Rwanda: Victoire Ingabire avuga ko abayoboke 7 ba DALFA-Umurinzi batawe muri yombi

Umukuru w'ishyaka DALFA-Umurinzi ritavuga rumwe n'ubutegetsi mu Rwanda avuga ko kugeza kuri iki cyumweru abayoboke baryo barindwi ari bo bamaze gutabwa muri yombi n'urwego rw'ubugenzacyaha (RIB).

Victoire Ingabire ukuriye iryo shyaka ritaremerwa n'amategeko yabwiye BBC ko kuri abo hiyongereyeho abagore babiri "bamba bugufi", bo batari abayoboke baryo.

Ati: "Hari igihe nkenera amafaranga bakajya kuyanshakira, bagahemba abakozi, ni aba assistants mu by'ukuri hano mu rugo".

Mu kiganiro cy'umunota umwe kuri telefone, umuvugizi wa RIB yabwiye BBC ko aza kuvugana na yo kuri ibi bivugwa n'umukuru wa DALFA.

Ku wa gatatu nijoro, RIB yatangaje kuri Twitter ko yafunze abantu batandatu barimo na nyir'isheni Umubavu TV yo kuri YouTube Théoneste Nsengimana, bakurikiranyweho "gutangaza amakuru y'ibihuha agamije guteza imvururu n'imidugararo muri rubanda".

Madamu Ingabire ku wa kane yabwiye BBC ko muri abo batandatu, abandi ari abo mu ishyaka rye barimo n'abari barihagarariye ku rwego rw'intara.

Kuri iki cyumweru yavuze ko umunyamakuru Nsengimana atari umuyoboke wa DALFA.

Avuga kuri umwe muri abo bagore babiri avuga ko bafunzwe, Madamu Ingabire yagize ati:

"Ni umuryango we wambwiye ko umugore bamutwaye, bamubaza courrier [ubutumwa] namuhaye hashize amezi menshi, hafi nk'umwaka, nohererezaga abantu b'umuryango wanjye [mu Buholandi] y'ibintu bya anniversaire, objets d'art..."

Madamu Ingabire asanga ibirimo kuba ku ishyaka rye ari "uguterwa ubwoba".

"Abantu ntibahura, abantu bose bari iwabo, barwana n'ubuzima kubera Covid". Asanga "ubwo corona iri hafi kurangira", abategetsi bashobora kuba bibaza ko "wenda DALFA yadusaba kwandikwa [mu mategeko]".

Mu butumwa bwo kuri Twitter ku wa gatatu, RIB yasabye "abaturarwanda bakoresha imbuga nkoranyambaga kwirinda kuba umuyoboro w'abashaka guhungabanya umutekano w'igihugu", ivuga ko "abenshi bihishe mu mahanga".

'Nta bwoba mfite'

Madamu Ingabire avuga ko abayoboke ba DALFA bataba mu bantu bahungabanya umutekano w'igihugu, ati: "Ndasaba abayobozi gushirika ubwoba. Muri DALFA ntabwo dushobora kuba mu bantu bashaka kubyutsa imidugararo, turareba ibiriho, ibyiza bisigasirwe, ibitagenda bikosorwe".

Avuga ko amategeko ateganya ko nyuma y'amasaha 48 ubugenzacyaha bushyikiriza ubushinjacyaha dosiye, ariko ko ibyo bitaraba ku bayoboke be bafunzwe.

Madamu Ingabire avuga ko "nta bwoba" afite bwuko na we yakongera gufungwa, akavuga ko aho atuye bahazi.

Ati: "... nta tegeko nabangamiye, nta tegeko nishe, icyo nsaba ni uko twubaka igihugu kigendera ku mategeko kugira ngo ibintu nk'ibi bicike mu Rwanda".

"Ikindi nsaba ni uko uburenganzira bwabo [abafunzwe] bw'ibanze bwubahirizwa, ntiturashobora kubashyira ibyo bakoresha isuku..."