BBC - Cymru'r Byd

Home

Explore the BBC

MAWRTH
18fed Tachwedd 2014
Hygyrchedd
Geiriau Yn Unig


	A-Y \| Chwilota

	Newyddion Chwaraeon Y Tywydd



	BBC Homepage Cymru'r Byd

»	Tramor Gogledd a Chanol America De America Ewrop Affrica Dwyrain Canol Asia Awstralasia a'r Môr Tawel Amserlen teledu Amserlen radio E-gardiau Arolwg 2001 Gwybodaeth Ymateb

'Milwr bychan ydyw . . .'
Lynda Ganatsiou yn sgrifennu am helyntion bywyd milwr yng Ngwlad Groeg

Mae'n anodd i ni sylweddoli fod y Pasg newydd gael ei ddathlu gan filoedd o bobl dros y byd.
Yma, yng Ngwlad Groeg, mewn pum wythnos y byddwn ni yn dathlu'r Ŵyl.

Dathliadau hollol wahanol fu gennym ni ddydd Gwener y Groglith.

Dydd Annibyniaeth oedd Mawrth 25, a ninnau'n coffau chwyldro 1812 pan ryddhawyd Groeg o ddwylo Twrci a fu'n llywodraethu am 400 o flynyddoedd.

Roedd baneri yn chwifio o adeiladau cyhoeddus a thai.

Gorymdaith filwrol
Yn Athen, dechreuwyd y dydd trwy danio magnelau o fryn Lycabbetus sy'n edrych dros ganol y ddinas.

Bob blwyddyn bydd Arlywydd y wlad ac aelodau'r llywodraeth yn mynychu mawlgan y Te Deum yn yr eglwys gadeiriol cyn ymuno â gorymdaith filwrol enfawr sy'n gorffen gydag arddangosfa awyrennau.

A chan ei fod yn ddiwrnod hyfryd o ran tywydd roedd yn gyfle i bawb fynd allan i fwynhau.

Arwain y lluoedd
Ar ynys Samos, lle mae Andreas fy mab yn gwasanaethu gyda'r fyddin ar hyn o bryd, bu gorymdaith ym mhrif ddinas yr ynys.

Anrhydeddwyd Andreas trwy gael ei ddewis i arwain y lluoedd arbennig a'i fintai ei hun, Y Beretau Duon.

Mae trigolion yr ynysoedd, yn enwedig Samos, yn gwerthfawrogi cefnogaeth y fyddin yn fwy gan eu bod o fewn cilomedr a hanner i lannau Twrci.

Yn gyson mae awyrennau yn yr awyr rhwng y ddwy wlad.

Ond diwrnod o ysblander fu Mawrth 25 a phawb yn falch o'u bechgyn.

Helyntion milwr
Ond ni cheir y melys heb y chwerw a dydi bywyd milwr ddim fel hyn drwy'r amser!

Tanc milwrol

Er bod munudau cofiadwy o odidowgrwydd rhaid i'r llanciau wynebu profion llym ar adegau.

Ychydig yn ôl cafodd Andreas brofiad brawychus gyda ffrwydron pan oedd mewn gofal o danc yn ymarfer ar y mynydd.

Drwy ffawd ni fu damwain ac ni anafwyd neb ond yr oedd difrod y bu'n rhaid ei atgyweirio.

Mewn damwain
Dro arall, cafodd Andreas fraw pan oedd yn teithio gyda gyrrwr arall un noson i nôl dau filwr ar gyfer eu dyletswydd - does dim hawl gan filwr i fod o'r gwersyll ar ei ben ei hun.

Roeddent newydd ddod o amgylch tro mawr pan welsant gerbyd arall yn dod ar gyflymder yn syth tuag atynt yr ochr anghywir yr heol.

Er mwyn osgoi damwain gwyrodd y milwr oedd yn gyrru y jîp yn ddisymwth i'r ochr arall.

Yn anffodus roedd newydd ddechrau glawio a'r heol yn llithrig ac aeth y jîp yn syth i mewn i olewydden, neidio oddi arni a throi 180 gradd cyn llithro ar ei gefn i lawr llechwedd gan lanio ar ei ochr ar yr heol islaw.

Yn ffodus llwyddodd Andreas a'i gydymaith i ddringo allan heb anaf ac yn ffodus i osgoi syrthio i lawr clogwyn dros 30 troedfedd. Ond gwell fyddai peidio â meddwl am hynny!

A beth am y gyrrwr arall?
Wel, roedd ef wedi mynd yn ei flaen heb sylweddoli iddo achosi damwain o gwbl!

Nid yw bywyd i'w weld yn deg ar adegau gan i'r crytiaid gael eu cosbi gydag ugain diwrnod o garchar.

Ond ni olygai hynny eu rhoi dan glo - ond pan ddaw yn amser iddynt adael y fyddin bydd yn rhaid iddynt aros am dair wythnos yn ychwanegol.