طالبان: د سیمې هېوادونه دې د خپلو هغو اتباعو مخه ونیسي چې ورانکارو پېښو لپاره افغانستان ته را اوړي

د طالبانو ویاند ذبیح الله مجاهد له بهرنیو په ځانګړي ډول د سیمې له هېوادونو غوښتي، د خپلو هغو وګړو مخه ونیسي، چې د "ورانکارو پېښو" لپاره افغانستان ته دننه کېدو هڅه کوي.

ښاغلي مجاهد همدارنګه ادعا کړې، چې افغانستان کې څو وروستۍ امنیتي پېښې د بهرنیو اتباع لخوا شوې دي.

نوموړی وايي، "د ناامنیو دا پېښې ایجابوي، چې حکومتونه خپل مسولیتونه وپېژني."

یوه جګپوړي طالب چارواکي د نوم نه اخیستو په شرط د بي بي سي پښتو پاڼې ته وویل، چې په وروستیو پېښو کې د تاجکستان او اذربایجان وګړي ښکېل وو.

هغه دا هم ومنله چې ځینو پېښو کې پاکستاني وګړي هم ښکېل وو.

ذبیح الله مجاهد خپله اعلامیه کې د روسیې د حکومت هغه څرګندونې رد کړې چې ویلي یې وو، وسله والې ډلې له افغانستانه د منځنۍ اسیا هېوادونو امنیت ته ګواښ پېښوي.

سېرګيي شویګو د هند پلازمېنې ډیلي کې د شانګهای سازمان د دفاع وزیرانو غونډې ته وینا کې ویلي وو، افغانستان کې دېره وسلوالو ډلو د منځنۍ اسیا هېوادو کې فعالیتونه پراخ کړي دي.

نوموړي اندېښنه ښودلې وه، چې د القاعدې غوندې وسلوالې ډلې په منځنۍ اسیا کې د خپل اغېز د ډېرولو په لټه دي.

د روسیې دفاع وزیر ټینګار کړی و، چې د منځنۍ آسیا هېوادونو کې د وضعیت خرابېدو لاملونه رامنځته شوي دي.

ښاغلي شویګو ویلي وو، چې د داعش، القاعده، د ازبکستان اسلامي غورځنګ او د ختیځ ترکستان اسلامي تحریک په څېر ډلې ښايي د منځنۍ آسیا هېوادونو ته نفوذ وکړي.

خو ښاغلی مجاهد په نېغه د داعش ډلې په یادولو سره وايي: "د اسلامي امارت امنیتي ځواکونه توانېدلي چې په بشپړ قاطعیت سره په افغانستان کې د داعش فتنه ګرې ډلې پاتې شوني تصفیه کړي."

بلخوا دا یوازې روسیه نه ده، چې د داعش او نورو وسله والو ډلو د ځواکمنېدو په اړه اندېښنه لري بلکې له دې مخکې نړیوالې ټولنې او ملګرو ملتونو هم ویلي وو، چې د داعش او القاعده په ګډون څو ترهګرۍ ډلې افغانستان کې فعالې دي.

د پاکستان حکومت هم په کراتو دا ادعا تکرار کړې چې ګوندې د پاکستاني طالبانو مشران د طالبانو تر واک لاندې افغانستان کې پټ دي او له هغه ځایه په پاکستان کې نا امني جوړوي.

خو طالبان دا هر څه ردوي.