EU yahanishije Hungary ihadabu ya €200m kubera umugambi wayo ku basaba ubuhungiro

Sentare nkuru y’Ubumwe bwa Bulaya yaciye Hungary amande ya miliyoni 200 z’ama euros kubera ico gihugu cananiwe gukurikiza amategeko y’uwo muryango ku basaba ubuhungiro.

Iyo sentare izokongerako umuriyo w’ama euros buri munsi kuri ayo mande gushika ico gihugu gihinduye politike yaco ku basaba ubuhunzi.

Sentare y’Ubumwe bwa Bulaya yamenyesheje ko ubutegetsi bwa Budapest bwahushanije n’ingingo ya sentare yo mu 2020 yemeza ko bwarenze kw'iitegeko ry’Ubumwe bwa Bulaya mu guhatira abasaba ubuhungiro kujabuka berekeza Belgrade canke Kyiv gusabayo impapuro zibemerera kuja muri Hungary.

Umushikiranganji wa mbere wa Hungary Viktor Orbán, mu butumwa yacishije ku rubuga rwa X, yavuze ko ayo mande baciwe kubera ‘kurinda imbibe z’Ubumwe bwa Bulaya’ ari amande ‘adashobora kwihanganirwa’ yongera ko ko … ‘bisa nk’aho abinjira mu gihugu batabifitiye uburenganzira ‘bafitiye akamaro inzego z’abaserukira Ubumwe bwa Bulaya ziri Bruxelles, gusumba abanyagihugu b’ibihugu vya Bulaya bahagarariye.

Hungary yafashe umurongo ukomeye ku bimukira baturuka hanze y’umugabane wa Bulaya, kuva aho abarenga umuriyoni binjiriye muri ico gihugu mu 2015, abenshi bahunga intambara yo muri Syria. Leta ya Hungary yashinze uruzitiro igerageza guhagarika benshi bashaka gutambuka imbibe z’ico gihugu.

Amategeko y’Ubumwe bwa Bulaya avuga ko uwo ariwe wese ahunze agatotezo mu gihugu ciwe, afise uburenganzira bwo gusaba gukingirwa mu makungu, kandi adashobora kwirukanwa asubizwa mu gihugu iwe, mu gihe hari impungenge zikomeye zigaragaza ko ashobora kwicwa canke kuborezwa igufa.

Mw'itangazo ryagiye ahagaragara kuwa 13/06/2024, sentare y’Ubumwe bwa Bulaya yamenyesheje ko Hungary ‘yirengagije n’ibigirankana’ gukwirikiza politike y’Ubumwe bwa Bulaya ku basaba ubuhunzi, kandi ko kunanirwa kuyishira mu ngiro ‘bigize icaha kitari bwaboneke kandi gikomeye mu mategeko y’uwo muryango’.

Iyo sentare ivuga ko uko kunanirwa kwisunga politike y’Ubumwe bwa Bulaya harimwo kuba Hungary yarapfunze mu buryo budakurikije amategeko abariko basaba gukingirwa mu makungu, ntiyubahirize uburenganzira bwabo bwo kuguma muri Hungary kugeza bahejeje kuburana kuri ubwo busabe bw’ubuhunzi bari bimwe.

Sentare imenyesha ko kuba Hungary yarananiwe kwubahiriza amategeko y’Ubumwe bwa Bulaya bishira umutwaro ku bindi ihugu vy’uwo muryango kandi bigasubiza inyuma ingendo yo gusenyera ku mugozi umwe.

Politike nshasha y’Ubumwe bwa Bulaya yo kunyarutsa kwishura abasaba ubuhunzi, itegeka ibihugu binywanyi vy’uwo muryango guhitamwo gufata abimukira baharugwa mu bihumbi bagwiriye mu bihugu bashikiramwo nk’Ubutaliyano, Grece, na Espagne, canke bikongereza amafaranga ashigwa mu kigega canke ubundi buryo bukoreshwa muri uwo mugambi.

Hungary yahisemwo kudafata n’umwimukira n’umwe yinjiye mu buryo budakurikije amategeko, ititayeho ingaruka izo arizo zose. Hungary yiteguye kuzoshikirwa kurongora Ubumwe bwa Bulaya kuwa 01/07/2024, ikibanza ibihugu binywanyi vy’Ubumwe bwa Bulaya bikuranwako.