Ibisasu bitaraturika, abapfuye, inzu zabomotse, abana babuze ababo…Bujumbura inyuma y'isanganya ku kigo ca gisirikare

Umunsi umwe inyuma y'uguturika gukomeye cane kwavuye kw'isanganya ry'umuriro mu bubiko bw'ikambi ya gisirikare ya 'Base' iri muri zone Musaga, mu gisagara ca Bujumbura, reta nta co iravuga ku vyahononekariye n'abapfuye muri rusangi, ariko ingaruka ziribonekeza hirya no hino muri uwo mugwa mukuru w'ubutunzi w'Uburundi.

Abanyagihugu mu bice bitandukanye vya Bujumbura babwiye BBC ingorane bahuye na zo mw'ijoro, inyuma y'aho ibisasu vyari mu bubiko biturikiye, ibisigarira vyavyo bigashika ku birometero birenga bitanu uvuye kuri 'Camp Base i Musaga'.

Itororokanirizo ry'amakuru AFP rivuga ko ku makuru rivana mu masoko y'igisirikare n'igipolisi abantu baharurwa muri mirongo bapfuye.

Hafi y'iyo kambi mu makaritiye ya Kinanira, Gasekebuye, Kinindo na Musaga, inzu nyinshi zabomotse ibice, impome, amadirisha n'ibisenge kubera inguvu z'ivyo vyaturitse.

BBC Gahuzamiryango yabajije abategetsi uko ibintu vyononekaye bingana n'abo vyagizeko ingaruka, bishura basaba kubangira ngo kuko bigiharurwa.

Ibisasu bimwe bimwe vyakoze ibara kure uvuye mw'ikambi ya 'Base'.

Umwe mu bapfushije umuntu yabwiye BBC ko umurundikazi wo mu muryango wiwe yapfuye azize ibikomere yatewe n'igisasu caguye mw'ibohero rikuru rya Mpimba aho yari amaze ukwezi apfungiwe.

Muri iri bohero riri hafi y'iyo kambi ya gisirikare iri muri zone Musaga, havuzwe abantu bamwe bamwe bakomeretse.

Radio Isanganiro yo m'Uburundi ivuga ko Adelaïde Hatangayo Musitanteri wa komine Mugere yatangaje ko muri komine yiwe – agace ka Musaga gahereyemwo – hapfuye abantu indwi(7) harimwo babiri bapfiriye mw'ibohero rikuru rya Mpimba.

Mu Gisandema muri Zone Gihosha mu buraruko bushira ubuseruko bw'igisagara ca Bujumbura, igisasu cabomoye inzu gihitana umukozi wo mu nzu, nk'uko bamwe mu bavyiboneye babibwiye BBC Gahuzamiryango.

Uwundi vyemejwe n'abiwe ko yapfuye ni umugore wo muri Quartier Mutakura muzi Zone Cibitoke.

Ubwo burere bwose buri mu buraruko bw'igisagara ca Bujumbura, nko ku birometero birenga indwi(7) uvuye ahari ivyariko biraturika muri zone Musaga.

BBC yashoboye kugenzura yemeza amakuru y'ibisasu n'imiburiburi bitatu bitari bwaturike, vyabonetse muri Zone Rohero, Musaga na Gasekebuye.

Igisasu cabonetse muri Zone Rohero caje gukurwaho n'abapolisi bacungera inzego ba API isaha zitanu zo mu gitondo, nk'uko umumenyeshamakuru akorana na BBC uri i Bujumbura avyemeza.

Igitigiri kitazwi c'abana baraburiwe irengero igihe abantu bariko barahunga kubera ubwoba muri iri joro ryakeye ryo ku wa Kabiri.

Abavyeyi benshi bariko barangisha abana babo, mu gihe Musitanteri wa Komine Mugere yasavye abavyeyi babuze abana babo ko boja ku mirwa mikuru ya Zone Ruyaga na Zone Buhonga kuraba aho bariko bahuriza abana babuze abavyeyi babo.

Ivyashitse neza na neza mu kigo ca Camp 'Base' ntibiramenyekana kandi abasirikare boba bapfuye canke bakomeretse ntibazwi ibitigiri.

Haracari ibibazo vyinshi bitaratorerwa inyishu, kimwe muri vyo ni uwuzoriha ivyononekaye mu banyagihugu.