې ماشومان او ملکي وګړي په کې شته.

د رسمي راپورونو له مخې، د اسرائیلو په بریدونو کې شپږ لوړ پوړي ایراني پوځي قوماندانان هم وژل شوي دي.

لوړپوړي وژل شوي ایراني قوماندانان څوک دي؟

د وسله والو ځواکونو لوی درستیز جنرال محمد باقري، د خاتم الانبیاء د مرکزي قوماندانۍ، چې د ایران د پوځي عملیاتو د قوماندې اصلي مرکز دی، قوماندان جنرال غلام علي رشید، د اسلامي انقلابي ګارډ قول اردو قوماندان جنرال حسین سلامي او د سپاه پاسداران د هوايي ځواک قوماندان جنرال امیر علي حاجي زاده، هغه لوړپوړي ایراني چارواکي دي چې پر ایران د اسرائیلو د برید په لومړۍ ورځ یې رسمي سرچینو مړینه تایید کړې ده.

د جون ۱۴مه د جګړې په دویمه ورځ، د ایران د وسله والو ځواکونو لوی درستیز اعلان وکړ چې د اطلاعاتو مرستیال جنرال غلام رضا مهرابي او د عملیاتو مرستیال جنرال مهدي رباني د اسرائیلو بریدونو کې د وژل شویو سرتېرو په ډله کې شامل دي.

د اسد اباد ولسوالۍ د عامه امنیت ځواکونو مشر حبیب الله اکبریان او د منځنۍ کچې یو بل امنیتي چارواکی امیر حسین سیفي هم په همدان ولایت کې په اسرائیلي بریدونو کې وژل شوي دي.

د اسرائیل په بریدونو کې وژل شوي ساینسپوهان

همدارنګه، پر ایران د اسرائیلو د برید له پیل یوه ورځ وروسته، په ایران کې خبري سرچینو د درېیو نورو اټومي ساینس پوهانو د وژلو کېدو خبر ور کړی دی. دا کسان د علي بکايي کریمي، منصور اصغري او سعید بورجي په نوم پیژندل شوي وو، چې د ایران په اټومي پروګرام کې ښکیل وو.

اسرائیل پر ایران د برید په لومړۍ ورځ هم شپږ ایراني ساینسپوهان وژلي وو.

د اټومي انرژۍ د سازمان پخوانی مشر فریدون عباسي، د اسلامي ازاد پوهنتون رییس محمد مهدي تهرانچي او په 'اماد' اټومي پروژه کې ښکېل اکبر مطلبی زاده، عبدالحمید منوچهر، احمدرضا ذوالفقاري‌داریاني او امیر حسین فقهي په کې شامل وو.